29 طريقة لإبعاد طفلك عن الشاشات

تعاني الكثير من الأمهات من عدم تواصل أبنائهم معهم وانتباههم بشكل مبالغ فيه سمعيا وبصريا سواء مع التليفزيون أو اللاب توب أو الموبايل، وفي الحقيقة يرجع السبب الرئيسي في تلك الأزمة إلى الأم لترك الطفل منذ الصغر أمام الشاشات لفترات طويلة دون رقيب ودون وعي بأن ذلك يعرضه لمشكلات صحية كثيرة كالتوحد والبلادة وعدم قدرته على التواصل مع الآخرين وغيرها من الأمراض.

وهو ما أكدته الدكتورة جيهان شلبي استشاري أمراض التخاطب، مشيرة إلى أن التخلص من ذلك سيأخذ وقت ولكن على الأم محاولة شغل فراغ الطفل لابتعاده عن الشاشات المختلفة ووقايته من الكثير من الأمراض النفسية، ولذلك هناك العديد من الطرق التي يمكن اتباع بعضها على فترات متفاوتة، حيث إن الفترة المسموح بها للتعرض لأي من الوسائل التكنولوجية هو ساعتين في الأسبوع ومن بعد 8 سنين ممكن ساعة في اليوم، فلو تجاوز الطفل الوقت المسموح أي كان المحتوى سيكون ذلك سبب كافٍي إن طفلك سلوكه يسوء وتركيزه يقل على جميع المستوايات ولذلك يجب علي الام  تجربة بعض من هذه الطرق طبقا لما يناسب سن وشخصية الطفل كما يمكن تطوريها أو تبسطيها حسب السن.

1- مشاركة الطفل في تنظيف أو ترتيب البيت خاصة في حالة البنات فهي ترحب بذلك لمشاركة والدتها. 

2- إقامة مسرح للعرائس بمشاركتهم فيقومون بتنفيذ القصة والقيام بكل الأدوار.

3- وضع ألواح ورق كبيرة على الحوائط ليرسموا عليها بخامات مختلفة من الألوان سواء خشب أوألوان مياه وغيرها.

4- وضع لوح سوداء ليرسموا عليها بالطباشير وليس كراسة رسم وعلبة ألوان أو التي تحتوي علي رسومات جاهزة مطبوعة وهويلونها لأنها من معوقات الإبداع.

5- تقديم ألعاب مطبوعة يحاول الطفل حلها كتوضيح الاختلافات والمتاهة.

6 - مشاهدة فيلم قصير أو كرتون عن قيمه معينه وتتناقشوا فيها، أو مشاهدة فيديو ثم يدور النقاش حوله والسؤال عن أي صور فيه لتنشيط الذاكرة في صورة مسابقة.

7- اللعب بالبازل من بدايتا من الـ 4 قطع لحد الـ 300 قطعة و أكثر.

8- لا يجب وضع المكعبات للطفل والاكتفاء بذلك ثم نقول ماحبهاش لأ لازم نطور فيها مره نعملها عربية ونركب فيها لعبة تانية مرة نعمل بيت علشان نمثل بيه حاجة تانية، مرة نعمل حيطة صغيرة علشان نداري إيدنا وراها في مسرح العرائس اتفقوا على فكرة وسيبيه ينطلق فيها.

9- القيام بلعبة تقليد الأصوات بحيث يقوم كلا من المشاركين بتقليد صوت حيوان أو حاجة والباقي يقولوا صوت مين؟

10- عروستي دي ممكن تلعبيها مع ولادك وأنت في المطبخ يقعدوا عالباب و تلعبوا أي حاجة موجودة في الشقة حد يوصفها والباقي يخمنوا مثلا عروستي؟ حاجة حمرا عروستي؟ بتتاكل عروستي؟ بتتقطع عالسلطة (طماطم)

11- بدل ما نتعلم الحروف والأرقام عالورق نجيب طبق مليان رمل أو ملح والطفل يكتب بصباعه بعدين تلخبطوه وتكتبوا غيره و ممكن لوحده  يرسم بنفس الطريقة.

12- فصل الحاجات: مكرونة وعدس وطبقين والطفل يفصل كل حاجة في طبق ممكن لو سنه صغير نخليه يفصل حاجات أكبر وأسهل وممكن نطبق نفس اللعبة في فصل الألوان يعني يفصل كل الأحمر لوحده والأبيض لوحده و ممكن نلعبها في سبت الغسيل يفصل لبس ماما عن بابا عن لبسه يعني كل لعبه مرنة وتنفع لأي سن.

13- عمل صلصال منزلي (كوب دقيق+ نص كوب ملح+ معلقة زيت+ ألوان طعام) ونعجنها بمايه لحد ما تظبط ونخلي الطفل يعجنها بنفسه، ممكن تقعد لأسبوع في التلاجة في كيس.

14- أي حاجة يدوية شوية خامات الطفل يطلع منها حاجة.

15- سينما: تضلموا الغرفة و تعملوا فشار وعصير ويبقى حد مهمته يحط الفشار في أكياس وحد يوزع تيكت وحد يظبط المكان وتتفرجوا على أي فيديو حتى لو ربع ساعة ممكن مرة عن الحيوانات مره طيور مرة أسماك بلاش مش لازم كرتون.

16- إقامة مخييم في الصالة مرة في الأسبوع أو في الشهر أي كان المناسبة تطلعوا مرتبة برة و تناموا كلكوا جمب بعض ده مفيد جدا للأطفال اللي لسه بتتعلم تنام لوحدها بيبقي حافز حلو ليهم إننا كل فترة هنام كلنا سوا شرطها تكون برة مش في غرفة الأب و الأم علشان الطفل ميرتبطش بالغرفة و يروحلها كل يوم.

17 -خيمة: كرسيين وفوقهم كوفرتة أو أي خيمة بشكل بسيط الطفل يتعلم يعملها و يعقد فيها يلعب اللي يحبه، بيفرحوا بيها جدا.

18- تمثيل: حد يمثل تعبيربالوجه والتاني يقول معناه (زعلان- فرحان) ممكن حد يمثل وظيفة.

19- لعبة المطعم نعمل في يوم منيو وحد يبقي طباخ و حد جرسون و كده أو أوبن بوفيه و نتعلم من خلالها أداب الطعام بشكل مبسط.

20- هيحصل إيه؟ نطرح سؤال افتراضي وكل واحد يجاوب زي هيحصل إيه لو السماء مطرت رز بلبن؟ ممكن نبسط السؤال هيحصل إيه لو صحينا لقينا في البيت قطة ؟ طبعا لو ابنك بيترعب من القطط ده مش سؤال مناسب.

21- سوق الخضار والفاكهة: الأم تعمل بياعة في السوق والأطفال يشتروا ويغسلوا وياكلوا اللي اشتروه  ولازم تبقي متقنة يعني كل ما الأم تتقمص اللعبة هتحلو.

22- نعمل كيك أو كب كيك ونحط أطباق كريمة وفواكه وبسكوت وكل واحد يزوق جزء (نبعد عن عجينه السكر لأن سكرها عالي و أي سكريات كتير بتهيبر الطفل)

23- الميك معاك: نجيب ميكروفون بيتباع بـ 15 جنية و نركبه في السماعات وكل واحد يبقي ليه فقرة يطلع بقي يغني أو يحكي حدوتة.. فقرتك كأم ممكن تحمل رسالة غير مباشرة عن اللي تحبيه.

24 -كمل الحدوتة: حد يبدأ مثلا كان مره واحد ماشي و فجأة.. التاني يكمل و لو الطفل مش عارف يتخيل  ممكن أسيبله النهاية بس يعني كان فيه مرة ولد قلمه ضاع فخد من مصروفه و راح المكتبة والطفل يكمل.

25- اجتماع عائلي: مرة في الأسبوع تجتمعوا و كل واحد يقول اكله ليوم في الأسبوع القادم و تعملوا منيو الاسبوع فطاروغداء عشاء مكتوب و متعلق.

ده مهم جداااا في تعليم الطفل النظام و للأطفال اللي بتصحي ماما هفطر سندوتش جبنه بعدين تعمليه يقولك لأ بيض و ينتهي الموضوع بخناق ،لكن مع وجود الجدول هيقولك لأ بيض هتقوليله حاضر يا حبيبي هكتبها في منيو الاسبوع القادم بس، وبذلك يتعلم الإيثارهو وباقي أفراد الاسرة بمعني بابا مختار في يوم ملوخية و فراخ و سلطة و رز جه اليوم ده و ابنك مش بيحب الملوخية بيأكل سلطة و فراخ و أرز فقط ولا تقومي بعمل اكل مخصوص له  ، وذلك ينطبق علي باقي الافراد لو الاب مبيحبش حاجة الطفل مختارها برضه هيأكل باقي الموجود و ميتعملوش مخصوص.

26- عكس الأدوار: لمدة ساعة مثلا ابنك يأخذ دور الأم وأنت تأخذي دوره وتعكسوا المهام أنت ترتبي أوضته وهو يوضب حاجة في البيت من مهامك مثلا.

اللعبة دي بتوضح ابنك شايفك إزاي وشرطها متنتقديهوش في اللعبة خالص لأن ممكن تلاقيه لما خد دورك بدأ يزعق و يحط إيده في وسطه فأكيد أنت بتعملي كده.

27- مكالمة: تخليه يكلم حد من قرايبكوا يسأل عليه، والطريقة دي تعلمه التواصل والحرص علي صلة القرابة.

28- قولي ميزة: كل واحد يقول إيجابية في غيره بتبقي حلوة جدا و بتعرفي ابنك بيحب فيكي إيه.

29- طبقين واحد فاضي والتاني في أسفنجة ومياه والطفل يأخد الأسفنجة ويعصرها في الطبق الفاضي لحد ما ينقل كل المياة من ده لده.