في 12 نقطة إزاي تزود ثقتك بنفسك ؟

1-ركز علي نفسك وتطويرها .. إبعد عن المقارنة .. أول لما تقارن نفسك بغيرك,  في ثانية تانك رصيدك ثقتك بيصفر ..القرار في إيدك . 

 

2-تخيل نفسك دايما زي ما بتحلم .. وقفتك البادي لانجويش بتاعتك ( كتافك مفرودة وظهرك مشدود ) الوقفة بتفرق أيوووه ..   كلم نفسك دايما بإيجابية .. قول لنفسك إنك  إنسان عظيم ربنا خلقه عشان يحقق رسالة خاصة بيه هو وحده .. الحقيقة ديه مخيفة, بس حقيقة.. بصمتك مالهاش زي, وعملك اللي مفروض تسيبه في الدنيا عشان ينور للي جايين من بعدك مش شبه أي حد سبقك ولا أي حد حيجي بعدك .. 

 

3- إتحرر ..إمشي جوه حلمك ..خد خطوة ولو صغيرة كل يوم  .. جرب كتير ..كل خطوة, معاها رصيد ثقتك بيزيد .. 

 

 

4-الفشل جزء من التجرية ..إتمرن علي الفشل .. طالما قررت تنجح  .. المشكلة في بلدنا إننا بنزهق بسرعة جدا .. وقعنا مرة إتنين, نركن علي جنب.. خليك مقاتل, ما يستسلمش إلا لو معدش موجود علي الأرض . 

 

 

5-حط حدود .. إتعلم تقول ( لا ) ..مساحتك الشخصية حقك, واللي يتعداها, ضروري بلطف أو بحسم توقفه .. 

 

 

6- إزاي إنت شايف نفسك في مرايتك, ده حق من حقوقك  ..ماتسمحش لحد يتعداك, يتريق عليك, علي خطوة جديدة لك هو شايفاها من وجهة نظره, ملهاش لازمة.. هو أصلا ماله, خليك مركز علي خطواتك عشان تنجح وتتعلم وتبني حياتك ..اللي بيحبك حينتقد شخصك بينك وبينه بس .. عمره ما حينتقدك في الشارع ..

 

 

7- إعمل إنعكاس  دايما ( سيلف ريفلكشن ) علي كل تجربة بتاخدها .. الورقة والقلم أو النوتس في موبايلك خليهم صحابك الدايمين .. إقسم الورقة  5 أنصاف  ..

 إستفدت كذا .. 

غلطت في كذا ..

 إتعلمت كذا ..

 حأطور نفسي في نقطة كذا تحديدا .. 

إزاي  حأعمل التطوير ده (خطوات مرقمة عملية )  ؟ 

عن (إزاي ) إسـأل, دور في جوجل, شوف تجارب السابقين إتعلم منها, وابني تجربتك المتفردة .. 

 

 

8-حب نفسك بلا شروط .. متحبهاش حب مشروط بإنك تبقي ناجح مثلا .. 

إنت مش أهلك لو كانوا سجنوك جوه سجن إنك بتحب نفسك بس, لما تنجح .. وتكرهها وتلعنها لما تفشل .. زي ما كانوا زمان بيعملوا معاك لما تنقص نص درجة أو تجيب مجموع مش زي ما طلبوا منك .. إنت مش هما مع كامل إحترامنا لهم وتقدرينا لكل حاجة عملوها عشانك حسب وجهة نظرهم .. إنت إتولدت متميز, فيك نفخة من روح الله .. عارف يعني إيه ؟ يعني العظمة جواك .. دور عليها ..دور جوه نفسك علي رأي أحمد مكي .. 

 

9-دلع نفسك .. بص في مرايتك وقولها إسم تدلع نفسك بيه .. إكتب في ورقة مميزاتك وعيوبك ..تقبل عيوبك .. كل بني البشر فيهم مميزات زي ما فيهم عيوب .. بعد ما حبيتها وحضنتها حضن دافي, يالا كل سنة حتضيف لقايمة مميزات سعادتك, ميزة جديدة .. وحتسيب أوتقلل شوية من عيوبك .. راقب نفسك زي ما إتفقنا .. 

 

10-ساعد الناس, لما تلاقي نفسك في مشكلة أو مسجون جوه نفسك .. الثقة مش حاجة ثابتة, رصيدها أوقات بيقل لما تقل ممارستك للأفعال السابقة اللي بتزودها والعكس بالعكس .. لما تحس إنك تانكك فاضي, سااااعد, سااااعد, سااااعد قد ما تقدر .. ساعد كل اللي حواليك من غير ما تنتظر مقابل .. إعذر الناس .. إقبلهم بعيوبهم ..المساعدة سعادة بحجد مالهاش حدود ..وبتخللي التانك يفوووول في كل مساعدة علي فكرة  ..

 

11-حط لنفسك أهداف تقدر تحققها .. لو حلمك كبير, ضروي تقسمه لخطوات أصغر فأصغر فأصغر.. إصبر وإطمن, حلمك رزقك وحتاخده طالما بدأت أول خطواته .. يالا كمل .. 

 

12-إتدرب علي الرفض عادي ..تقبلك للشعور بالرفض جزء من التجربة, كل ما تعتاده, كل ما ثقتك بنفسك حتزيد ويزيد إعتمادك علي الله وعليها وبس .. 

 

عادي إنك لما تبتدي حاجة جديدة ممكن تلاقي كل اللي حواليك رافضينها .. عادي إنك لو  إنت لوحدك لك رؤية معينة من زاوية معنية, إن محدش غيرك إنت يشوفها فطبيعي علي ما الناس تتعود وتفهمك حتاخد وقت, الوقت ده صعب جدا..كسوشيال ميديا ممكن ماتلاقيش (بمنظور قياسها ) ولا (لايك واحدة ) .. وكحياة حقيقية, ممكن تلاقي كل اللي حواليك شايفين اللي بتعمله ملوش لازمة .. 

 

 إتدرب كتير وركز علي تخيلك لحلمك خلاله كتير .. بص عليه في خيالك, شوف نفسك وإنت بتحققه, صقف لها كل لما تاخد خطوة .. وخليه في ودانك موسيقتك اللي بتحبها .. وقلبك مركز بس مع ربك اللي وهبك شجاعة تنفيذك لحلمك ..