بعد هزيمة الزمالك.. عمرو أديب: دي لعنة ..أنا مركب دعامة وفي آخر حياتي

أعرب الإعلامى عمرو أديب، عن استيائه الشديد، بعد الهزيمة الثقيلة التى منى بها فريق الزمالك أمامه نظيره الأهلى، بثلاثية نظيفة خلال المباراة التى جمعتهما مساء اليوم، الإثنين، باستاد القاهرة، فى ختام منافسات الدور الأول لبطولة الدورى العام. 

 

وقال "أديب" ببرنامجه "كل يوم" المذاع عبر فضائية "ON E"، :" إنها نفس المباراة التى أشاهدها منذ 50 عامًا، نفس المعلقين اللى أغلبهم أهلاوية، ونفس التعليقات، لكن ما أغضبنى الهزيمة المرة 3/0 أو 6/1..الزمالك لم يفز على الأهلى منذ 2007 .. حدث ثورتين ومليون حرب والإخوان مشيوا والدنيا اتغيرت، وعملنا 100 كوبرى، وتفريعة قناة السويس، ومظاهرات إيران ولكن الزمالك لم ينجح فى الفوز على الأهلى"، معقباً : "دى لعنة..أمى دعت عليا وقالت روحى يا ابنى يارب تبقى زمكاوى..أشياء كثيرة تغلبت عليها فى حياتى.. كنت تخين خسيت..إلا الزمالك..هل فيه فريق فى الدنيا لديه الحظ المهبب ده.. لا تغيروا المدرب ولا العيبة..غيرونا احنا غيروا الجمهور لنستريح ..اللى بيتعمل فى الزمالك دا حرام .. الظاهر الغريبة إنك كزملكاوى تتغلب ومتفتحش بوقك ".

 

وأضاف: "المرار مش بيشربوا غير الزملكاوية .. دا حرام ومش عدل، والواحد المفروض أنه يبل ريقه عشان يعرف إنه على حق لبعض الوقت.. بس على طول ضرب ضرب .. هو مفيش حاجة تانى؟".

 

وواصل غاضبًا: " تعبنا بقا فيه إيه!..أنا بجد مش فاهم، النادى متبهدل، وأكيد فيه سبب وفيه حاجة غلط.. إنه نادى غريب والعيب مش فى النادى  ولا الإدارة ولا اللاعبين.. العيب فيا أنى مُصر  ومتعذب..أنا إنسان محب للحياة وفى آخر حياتى ومركب دعامة .. خلاص مش ناقص كمان مجدى عبد الغنى يقتحم المحطة ويقول لى بعد الهدف الثالث  - لسه كمان - .. دا اسمه تحرش"، متوجهًا بالتهنئة للنادى الاهلى على الأداء والنتيجة.