"امشى دوغرى ومستقيم زي السعف "..تعليمات البابا تواضروس فى عظة أحد الشعانين

"السعف اللى فى ايدينا بيعلمنا حاجات كتير" هكذا قال البابا تواضروس الثانى بابا الإسكندرية بطريرك الكرازة المرقسية ،  اليوم فى عظة أحد الشعانين ، التى أطلقها من كنيسة السيدة العذراء مريم والقديسة مارينا بالساحل الشمالى.

 

أضاف البابا : "قلب السعف أبيض ولازم يكون قلبنا أبيض ،أوعى تخلى قلبك مليان بالأفكارالوحشة أو الخطايا ،خليه نقى وخلى قلبك زي قلب الطفل ،اللي بيحب كل الناس ، القلب اللي قدام الله "قلبا نقيا أخلق فيا يا الله " وماسكين السعف اللى قلبه أبيض".

 

وقال البابا: "ستجد في قلب السعف خطوطا مستقيمة وده معناه ان الواحد لازم يسير مستقيم  "دوغرى" يعنى غير ملتوي السعف فيها خطوط مستقيمة ليسلك الانسان حياة مستقيمة،وملمس السعف ناعم زي الشمع يعلمك ازاي تكون رحيم ، وطول فترة الصوم بنرتل " طوبى للرحماء على المساكين خلى الرحمة تحل عليهم والمسيح يرحمهم في يوم الدين ويحل بروح قدسه فيهم ،  وبنصلي طول الصيام إن الرحمة تحل عليهم لأن في إنسان قلبه نشف لأن الخطية بتشق القلب والعقل في حين إن الرحمة لما تملأ القلب تجعله رحيماً ويصنع سلاماً عقل رحيم لا يخاصم  وقلب لا يخاصم فالأطفال علمونا البساطة".