بالفيديو.. حال السياحة فى الغردقة لايسر عدو ولا حبيب..وحلول الشباب يهملها المسئولون.. ألبرت: السياحة قائمة على الأجانب الروس..وفرج: الحالة تحت الصفر..نور:مطالبنا تتلخص فى العمل

مابين محلات أغلقت أبوابها وعمالة قطعت أرزاقها وفئة تتحدى الصعاب وتمر بأصعب أزماتها وسط تجاهل تام من قبل الدولة وعلى رأسهم وزارة السياحة نزلنا فى الغردقة عاصمة السياحة الشاطئية عشان نعرف الحال وصل بيهم لإيه ففاجئونا بمشاكل لا تسر عدو ولا حبيب وكمان سمعنا منهم مقترحات والشباب عنده حلول ماخطرتش فى بال أى مسئول.

الظروف الراهنة
ومع تدنى مستوى الوفود السياحية تحدث مايكل ألبير قائلاٌ " فى الظروف الراهنة مفيش أى نوع من أنواع السياحة فى الغردقة قايمة على الزبون الروسى بشكل عام ودى كانت غلطة من زمان إننا مشكلناش جنسيات مختلفة للشغل معها كل الإهتمامات كانت وده بعد أول تجربة أو أزمة وقعنا فيها اضطرينا نشوف حال البلد والشوارع كلها فاضية وحتى جنسيات شرق أوروبا مش هو ده الزبون الغنى اللى يقدر يحرك البلد ".
وتابع ألبرت قائلاٌ "نأمل فى عودة السياحة الروسية مرة أخرى بس يبقى فى أصول ومبادئ معينة زى توعية الناس اللى بتشتغل وعاوزين يبقى فى عوامل جذب للزبون الروسى مش طرد وعاوزين نستقبلهم إستقبال كويس".

الطائرة الروسية
و تابع "منذ سقوط الطائرة الروسية وعندنا مشاكل كبيرة فى الغردقة،هى مجموعة السناتر التركى وموجودة فى الغردقة وقطعت عيش ناس كثيرة،ولا أتخيل أن يكون مصرى ويدفع ضرايب ولي حقوقى ويأتى أحد من الخارج وياخد الزبون".

تحت الصفر
وتحدث مدحت فرج قائلاٌ "الحالة هنا تحت الصفر وعندنا التزامات بالنسبة للايجارات والعمالة ومصروفات ومفيش اى نوع من الدخل وحتى الزبون اللى جاى بفلوس قليلة ونازل فى فندق 5 نجوم وده ميكفيش التزامات البازارات والزبون ضعيف ونأمل الشهور الجاية تكون أحسن ".

البلد فاضية
وتحدث اشرف نور قائلاٌ "البلد فاضية خالص ومفيش شغل واحنا عاوزين نشتغل وعندنا بيوت وعندنا عيال عاوزين نعيش ومش طالبين حاجة غير اننا نشتغل والغردقة منسية خالص كله شغال على شرم الشيخ نسيو ان الغردقة شغالة فى السياحة ولا عاد فيها سيزون شتوى ولا صيفى".