نص التحقيقات مع صديق طفل المرور: "أحمد هو اللي هزأ أمين الشرطة وسخر منه"
الثلاثاء، 22 ديسمبر 2020 04:00 م
طفل المرور
أخذت قضية الطفل المتهم بإهانة شرطي المرور والمعروفة إعلامية بطفل المرور، مجراها في التحقيقات، وتم إحالة الطفل وأصدقائه إلى النيابة العامة التي حققت في واقعة الاعتداء على رجل الشرطة وأودعتهم الأحداث.
وأثارت القضية غضب فئات المجتمع لما قام به الطفل اتجاه رجل الشرطة حتي خرج والد الطفل الذي اعتدى على أمين الشرطة القاضي أبو المجد عبد الرحمن أبو المجد، نائب رئيس محكمة الاستئناف بمحكمة الإسماعيلية ببيان اعتذار للشعب عما بدر من نجله أحمد.
وحصلت "صوت الأمة" على نص التحقيقات مع طفل المرور (حريقة) والتي تضمنت أقوال صديق طفل المرور ومصور الواقعة والتي جاءت كالتالى:
س/ أسمك وسنك؟
ج/ اسمى يوسف م، والسن 18 سنة.
ملحوظة: قمنا بتشغيل 5 مقاطع مرئية في مواجهة المتهم الخاصة بالواقعة محل التحقيقات.
س/ ما صلتلك بالمقاطع المرئية الثلاثة الأولى المعروضة عليك؟
ج/ الفيديوهات الثلاثة دول خاصين بواقعة المشكلة مع أمين الشرطة والفيديو الأول وقت لما كنا كلنا راكبين العربية المرسيدس والأمين وقف أحمد وطلب الرخصة منه وأحمد شتم الأمين في الفيديو ده والفيديو الثانى كان بعد ما أحمد شتم الأمين وجرى وبعدها وقفنا بعيد ونزلنا كلنا روحنا للامين ونتكلم معاه والفيديو الثالث برضه وقت ما كنا واقفين مع الأمين برضه.
س/ وضح لنا من هم الأشخاص الظاهرين بالمقاطع المرئية الثلاثة والمشار اليها سلفا؟
ج/ الفيديو الأول أول اتنين ظهروا فيه هما أحمد وأمين الشرطة ودى ساعة المشكلة الرئيسى وأحمد ساعتها كان قاعد في العربية كلنا كنا قاعدين في العربية، والفيديو الثانى أول اتنين ظهرا فيه هما أحمد والشخص الطويل اللى لابس تيشيرت رمادى ده اسمه عمرو أحمد وشهرته تايسون والشخص اللى لابس تيشيرت بيج واللى جه في نص الفيديو ده أنا ومصطفى مكانش ظاهر في المقاطع دى لأنه كان بيصور.
س/ بأى وسيلة تم تصوير تلك المقاطع؟
ج/ مصطفى صور الفيديوهات دى كلها بتليفونه.
س/ وما هو دور اثناء تصوير ذلك المقطع؟
ج/ أنا لما وصلت في نص الفيديو لاقينا أحمد بيشد مع الأمين، فأنا حاولت أهدى قولتله ما أنت اللى كسرت المراية ولما لاقيت أحمد بيزيد في تهزيئ الأمين قولتله امشى من هنا.
س/ وضح لنا من قائل لفظ السباب بالمقطع الرابع الذى لم يظهر هوية قائلة؟
ج/ أحمد وشهرته "حريقة" هو اللى شتم الأمين بس الكاميرا ماكنتش جايباه وجابته بعدها بعد ما شتم.
س/ ما المقصود بالعبارة الواردة بالمقطع الثالث على لسان المتهم أحمد "العربية دى عليها حصانة"؟
ج/ هو قصده يقول للأمين أنه ميقدرش يعمل حاجة مع أحمد ولا مع العربية.
س/ ومن قائل عبارة "أنا بصور اللقطة لوالده وبس"؟ وبماذا يقصد؟
ج/ ده مصطفى وقصده إن الفيديو هيبعته لوالد أحمد.
س/ ما المقصود بالعبارة الواردة بالمقطع الثانى على لسان المتهم أحمد "والله أنا كفيل أكلك علقة أموتك"؟
ج/ أحمد قصده أنه يهدد أمين الشرطة.
س/ ولم قام المتهم أحمد بإتيان ما سبق؟
ج/ هو أحمد قال كده علشان معتمد على سلطة أبوه وإنه معاه حصانة.
س/ ما صلتلك بالمقطع الرابع المعروض عليك المصور عبر لايف موقع التواصل الاجتماعى إنستجرام؟
ج/ المقطع ظاهر فيه أحمد والناس التانيين اللى معاه أعرفهم من شكلهم، وشكلهم عاملين بث مباشر وبيشتموا فى الناس اللي بتكتبلهم في التعليقات.
س/ ما صلتك بالمقطع الخامس المعروض عليك؟
ج/ المقطع ده ظاهر فيه أحمد والعربية اللى راكبها هي نفس عربية أبوه والمقطع شوفته من شهرين.
س/ ما هو سبب قيام المتهم بالتحدث مع فرد الشرطة بتلك الطريقة؟
ج/ هو أكيد بيستهزأ بأمين الشرطة وبيعتمد على سلطة أبوه.
س/ وما هو قصدكم من ارتكاب الواقعة؟
ج/ أنا معملتش أى حاجة، وأحمد هو اللى هزأ أمين الشرطة وسخر منه، وحتى أول الواقعة عمرو ومصطفى ورامز هما اللى ضحكوا على موضوع الكمامة، وأنا كمان ضحكت معاهم بس محدش فينا اتكلم ساعتها، واحنا اللى خلينا أحمد يعتذر لأمين الشرطة.
س/ وما قولك فيما قررته سلفا بصدر التحقيقات من أنك لم تبادر بالسخرية مثل باقى المتهمين بشأن واقعة الكمامة؟
ج/ أنا مرضيتش أقول كده في الأول، بس الحقيقة أنا ضحكت زيهم، وأنا عايز أقول إنى هزأت أحمد وقولتله يعتذر لأمين الشرطة.
موضوعات متعلقة..
مد أجل الحكم على طفل المرور و2 أصدقائه لـ27 ديسمبر مع استمرار الحبس
من واقع التحقيقات.. حقيقة بيع سيارة والد طفل المرور
