نهائي أفريقيا بمباركة «مكية».. عمرة في شهر مولد النبي من أجل نصرة الأهلي (صورة)

14 يوما بالتمام والكمال تفصل بين لحظة كتابة هذه السطور ونهائي دورى أبطال أفريقيا بين قطبي الكرة المصرية الأهلي والزمالك
 

منذ صعود نادي الزمالك لنهائي البطولة على حساب الرجاء البيضاوي المغربي، وجمهور القطبين يحبسان الأنفاس انتظاراً للحظة انطلاق المباراة الحاسمة للبطولة الغائبة عن الفريقين منذ سنوات عدة. 

 

واحد من جمهور النادي الأهلي، قرر أن يدعم فريقه بطريقة مختلفة بعيداً عن منشورات مواقع التواصل الاجتماعي، فأرسل نجل عمه المقيم بالمملكة العربية السعودية، ليؤدي عمرة بالمسجد الحرام، هدفها الأول والأخير، الدعاء بالنصر للنادي الأهلي في مواجهة الزمالك، وتتويجه بالبطولة التاسعة الغائبة منذ 7 سنوات. 

 

 

 

رامي ياسين، قال في منشوره المنشور على صفحته بموقع التواصل الاجتماعي «فيسبوك»: «أنا الأهلى بالنسبة ليا مختلف حاله خاصة مرتبط بيه إرتباط عاطفى غير عادي، من وأنا عندى ٧ سنين من أول عرفت يعنى إيه كوره وأنا بشجع الأهلى رغم إنى مش من عيلة كروية، ميزة الأهلى إنه عمره ما خذلك ما وقعكش فى يوم فى ضيقه وخلاك تشجع المنافس التقليدى ليك عشان تكسب بطولة». 

 

وتابع، قائلاً: « الأهلى بيفرحك دايماً وحتى لو زعلك فى يوم فهو عنده رصيد من الفرحة يكفيك تعدى الزعل والحزن ده وتبقى عارف إنه أكيد هيعوضك بفرحة، نهائي إفريقيا المرة دي مختلف عشان مش بس البطولة غايبة من ٧ سنين لا كمان عشان قدام المنافس التقليدى بتاعك وغريمك اللى ما ينفعش أصلاً تخسر قدامه فى الدورى حتى وإنت كسبانه ما بالك بنهائي أفريقي».

 

وأضاف في منشوره: «من كتر ما الماتش عاملي خرم في دماغي وهوس نمت (بعد ما صليت قيام ليل) حلمت إنى حضرت الماتش فى الاستاد مع تريكة وبركات والحمد لله كسبنا (يا رب يتحقق) أول ما قومت من النوم كلمت إبن عمى فى السعودية يروح يعمل عمره ويدعى للأهلى من قدام الكعبة، مش عارف إن كان ده صح ولا غلط بس أنا والأهلى واحد لو فرح أنا هفرح ودى مش أى فرحة دى فرحة ما بعدها فرحة، ممكن تقول ده جنان ممكن تقول أى حاجه عاوز تقولها بس الأهلى زى ما قولت حالة خاصة عندى عشق من الطفولة لا ينتهى بحبه أعمل إيه» .