مشاكل بالجملة فى الـ«سينوفا» الصينية

العميل ضحية اماله وتفاؤله وفرحتة هو وأولادة في الحصول علي سيارة بسعر معقول يناسب ميزانيته او علي الاقل تحويشة عمره والذي جمعها بشق الأنفس ومسك علي نفسة وأهل بيتة ليكتمل المبلغ ويسرع وكلة تفاؤل وبهجة ولكن سرعان ما تنكسر أحلامة وتخر قواة عند باب الوكيل .. فالاسعار التي ترتفع يوما بعد يوم لا تناسب تحويشة العمر.. السيارة التي كان يتمناها وفقا لميزانيته زادت قيمتها فبدلا من رغبته في شراء سيارة سيدان متوسطة سيضطر مرغما اذا اصرعلي اقتناء سيارة ان تكون هاتشبك صغيرة او سيارة صيني وأمرة الي الله رغم ان السيارات الصيني اصابها ايضا مرض الجنون السعري .. ولكن ماذا يفعل يسلم بالواقع ويقول لله الأمر من قبل ومن بعد ..وهنا يأتي دور البائع المحترف ويهمس في أذنه ناصيحتي لك ان ترضي بما قدره لك الله وفرضته عليك ظروف السوق وتشتري سيارة وفقا لميزانيتك إتفرج وشوف وإختار من المعروض .. فالاسعار لن تنخفض ولا في الاحلام ..
الأستاذ عبدة أحمد ... قال عربيه ممتازه . توكيل يعنى الى حدا ما كويس . و قطع الغير هتتوافر بره التوكيل باسعار كويسه المميزات ان العربيه ثباتها عالي اوى شكلها شيك صالون تحفه عدادات شيك و شبابى سحب حلو فى 1300 بس بالتكييف بطه بلدى يعني ها تلاقي سحب ممتاز فى 1500 بس مع التكييف معقوله .عيوب ارتفاع سعر قطع غيار و ضعف التكييف من غيرعزل بالعزل ممتاز .
أما الأستاذ إمام عبداللة .... كان لة رأي فالعربية فيها عيبين بصراحه صوت الموتور عالي شويه . وقطع الغيار سعرها غالي ده بسبب ان العربيه لسه جديده الله أعلم.
الأستاذ أمير جرجس .... قال شغلى فى الكيلو 4.5 طريق السويس مستلم العربية من أشهر والعربية ماشية 37000 كم منهم مدقات واخدت كام خبطة فى العفشة من بلاعات وكسور فى الطرق ادت الى قطع تلات فرد كاوتش وكسر جنط انما العفشة عشرة على عشرة سافرت بيها اسكندرية وشرم والسخنة تمام التمام ... التوكيل روحتلة بشكاوى ورجعت بيها هى هى وكمان روحتلة ورجعت بالعربية فيها حدفة ظهرت مكانتش موجودة مثلا .. انما كلة اتحل فى الاخر ومبيحسبونيش على حاجة جوة الضمان واخر مرة كان معانا استاذ سعيد مثلا اثبت ان دونجل العربية مشروخ من ساعة ما استلم على الرغم من انة عمل تعديل وحاول يصلح العربية برة بس برضة غيرولوا الدونجل ببلاش فى الضمان
الأستاذ عبدالرحمن العراقي... بيقول انا واحد من اقدم الملاك للعربية معايا من والتوكيل فعلا مستواهم نزل بشكل ملحوظ ... حضرتك انا لحد 20000 كم فى سنه روحت التوكيل 4 مرات لصيانات دورية فقط بدون ادنى مشاكل تقريبا وبعد كده ظهر المستوى السئ فى الخدمة والتبرير لاخطاء ومشاكل واضحه كالشمس كأننا مبنفهمش زى مشكلة تيل الفرامل اللى ما ظهرت منه مشكله عندى غير لما اتغير ومع ذلك مصممين انها مشاكل طبيعيه وكمان فنيات الصيانه اللى ابسطها مثلا ان العجلة الخلفية قفشت تماما واضطريت اركن العربية يومين لحد ما اتحلت وفعلا اتحلت بأنهم مشكورين بعتوا الناس لحد البيت عندى عملوها بس اصلا مكنش ينفع عطل زى ده يحصل من الاول لانه لولا ستر ربنا حصل وانا راكن ده لو حصل وانا ماشى بالعربية كان حصل كارثه ... فكون ان الناس متضايقه ان مستوى الخدمة نزل ومشاكل مبتتحلش دا من حقهم احنا دافعين دم قلبنا ومديونين للبنوك باقساط فبالتالى مش منطقى كمان ملاقيش مقابل ده جودة وراحه
الأستاذ محمد فرحات جلهوم ... قال التوكيل مستواه قل عن الأول بس بمقارنة بتوكيلات كتير هو احسنهم ولو بيغلطوا عادى دول بشر مش هتكلم كتير شكرا
الأستاذ أحمد فرحات ... قال معظم الناس الى اشترت العربيه شكلها اول مره تركب عربيه اصلا ومش عرفين ان العربيه صينى يعنى لازم شويه محافظه عل العربيه العربيه دى مش نقارنها باليابانى ياجدعان لازم نعرف انها فيها عيوب هتظهر انما التوكيل مستواه قل من الزحمه وضغط الشغل عليه لازم تكونو ايد واحده وتروحو تخدو موقف من التوكيل بس بلاش تنزلو سمعه العربيه فى الارض كده
الأستاذ حسين بيومي عادل.... قال يا جماعه محدش عاب علي العربيه في شئ وكل حد يطلع يسمعنا قصيده كفاح العربيه معاه احب اقوله في أخوة لحضرتكم بيعانوا من توكيل السيء.