الرئيس السيسى خلال افتتاح مدينة الأثاث بدمياط: مصر زى الفل وتتحرك للأمام

الرئيس السيسى: أنفقنا 615 مليار جنيه لتحسين خدمة الكهرباء.. ويحذر: مفيش تحدى خطر على مصر إلا من داخلها

السيسى: الوضع الاقتصادى فى 2016 كان كارثى والآن أكثر من رائع.. ويوجه الهيئة الهندسية بمتابعة الإنشاءات الجديدة بمدينة الأثاث

الرئيس: "محدش قرب لملف البحيرات من 100 سنة.. وهنرجعها زى الكتاب ما بيقول.. والدولة تبذل جهدا جبارا عشان تحل المشكلات

شهد الرئيس عبدالفتاح السيسي، صباح اليوم الثلاثاء، افتتاح عدد من المشروعات القومية الكبرى فى محافظة دمياط، ومنها مدينة دمياط للأثاث إحدى أهم مدن الآثاث بالشرق الأوسط، والتى تعتبر إحدى الأولويات التى وضعتها الدولة المصرية على عاتقها فى السنوات الأخيرة، بالإضافة لمشروع إسكان بدار مصر والذى يضم 194 عمارة بمدينة دمياط الجديدة، بالإضافة  لفندق اللسان أول فندق 5 نجوم بمنطقة التا بمدينة رأس البر، ومحطة متعددة الأغراض فى ميناء دمياط.

وتعتبر مدينة دمياط للأثاث، أحد سلاسل المدن الجديدة المتخصصة فى إحدى الصناعات الاستراتيجية، وتضم مئات المصانع والورش المجهزة وفق أحدث الأساليب العلمية الحديثة.

السيسى: مصر جادة فى تطوير الصناعة والدولة تكلفت المليارات لجلب الاستثمارات

أكد الرئيس عبد الفتاح السيسى، أن الدولة المصرية جادة فى تطوير ودعم الصناعة فى مصر، من خلال تجهيز الأراضى الصناعية ومنح المصانع بترخيصها للمستثمرين، وهذا الأمر كلف الدولة مليارات، بما يحقق فرص عمل ويحرك الصناعة بشكل أكثر فعالية.

وفى رسالته للمصريين، قال،: "بقول كدا يا مصريين عشان دى بلدكم مش بتاعتى أنا بس.. مصر بتاعتنا كلنا وكلنا نخلى بالنا منها وعارفين ما يحدث فيها، ونفرح بذلك".

وعن مصانع الأثاث فى دمياط، قال: "يا جماعة مصر فيها 100 مليون وتنمو، وحجم الطلب للمساكن والفنادق ينمو.. وعندنا  14 مدينة سيتم افتتاح المرحلة الأولى منهم منتصف العام القادم.. وبالتالى هناك فرصة للعمل والانتاج ليهم مكان فى السوق المصرى حتى لا يعتمد جزء منا على الأثاث من الخارج.. هنا مدينة الأثاث وهتعمل نقلة كبيرة فى المنتج الجميل الموجود الآن ليكون أكثر جمالا وأكثر اتقانا.. وأنا بحلم بمدينة الاثاث لتأخذها مكانها.. والناس تقول هنروح مصر عشان نجيب أثاث من مدينة الاثاث بمدينة دمياط".

وعقب اللواء إيهاب الفار رئيس الهيئة الهندسية، موضحًا أنه سيتم تسلم 13 منطقة صناعية جديدة منتصف العام القادم 2019.

وفي تعليقه على المشروعات القائمة فى مصر الجديدة، قال إنه سيتم الانتهاء من 4 كبارى بمصر الجديدة خلال 15 يومًا، والكوبرى الخامس فى 30 ديسمبر القادم، مضيفًا: "غيرنا 7.7 كيلو متر مواسير مياه، والمنطقة ستشهد سيولة مرورية، وخلال 15 يوم سيتم البدء فى المرحلة الثانية من عمليات التطوير فى مصر الجديدة، وجارى العمل فى طريق السويس، وسيتم الانتهاء منه فى شهر فبراير القادم ليتضمن 9 حارة مرورية".

السيسى: "محدش قرب لملف البحيرات من 100 سنة.. وهنرجعها زى الكتاب ما بيقول"

أكد الرئيس عبد الفتاح السيسى، أن الدولة تتعامل مع ملفات لم يتم التعامل معها من 100 سنة، ومنها تطوير بحيرة المنزلة، التى سيتم الانتهاء من تطويرها بحلول 2021.

وتابع الرئيس خلال افتتاح عدد من المشروعات القومية بمحافظة دمياط: "سيتم تطوير البحيرات فى أنحاء الجمهورية حسب المواصفات العالمية، و"هنرجع كل بحيرات مصر زى الكتاب بتاع بحيرات العالم المتقدم ما بيقول مش زى ما كانت على أيامنا".

وقال الرئيس السيسي: "البحيرات كانت بتتمثل فيها أفلام زمان واللى كان عاوز حاجة بيعملها والدولة لن تغيب عن مصالح المواطنين، ولما البحيرة تخلص هتبقى قصة تانية، والله اللى بيتعمل فيكي يا مصر ميخطرش على بال حد".

وطالب الرئيس السيسي الإعلام لتوضيح الصورة للرأى العام من أجل بناء وعى حقيقى قائلا: " الحكاية كبيرة علشان نتصدى لبناء وعى حقيقى فى الحفاظ على دولة بما يليق بدولة بحجم مصر"، مطالبا المسؤولين بتسليم الدولة فى أحسن صورها للأجيال القادمة".

الرئيس السيسى يفتتح محطة محولات مدينة الأثاث وكهرباء غرب دمياط

وافتتح الرئيس عبدالفتاح السيسي محطة كهرباء غرب دمياط عبر تقنية الفيديو كونفراس، كما افتتح محطة محولات مدينة الأثاث، مؤكدًا أن العدادات الذكية ومسبوقة الدفع ستقضى على مشاكل القراءات والتحصيل، متابعا:"لدينا قدرة لإدارة التشغيل بكفاءة عالية وعدم ضعف الكهرباء، فيه 30 مليون مشترك ومفيش حد فى العالم يستطيع توفير حجم هذه العدادات وتغيرها فى عامين أو ثلاثة".

الرئيس السيسى من دمياط: "مصر تتحرك للأمام ومفيش عودة مرة تانية للخلف"

قال الرئيس عبد الفتاح السيسى، إن الدولة تعمل على تصويب البناء العشوائى، مضيفًا: "الدولة تعمل على حل  مشاكل الكهرباء والصرف الصحى والمياه والغاز، ويجب على الدولة والمواطنين احترام التخطيط المتكامل ".

وأضاف وفى رسالته للمواطنين والإعلاميين،: "لما بنتكلم بنتكلم عشان التحدى.. ومفيش تحدى خطر على مصر إلا من داخل مصر، وأرجو أن تنظروا للمنطقة حولكم.. وعندما يتحرك الناس قادرين يهدوا بلادهم.. مفيش حاجة عندى.. وانا هستنى عشان يبقى عندى وأنا بيكم.. دا أنا هفضل أكرر حتى يبقى عندكم مناعة ضد هدم البلد.. هفضل أكرر عشان أبقى قدام ربنا عملت اللى عليا مع الناس فى مصر وفهمتهم خطورة أى تحرك".

وتابع الرئيس حديثه: "الدولة تبذل جهد جبار عشان تحل مشاكل وتقنعكم، والناس بتقول هو مستعجل كدا ليه!.. هو أنت كل مرة هتتكلم هتكرر كلامى!.. أيوة..  وأتمنى من كل المسئولين يكرروه عشان المناعة لشبابنا الصغار اللى لسه طالع، الل كان عنده فى 2011  حوالى 10 سنين النهارده عنده 17 ، ومشفش وميعرفش.. والتوعية مش مبنية على مدة زمنية على الناس اللى حضروا الأحداث وفهموا المخاطر، التوعية فى  الجامعة والمسجد والكنسية.. البلد البلد البلد.. مصر بينا واستقرارنا نقدر نعمل كتير".

وواصل: "هتقولوا لى فيه حاجة؟.. والله مافيه حاجة.. زى الفل، وأنا مش ببص على دلوقتى بس.. أنا ببص على دلوقتى وبكرة وبعده والسنين اللى جاية.. وكل ما فيه استقرار اتحركنا للأمام ومفيش عودة مرة تانية للخلف.. وكل حاجة معروفة ومحطوط لها استثماراتها وأموالها ولو حطينا محطة الضبعة مع مشروعات الكهرباء يبقى بنتكلم فى تريليون جنيه.. وبقول كدا إننا متحركين بشكل أكثر من رائع وسنستمر فيه  بجهدكم وصبركم، وأنتوا شايفين النتائج.. إحنا كنا بنتكلم فى وضع اقتصادى عام 2016 كان كارثى، والنهارده ما شاء الله أفضل وسنتحسن أكثر".

الرئيس السيسى من دمياط: أنفقنا 615 مليار جنيه لتحسين خدمة الكهرباء

كشف الرئيس عبدالفتاح السيسي، عن أن الدولة صرفت 615 مليار جنيه لتحسين خدمات الكهرباء، مشيرا إلى أهمية توضيح الأمور للمواطن، حتى لا يتعرض للتشكيك.

وقال الرئيس السيسي خلال كلمته: "إن الكمية التى أنتجتها مصر من الكهرباء خلال 60 عاما، استطاعت أن تنتجها خلال 5 سنوات فقط، بزيادة قدرها 28 ألف ميجا وات".

وأضاف الرئيس: "انتم يا مصريين اللى عملتوا الكلام ده فى خمس سنين تم مضاعفة حجم الكهرباء فى مصر والكهرباء معناها تنمية وحياة، ومفيش حاجة بتتعمل إلا بتخطيط كبير ومتابعة"، لافتا إلى أن مصر أصبحت جسرًا لنقل الكهرباء.

وحذر الرئيس السيسي من البناء العشوائى قائلا: "3 مليار لمعالجة النمو العشوائى تحت أبراج الضغط العالى، وتصويب البناء العشوائى تكلفته على الدولة تفوق التخطيط المحكم، موجها حديثه للمخالفين: "انت مش عارف أنت بتعمل إيه فيك وفى أولادك وفى الدولة".

الرئيس السيسى يوجه الهيئة الهندسية بمتابعة الإنشاءات الجديدة بمدينة الأثاث

ووجه الرئيس عبد الفتاح السيسى، الهيئة الهندسية للقوات المسلحة، بالإشراف على الإنشاءات الجديدة فى مدينة الاثاث بدمياط، حتى لا يتم الخروج عن الشكل والنماذج الإنشائية المقررة، مضيفًا: "عشان أضمن إن الحاجات هتتعمل مضبوط".

كما وجه الرئيس، خلال كلمته، الشكر لكل من ساهم فى تنفيذ مدينة الأثاث بمدينة دمياط، مطالبًا جهاز المشروعات الصغيرة والمتوسطة بتقديم التسهيلات للراغبين بالعمل فى المدينة، مع تجهيز مشاريع الإسكان الخطر المقرر تنفيذها من خلال مدينة الأثاث.