أنهي مصر فيهم ؟

مصر الستات اللي بتسافر بره عشان تشتري (السينيه ) من بيوت الأزياء قبل ما ينزل في مصر وصحباتها يلبسوه .. ولا مصر الستات اللي بيعملوا جمعيات عشان يشتروا شنطة (سينيه ) أصلي ب8 آلاف جنيه علي الاقل وإن شاء الله بعدها لا ياكلوا ولا يشربوا المهم يجيبوا الشنطة, اللي أكبر مخاوفهم إن شقي عمرهم ما يضيعيش علي شنطة (سينيه مضروبة من أم 500 جنيه )..ولا مصر الستات اللي عايشه تتمنظر علي المضروب إياه أبو 500 جنيه .. ولا مصر الستات اللي بتتشعبط في الأوتوبيس من الصبحية عشان تجيب في الشهر (ال 500 جنيه ) اللي حتاكل وتشرب بيهم (مفروض !! )...مصر الستات اللي بتصحي من بدري علي أشغالها سواءا أن كانت وزيرة أو غفيرة ..ستات شقيانة فيه شقي عشان الغير وشقي عشان تكفي مع جوزها يدوبك مصاريف البيت وفيه شقي عشان (الإندبنت وومن )وفيه شقي عشان الزوج مش راجل وقاعد في البيت وهيه اللي بتجري علي لقمة عيشه هو نفسه والبيت والعيال ودول كتير ..

***

مصر الرجالة اللي بتشتغل مع أهاليها الملياديرات ولا مصر النص رجالة اللي بيصرفوا بس في مليارديرات أهاليهم ولا مصر الرجالة الشقيانة اللي بيشتغلوا بال3 وأربع شغلانات عشان يكفوا المدارس الأجنبية..ولا اللي  عشان يكفوا يدوبك أكل ونوم وشرب وكهربا لحد قبل آخر الشهر بأسبوع, (الاسبوع الأخير ده بيقضوه سلف) ... ولا مصر الشباب اللي قاعد علي القهاوي عشان لف علي كعوب رجله ومش لاقي شغل .. ولا مصر الشباب اللي عايز وظيفة متفصلة عليه وعلي مزاجه ولا مصر الشباب اللي عايز يشتغل مدير من منازلهم ؟

***

مصر كايرو فيسيتفال سيتي وسيتي سنتر  والقطامية هايتش ولاك فيو والشيخ زايد والعاصمة الإدارية المرتقبة الجديدة .. ولا مصر جنينة مول وطيبة مول والحرية مول..ولا مصر روكسي والعتبة والأزهر والموسكي ..ولا مصر الحاجة اللي ع الرصيف ؟..البياعين عارفين كويس إن نفس الحاجة بتتابع في كل مكان من اللي فاتوا بسعر مختلف..نفس الجاكت, يمكن الشوز أوقات الشنطة كتير البلوفرات وشنط المدارس وخلافه ..(السينيه بيضرب بكذا سعر )

***

مصر اللي لما تتعب فيها، حتسافر على بره في أحدث المستشفيات العالمية ..ولا اللي حتتعالج فيها في أحسن المستشفيات الجوانية واللي منهم مثلا كليوباترا (حد عارف بالمناسبة الشركة اللي اشترتها هي والسلام الدولي ومستشفيتين تانيين تبع مين؟)، ولا مصر اللي لما تتعب حتطلع على مستشفى تبع التأمين بتاع شركتك ولا مصر اللي لما تتعب حتبقي من المتعففين وتفضل تطلع في الروح لحد ما ربنا يبقى ارحم بيك من عبيده ولا مصر اللي لما تتعب تدور عشان تلاقي حد يسلفك وتتكسر نفسك ..

***

مصر اللي فيها بتعلم ولادك بالدولار والاسترليني وما يوازيهم من 250000 جنيه في السنة ولا مصر اللي بيتعلموا ب الفئة ام 80000 أو 100000 ولا مصر اللي فيها الاهل بيجروا ليل نهار عشان يدوا ولادهم تعليم يعني شايفينه يمكن ينقذ عيالهم ..ولا مصر اللي مبتدفعش غير جنيهات قليلة لكن قصادها بيدفعوا دروس خصوصية ب 500جنيه قي الشهر علي الأقل..ولا مصر اللي طلعت ولادها من التعليم بعد التعويم عشان معهمش ال500جنيه دول، اللي يعتبروا إتاوة من مدرس الفصل الحكومي لو مادفعهمش حيسقطوله عياله ..

***

مصر اللي ماشاء الله  بياكلوا فواجراه وسيمون فيميه وقت ما يحبوا ومن بره مصر ..ولا مصر اللي عايشين اغلب اسبوعهم على ماكدونالدز واللي زيه ولا مصر اللي ماكدونالدز هو فسحتهم الفظيعة الشهرية ..ولا مصر اللي بياكلوا لحمة وفراخ كل يوم ولا مصر اللي بياكلوها مرة في الأسبوع ولا اللي بياكلوها في المواسم ولا اللي بيدرو وا علي بواقي عضمها - لا مؤاخذة -في الزبالة

***

مصر اللي مبيتكلموش غير أنجليش وأمريكان اكسنت ولا مصر اللي بتتكلم بالانجليش عشان ده تعليمهم ولا مصر اللي بيتمنظروا بكلمتين مش عارفين ينطقوهم صح عشان ديه (لغة الناس الكلاس ) ولا مصر اللي بتتكلم بلغة (حمو وبيكا )..ولا تكونش مصر كلها بقت بتتكلم  (بلغة حمو وبيكا), أصلها لغة رغم أنها عربي لكنها لغة راعي البقر الأمريكاني اللي متعود على الفوضى الاجتماعية تحديدا !!

أيها المتحدثون باسم جمهورية مصر العربية، على الرغم من أنما سردته هو نقطة في بحر مصر المنقسمة علي نفسها مجتمعيا,  وما خفي من إنقسامات كان أعظم :..

فيه حد ناوي ياخد باله ولا نكمل ونغمي عيونا ونعمل نفسنا مش من هنا ؟!