ومن جانبه قال والد الفتيات الثلاثة :- "الحمد لله والشكر لله الدنيا مش سايعانى بعد رجوع بناتى الثلاثة، انا كنت فقدت الأمل، والحمد لله وأقدم شكرا خاصا لكل قيادات الداخلية، لأنهم رجعولى شقى عمرى وضنايا اللى كنت فقدت الأمل فى رجوعهن، وأول ما قابلتهن دموعى نزلت لوحدها، هما كانوا واحشينى خالص ومكانوش بيغيبوا عن عينى ساعة، وأى بنى آدم مكانى كان هيبقى فى نفس حالتى دول شقى عمرى وعيالى، والحمد لله ربنا فوق والشرطة بتاعتنا تحت".
وأضاف والد فتيات المحلة الثلاثة :- "انا كنت بدعى من ربنا متعديش السنة دى الا وأولادى فى حضنى، والحمد لله ربنا رجعهم ليا قبل السنة ما تخلص واستجاب لدعواتى، ولقيت كل الناس بتتصل بيا لما الشرطة رجعتهم قبل ما استلمهم، كل جيرانى كانوا فرحانين لينا برجوع بناتى".
أما الأم فاطمة فقالت":- "الحمد لله ولادى حبايبى رجعولى، أنا نفسيتى ارتاحت واتعميت من كتر العياط عليهم ومكنتش بنام والله وامشى فى الشارع حافية، والحمد لله رجعولى بالسلامة الضنا غالى الحمد لله، ولما رجعولى كأنه جاتنى حتة من السما وشكراً لكل الناس الحلوة اللى وقفت معانا".
وأضافت والدة فتيات المحلة الثلاثة:- "طول فترة غياب بناتى مكناش بننام ولا بنعرف ناكل ولا نشرب من غيرهم، بناتنا التلاتة مش فى البيت ومش عارفين مصيرهم إيه وبيحصل فيهم إيه، لكن ربنا كريم واحنا ملناش الا هما، لأنهم نور عينينا اللى بنشوف بيهم".
ووجه والد الفتيات الثلاثة رسالة لبناته عقب عودتهن من فترة الغياب:- "انا بناتى التلاتة متربيين احسن تربية، وكلهن تعليم جامعى وكان فيه اختلاف وجهات نظر بينا، وهما كانوا شايفين انهم عملوا الصح وخلاص نرجع الماية لمجاريها ومفيش اختلاف، وهما عارفين أن ملهمش غير ابوهم وأمهم، وعينينا الاتنين ليهم وطلباتهم على دماغنا".
وكانت قد نجحت الأجهزة الأمنية بمديرية أمن الغربية، برئاسة اللواء محمد عمران مدير المباحث الجنائية، والعقيد خالد عبد الفتاح رئيس فرع البحث الجنائى بالمحلة الكبرى، والرائد محمد نصر رئيس مباحث قسم ثالث المحلة، بتوجيهات اللواء هانى مدحت مدير أمن الغربية، فى إعادة فتيات المحلة الثلاث المتغيبات منذ شهرين ونصف والمبلغ باختفائهن فى منتصف أكتوبر الماضي.
وتمكن رجال المباحث من تحديد مكان اختفاء الفتيات وتبين تواجدهن بمحافظة القاهرة وعملهن بإحدى الشركات الكبرى، وتم تسليم الفتيات لوالدهم وسط حالة من الفرحة بين سكان المنطقة والجيران بعودتهن سالمات، حيث كان العقيد هشام نوار مأمور قسم شرطة ثالث المحلة، تلقى بلاغا من عصام عبد الحى والد الفتيات بتغيبهن فى ظروف غامضة منتصف أكتوبر الماضي.
ووجه اللواء هانى مدحت مدير أمن الغربية بتشكيل فريق بحث لكشف غموض الواقعة وتحديد ظروفها وملابساتها تحت إشراف اللواء محمد عمران مدير المباحث الجنائية والعقيد خالد عبد الفتاح رئيس فرع البحث الجنائى بالمحلة الكبرى وسمنود والرائد محمد نصر رئيس مباحث قسم ثالث المحلة وباستخدام التقنيات الحديثة وتتبع هواتفهن المحمولة أمكن تحديد مكانهن، وتبين إقامتهم بالقاهرة وعملهن پإحدى الشركات الكبرى والانفاق على نفسهن وتم إعداد مأمورية امكنت من اصطحابهن لمدينة المحلة وتسليمهم لوالدهم، ووجهت الأسرة الشكر لرجال الشرطة لجهودهم فى تحديد مكان اختفاء الفتيات وإعادتهم سالمين للأسرة مرة أخرى.
