فتش عن «السيفن أب» و الماسكرا و «ورك الفرخة».. «السينجل مازرز» يكشفن أغرب أسباب الطلاق

 

«ايه أغرب سبب ضربتي بسببه خناقة كبيرة مع جوزك وبعدها اطلقتوا»، سؤال طرحته إحدى السيدات في جروب على موقع «فيس بوك» يضم عدداً من «السينجل مازر» كنوع من الفكاهة والتسلية بينهم ولكن التعليقات بين السيدات كانت صادمة.

 

تقول «رانيا»: «مرة جوزي اتخانق معايا علشان مسحت الشقة وهو مش موجود لأنه كان بيحب يشوف همسح بمياه قد أيه علشان في بيت عيله ومش بيحب الفاتورة تيجي غالية».

 

أما أم دودي فذكرت: «اتخانق معايا علشان حطيت من السفن أب بتاعته لماما لما جت تزورني وراح قال لأهله»

 

وتتذكر «جاسي. ع»:  «أغرب خناقة كانت يوم الصباحية بيقولي اغسلي البطاطين رغم أننا كنا في يناير بس هي طلبت معاه..حسيت اني متجاوزة واحد مجنون». 

 

ولكن سارة .ع تقول: «كانت خناقة هباب علشان خلصت كيلو برتقال في يومين، كان البخل واخد حده معاه ومعرفش اتحملته بعدها سنتين ازاي». 

 

وضع «سارة.ش» كان مختلفاً قليلاً، فتقول: «مرة جوزي طردني برا البيت عشان رجع لقى بنت أخوه عندها ٣ سنين قعده معايا بتاكل كحك وبسكويت وقرب يخلص، مرة تانية زعقلي قدام أهله علشان حطيت كوباية الشاي جنبه مش قدامه». 

 

وعلقت «زيزي .ع»:«أنا طلقني مرة علشان سمع ابني الصغير بيقول يابن الكلب والخناقة كانت وراء مين علمه الكلمة دي وهو بيقولها كل يوم قدامه»، أما آيات تقول: «ساب البيت ومشي علشان قلتله نقلي البطاطس وخلي بالك من البنت وكاني شتمته».

 

و«شيماء. ع» قالت: «كان بيعد باكت البامبرز بالواحدة ويكون يوم مش فايت لو نقصت واحدة، مش عارفة همنع البنت تعمل حمام يعني».

 

أما «ماهيتاب. م» قالت: «طلبت شماسة العربية عشان المشوار كبير والشمس حرقتني، نزلني من العربية وراح البيت اخد هدومه وراح لأهله والحمد لله اطلقنا».

 

ومن جانبها قالت «سارة. س»:  «اشتكاني لأهله علشان اكلنا وراك فرخة انا وابنه علي مدار يومين، وأني خلصت ٢ نسكافية وهو نايم».  

 

«اسراء.ه» قالت: «نجيب ورقة وقلم ونكتب مرة علشان رميت أمامة بيسبي ٢ ليتر فاضية علشان بيجمعهم ويملهم مياه، ومرة كنت بروق الشقة وكانت مليانة كراكيب فلقيت 25 علبة بلاستيك صغيرة فاضية علب مكملات غذائية فرميتهم وكانت ليلة سودا، وانا بعمل رميت كل الكراكيب بتاعته ورميتها وحدة علقة موت فيها، رجالة هم والله».

 

أما منى، فقالت: «عشان مبرضاش احط شطة علي المحشي، ومرضتش امسح البلكونة الساعة ٢ بالليل، وعشان القميص الفيروزي مش مكوي وكل القمصان التانية مكوية، علشان سرقت أربعة بيضات علي الفطار ليا ولبنته علشان برمي الرز اللي في اخر الحلة، علشان حطيت معلقة لحمة مفرومة على صلصة المكرونة».

 

أما غادة، فتقول:  «كان ليلة سودة لما حلق دقنه وقلتله حلو بس بالدقن احلى ازاي أقوله كدا وأنه مش عجبني»، أما هند فجوزها اتخانق معاها علشان حاطة المساحة في الحمام الجردل مش عايزة في الحمام وعايزة في المطبخ زي مامته بتعمل، ديانا قالت: «علشان

طلبت منه يجبلي ماسكرا»