نشوى مصطفى تروج لمسرحية «العطر» للصم والبكم

أثار العرض المسرحى «العطر» للصم والبكم، إعجاب شديد للفنانة نشوى مصطفى، بعد أن حضرته مؤخرا على خشبة مسرح الطليعة بوسط البلد، فكتبت تشيد به عبر صفحتها بموقع التواصل الاجتماعى فيس بوك قائلة: «فضيت ساعتين فوق السحاب.. الحمد لله على نعمة الفن.. الفن الحقيقى وسيلة من وسائل الوصل والذكر.. ساعتين بقول الله.. ساعتين روحى فى حالة وجد.. قبل ما اقول لكم أنا كنت فين.. فيه واحد اسمه أحمد السيد.. أحمد زميل دراسة دفعة واحدة.. فى السوق أحمد معروف إنه من أهم البشر اللي بفهموا فى فن الانتاج.. يعنى من الشطار أوى على مستوى القطاع الخاص».

وأكملت: «بالبلدى وقت أحمد يساوى فلوس.. لما يروح يشتغل فى الحكومة بملاليم بالنسبة لأجره.. المسألة بحسابات الفلوس تقف عليه بخسارة.. لكن بحسابات حب البلد دى والرغبة إنها تبقى أد الدنيا، أحمد بيشتغل بصيغة جديدة.. بيشتغل بصيغة تقدم فن جاذب.. فن يخدم المجتمع.. فن يخدم صفوة المجتمع.. والصفوة اللي أقصدهم الناس اللي بتتحدى الإعاقة أو الفقد اللي عندهم».

وختمت تدعو جمهورها لحضوره قائلة: «عرض مسرحى اسمه العطر.. مهما أوصف لكم روعته مش حاقدر.. رجعت مشحونة طاقة.. مشحونة حب.. حاسة بسلام نفس بقالى كتير مش عايشاه.. شباب زى الورد بيقدموا مسرح مزيج من فنانين عاديين زينا يعنى بيملكوا كل حواسهم.. وفنانين فاقدين حاسة السمع والقدرة على الكلام.. بعد العرض اكتشفت أن فقد حاسة مش إعاقة.. فقد الاحساس هو ده أكبر إعاقة.. من فضلكم روحوا اتفرجوا على عرض العطر فى مسرح الطليعه بالعتبة.. حتدعولى».