الاختيار 2.. همام عطية: رحلة إرهابي ولد في سويسرا وأسس تنظيم أجناد مصر

تناول مسلسل الاختيار 2، عملية استهداف الإرهابي همام عطية، الذي قاد عمليات تفجيرات في مدن الجمهورية، وحوادث إرهابية استهدفت البلاد من بعد ثورة 30 يونيو 2013.

 

وعاش الإرهابي همام عطية، مؤسس تنظيم "أجناد مصر" الإرهابي، كشفتها زوجته بسمة مصطفى، أمام جهات التحقيق، قائلة: "أنا متزوجة من همام محمد أحمد على عطية، وأنجبت منه 9 أولاد، 6 بنات وثلاثة أولاد، بالإضافة إلى أن همام فى الأصل ابن خالى وتزوجت به عام 2004، وأنا لم أحصل على مؤهل دراسى، بينما كان همام حاصلاً على الشهادة الإعدادية، وكان يعمل فى إحدى الدول العربية منذ عام 2002، وحتى نهاية 2011 فى تجارة الدواجن، ولما رجعنا مصر فى نهاية 2011 تقريبا، انقطع عن العمل".

 

ونشأ مؤسس تنظيم أجناد مصر، في ظروف غريبة، تضيف بسمة مصطفى: "همام اتولد فى سويسرا، وكان يعيش مع والديه، وأنا مش فاكرة والده كان بيشتغل إيه، ثم اطلقت والدة همام، وعادت إلى مصر مع طفلها ذو الأعوام الـ6، وتزوجت من شخص آخر كان اسمه سمير، ولما همام كمل 11 سنة، رجع سويسرا عاش مع والده، وفضل هناك لغاية ما كمل 20 سنة تقريباً".

 

وتابعت: "همام كان بيشتغل هناك فى المطاعم، وبعد كدة همام رجع مصر تانى علشان يشوف موضوع تجنيده وحصل على إعفاء وبعد كدة سافر إلى إحدى الدول العربية، واشتغل فى تجارة الدواجن، وأنا كنت قاعدة في نفس الدولة مع أهلى، لأن أنا سافرت مع أهلى من وأنا عندى 4 سنوات، لأنهم كانوا شغالين هناك وفى عام 2004 اتقدم لى وتزوجنا، وفضلنا متواجدين هناك حتى عام 2011، وخلال هذه الفترة أنجبنا 9 أولاد، وهو لما كان بيشتغل فى سويسرا كان بيغسل أطباق فى مطعم".

 

همام عطية: سافر للعراق أيام الاحتلال الأمريكي

وتابعت: "سافر للعراق لمدة شهرين، وسافر معاه محمد سامى ابن خالى وابن عم همام، بس هو ماقالش السبب، ولما رجع قال لى أنه هو كان بيجاهد ضد الأمريكان فى العراق والكلام ده كان فى عام 2007، وهمام رجع لوحده ومحمد سامى مرجعش معاه، وانقطعت أخبار محمد سامى وتقريبا اتقتل فى العراق، وهمام رجع من العراق على مكان عمله، وقال لى إنه كان عايز يجاهد ضد الأمريكان فى العراق لكن الناس اللى قابلهم هناك طلبوا منه يحارب الشيعة وهو رفض ورجع، لكنه أكد لى أنه تدرب على استخدام الأسلحة".

 

وأردفت زوجة الإرهابي: "فى عام 2011 همام أمه اطلقت مرة أخرى، وقال لى إنه مش هينفع يسيب والدته قاعدة لوحدها، وعلشان كدة رجعنا كلنا، ولما رجعنا فتح مشروع صغير لتجارة الدواجن لكنه فشل، وأخدنا شقة إيجار فى الطالبية، وقعدنا فيها لمدة سنة، وخلال الفترة دى همام سابنى أنا والأولاد لوحدنا لمدة 5 شهور، وسافر العريش، وقال لى ساعتها علشان يستخبى من الشرطة، لأنه مطلوب، كاشفاً لى أنه فى منتصف 2012 كان هو وصديقه بلال فرحات، راكبين عربية وحصل تبادل لإطلاق النار مع كمين شرطة بس مقليش إيه سبب ضرب النار، وبعدين هرب هو وبلال على العريش، وفضل هناك حوالى 5 شهور".

 

واستطردت: "بعدين روحت أنا والأولاد قعدنا معاه فى العريش فى منطقة اسمها الخزان، وهمام كان مأجر شقة علشان نقعد فيها معاه أنا والأولاد، وبعد 6 شهور وتقريبا فى منتصف عام 2013، رجعنا على فيصل، وهمام خلال فترة العريش أو بعد ما رجعنا مشتغلش حاجة خالص، ولما كنا فى العريش كان فى واحد اسمه أبو عماد بييجى لهمام وبيديله مبلغ 1300 جنيه شهريا، وكان بيدفع منهم 300 إيجار الشقة والباقى بنصرف منه".

 

وأضافت: "لما كنا قاعدين فى المرج همام بدأ يفكر يسيب الشقة بتاعت المرج علشان الجيران اللى فى المنطقة أخلاقهم كانت سيئة جدا وفعلا همام لقى شقة فى الطوابق فيصل فى شارع الصفا والمروة، وانتقلنا فيها أنا وهو الأولاد وتقريبا الكلام ده كان فى نهاية 2013".

همام عطية وشقة فيصل
وأكدت بسمة مصطفى: "فى الفترة دى بدأ همام يفكر يعمل تنظيم إرهابى فى الفترة اللى قاعدين فيها فى شقة الصفا والمروة، وفعلا همام أنشأ تنظيم اسمه "أجناد مصر" وأنا أعرف من أعضائه بلال فرحات وهو اسمه بلال صبحى، وده أنا أعرفه كويس لأنه صديق همام وكان بييجى فى العريش وفى شقة المرج وشقة فيصل، وكان فى واحد تانى اسمه محمد صابر، بس ده انا مشفتوش خالص بالإضافة أن فى ناس تانية بأسماء حركية سمعت عنهم فى الآخر خالص".

 

واستطردت الزوجة: "همام كان بيقول لى إن الهدف من التنظيم قتل ضباط الشرطة ، وهمام كان بيقابل دايمًا أعضاء التنظيم فى الشارع ومكنش بيعرفهم هو ساكن فين علشان لو حد اتمسك ما يبلغش عنه أو يقول على مكانه، وكان بيقتل ضباط الشرطة بالقنابل، وأنا ماكنتش أعرف مين اللى بيصنع القنابل فى الأول بس لما روحنا شقة فيصل اكتشفت إن همام هو اللى كان بيصنع القنابل بنفسه".

 

واعترفت الزوجة: "تنظيم أجناد مصر نفذ عمليات كتير بس أنا عرفت تفجير عند قسم الطالبية وفيه ضابط مات فيه وتفجير عند جامعة عين شمس، وأنا عرفت إن تنظيم أجناد مصر اللى نفذ العمليات دى لأن كل معلوماتى باخدها من همام لأن إحنا معندناش تليفزيون وهمام مكنش يسيبنى أخرج من الشقة نهائيا، وهمام قالى أن الجماعة عملت تفجير عند قسم الطالبية ومات فيه ضابط وبرده من 4 أو 5 شهور قال لى إن الجماعة نفذت عملية عند جامعة عين شمس، واحنا سيبنا شقة فيصل اللى فى شارع الصفا والمروة بعد 6 شهور تقريباً، وتحديداً فى شهر مايو 2014، وساعتها كنا حوالى الساعة 10 صباحا وهمام كان بيجيب فطار ولقيته جى الشقة ومتعصب، وقال لى إحنا لازم نسيب الشقة دى حالاً لأن بلال صبحى وآخرين كان فى واحد منهم اسمه جمال زكى اتمسكوا وبلال كان عارف الشقة اللى احنا فيها وفعلاً خلال ساعتين كنا واخدين العفش وكل حاجة وروحنا شقة إيجار جديدة فى شارع المنشية فى فيصل".

عمليات إرهابية وصناعة متفجرات 
 

وتابعت: "همام فضل فى الشقة تقريبا من 3 إلى 4 شهور مش بينزل غير فترات قليلة وبيرجع بسرعة علشان الشرطة متمسكهوش، وفضلنا فى الشقة دى لمدة سنة تقريبا ومحدش كان بييجى، غير واحد اسمه مالك جه مرة واحدة وده عضو فى أجناد مصر وكان جى لهمام وجايب كاميرا معاه وكان بيصور فيديو لهمام فى غرفة صناعة المتفجرات وهو بيتكلم عن ضرورة قتل ضباط الشرطة والفيديو ده نزل على شبكة الإنترنت، والفيديو ده كان همام بيقول فيه فكرة تنظيم أجناد مصر وإنه لابد قتل ضباط الشرطة وتطبيق أحكام الشريعة الإسلامية، وأنا شاهدت الفيديو ده على شبكة الإنترنت لحد ما الشرطة عرفت مكاننا".

 

وأردفت: "عرفت من همام أن فى ناس انضمت ليهم فى تنظيم أجناد مصر وكان فى واحد اسمه سيف كان بيجيب لهمام فلوس باستمرار وكان بيصرف منها على أعضاء الجماعة اللى معاه لأنهم كانوا زينا بالضبط بيبقوا واخدين شقق إيجار بالإضافة إلى مصاريفهم الشخصية، كانت من الفلوس اللى كان سيف بيجيبها لهمام بالإضافة إلى شراء متعلقات المتفجرات اللى بيصنعوا بيها قنابل للتنظيم، وفي يوم همام خرج وكان معاه عبوة ناسفة علشان يسلمها لأعضاء التنظيم ومعرفش سلمها لمين بالضبط وتقريبا فى اليوم ده همام رجع الساعة 11 مساء وبعد ما رجع بنص ساعة حصل الاقتحام وهمام مات".

 

وتابعت :"همام كان معاه بطاقة مزورة باسم أشرف صالح عودة سلامة، وفيها صورة همام الشخصية، وده علشان هو كان مطلوب من الشرطة، وهى معاه من واحنا راجعين فالطريق من العريش رايحين للقاهرة قابلنا واحد صديق همام إداله البطاقة المزورة، وهمام كان بيستخدمها فى جميع تحركاته وفى إيجار الشقق وكمان همام كان محتفظ ببندقية ومسدس وقنابل بالإضافة إلى المبالغ المالية اللى كان سيف بيجبهاله كل فتره وكان همام بيصرف منها على تصنيع القنابل.

 

ومسلسل "الاختيار 2" يعرض على قناة ON الساعة 9 مساء ويعاد الساعة 2 صباحاً والساعة 3.30 عصراً، ويعرض على قناة ON دراما الساعة 10.15 مساء ويعاد الساعة 4 صباحاً والساعة 11.30 صباحاً والساعة 4.45 مساء.

 

مسلسل "الاختيار 2" تأليف هانى سرحان، وإخراج بيتر ميمى، وإنتاج شركة سينرجى وبطولة كريم عبد العزيز، أحمد مكى، إياد نصار، بشرى، إنجى المقدم، أسماء أبو اليزيد، هادي الجيار، احمد حلاوة، احمد شاكر عبد اللطيف، محمد علاء، اسلام جمال، احمد سعيد عبد الغنى، سلوى عثمان على الطيب طارق صبرى، عمر الشناوى، وعدد من الفنانين الشباب.