الناظر والفنانين.. رسائل طمأنينة ودعم بعد إعلان رامي جمال مرضه بالبهاق

بعد إعلان المطرب رامي جمال عبر حسابه الشخصي بموقع تبادل الصور والفيديوهات "إنستجرام"   عن مرضه بالبهاق  ومرور سنة تناول فيها العديد من العلاجات دون فائدة وكتب على حسابه: "الحمد لله الذي أحبني فابتلاني وأقدرني على الصبر.. من فترة ظهرت بقع بيضاء في جسمي وبالكشف عرفت إنه مرض البهاق، وجربت أنواع علاج كتير ودكاترة كتير ومفيش فايدة".

ليرد عليه الدكتور هاني الناظر طبيب الجلدية من خلال صفحته على "الفيس بوك" قائلاً: «نشر الفنان المطرب رامي جمال بنفسه علي صفحته اليوم منشور أعلن فيه انه يعاني من مرض البهاق وقد تناقل كثيرون هذا المنشور وكتب البعض عن المرض معلومات خاطئة تماما ومن ناحيتي انقل لرامي تمنياتي الطيبة ودعائي له بالخير والشفاء بمشيئة الله مؤكدا له والجميع إن مرض بهاق مرض غير خطير وليس له أي مضاعفات والأهم أيضا انه مرض غير معدي نهائيا وإنما هو مرض مناعي ناتج عن خلل في الجهاز المناعي في صورة نشاط مناعي زائد وليس ضعف في المناعة كما يشاع والمرض لا يعوقه عن عمله، متمنياً له في أخر الرسالة الخير والصحة».

لم يكن هذا هو الرد الوحيد لمساندة المطرب جمال، بل وجدت حالة من الدعم شهدها الوسط الفني لدخول جمال في حالة من الحزن الشديد بسبب صعوبة ظهوره أمام الجمهور في حالة وجود حفلات أو تصوير في أحد البرامج التلفزيونية، وذلك ليبتعد عن فكرة الاعتزال التي انتابته منذ ظهور المرض وكان أهمهم في بث روح الطمأنينة في قلبه من الفنانين:

الفنان محمد نور

"إيه اللي أنت بتقوله ده دي حاجة عادية زى أي حاجه، أنت جميل، وكل الناس بتحبك، فنان كبير، وأنا من أول جمهورك وأول واحد قولت لك لازم تغني".

الفنانة إليسا

 "ممنوع تغيب وممنوع يكون البهاق عذر لغيابك.. آنت بتقول ابتليت بالبهاق، بس مش سبب لتخاف وتغيب، في ناس ابتلت بالكذب والخيانة والسرقة وما هزت، وجودك أساسي ومتل ما أنت بتقول، أصل الحكاية مش حكاية شكل.. حكاية روح"

الفنانة لطيفة

"حبيب قلبي يا رامي يا مبدع يا محترم يا مختلف، أوعى تفكر كده، أول حاجة لازم تقول الحمدلله على كل حاجة ربنا يكتبها لنا، تاني حاجة، دي حاجة حصلت لناس كتير، وتعالجت منها الحمدلله، وبعدين احنا بنحبك على موهبتك وفنك الرائع وكل جمهورك، وأنا منهم، بنبقي مستنيين جديدك دايمًا" .

الفنان هشام جمال

"عندي إحساس من كلامك إن دي هتكون بداية مرحله كلها نجاح ونضوج وتركيز إن شاء الله ألف مليون سلامه عليك يا رامي و مستنيين الأغاني الجديدة"، ليرد عليه رامي قائلا: "شكرًا يا هشام علي كلامك الجميل قد ايه وجود المحترمين اللي زيك بيفرق فعلا بيكم بتهون".

الفنان أحمد جمال

 " سلامتك يا رامي يا حبيبي أولاً ربنا ما بيختارش غير الخير و تأكد إن كل اللي بيحصلنا في الدنيا من تدبير ربنا و رحمته بينا  ثانياً جمهورك اللي بيحبك هيفضل يحبك و مكمل معاك بأي شكل و ف أي وقت ثالثاً و ده الاهم مفيش " جمال " ضعيف كل عيلة جمال جامدين يلا يا بطل انا مستني الألبوم"، ليرد عليه رامى قائلا:" كلامكم بيفرق والله أنت مش فاهم انا قد ايه باخد طاقه ايجابيه من المحترمين اللي زيك".

الفنان إيلى أبو نجم

" الطريق طويل.. ومعاك دايما هو الألبوم امتى يلا"، ومن جانبه رد رامى عليه، قائلا:" والله بتهون وتحلي بالناس اللي زيك".

الفنانة إيمان العاصي

"حبيبي يا رامي، أنت أقوة من أي حاجة، وفنان وموهوب ونجم، وكل ده ولا حاجة قصاد نجاحك وحبك لفنك ربنا يقدرك على الناس عديمة الإحساس، ربنا يخليلك ناريمان بالدنيا".

الفنان عمر السعيد

عبر حسابه في "انستجرام": "بنحبك زي ما أنت".

الشاعر تامر حسين

: "يا روما يا حبيبي يا صديقي المُحترم، ربنا يعافيك ويشفيك.. الناس حبيت فنك، ألحانك، شخصيتك، سيرتك.. الباقي كله والله شكليات، وربنا يفرحك ويطمنك وكل اخواتك وحبايبك فى ضهرك دايمًا".

الفنان حمدي الميرغني

" ربنا يشفيك يارامي ده مش حاجه اصلاً ده الصداع أصعب منه ياخويا الناس كلها بتحبك ..وكل ماتشوفني أحمد ربنا وأعرف أنك في نعمة"

الفنانة إيمى سالم

" كمل و أعمل اللي بتحبه و إحنا معاك وفي ظهرك"