بالصورة: "كوكا" ينعي والده بعبارات مؤثرة

أعرب اللاعب أحمد حسن كوكا لاعب المنتخب الوطني وسبورتنج براجا البرتغالي، عن حزنه الشديد بوفاة والده عقب 4 أيام من وفاته.

وكتب "كوكا" عبر صفحته الشخصية على موقع التواصل الإجتماعي "فيس بوك" قائلًا: رحل أعز وأغلي وأطيب واحن وأرجل أب في الدنيا بعد صراع كبير مع المرض، مفيش كلام يقدر يوصف الي جوايا، اول مره ارجع مصر ولا اشوفك، كنت بتتالم وبتتعذب من الحقن والادوية وعمرك ما اتكلمت وقولت تعبان، كنت مفروض تعمل العمليه من ٧ سنين اول ما اكتشفت المرض، ما رضتش تقولنا ! عشان تجيب لنا وتعمل لنا كل اللي نفسنا فيه، وفعلا عملت لنا كل حاجه، كل حاجه عايزنها لاقيناها.

وأضاف "كوكا" كلامه بكلام مؤثر: كان نفسك تشوفني من أحسن اللعيبه في العالم، كان نفسك تشوفني مشرفك ومشرف بلدي، اخواتي كانو بيقولولي لما بجيب جون نفسيتك بتبقي عامله ازاي واد ايه بتبقي فرحان.

ووعد "كوكا" والده ببعض الكلمات: انا بقولك اني هكمل وهفضل لحد ما أحقق حلمك واني هشرفك وسط اهلك وإن هنفضل بجانب بعض انا واخواتي وامي، وحاجه عن أمي يا بابا انت اخترت اعظم ام في الدنيا، عمرها ما اشتكت وهي بتعملك كل حاجه وانت عيان، فخور اني ابنك فخور اني أقول انا ابن الكابتن طيار حسن محجوب.

واختتم اللاعب كلامه: ربنا يرحمك ويجعل قبرك روضه من رياض الجنه.... اللهم لا اعتراض، ان لله وان اليه راجعون.