في ذكرى وفاته.. صوت الأمة تنشر تسجيلا نادرا للفنان أحمد راتب: "أنا لست كوميديان"

بعد مرور عام على وفاة الفنان الراحل أحمد راتب، في مثل هذا اليوم، تنفرد "صوت الامة" بنشر تسجيل صوتي نادر له، من حوار تم تسجيله مع الصحفي الكبير الراحل يوسف خليفة في عام 1999.

كشف أحمد راتب، في حواره عن سبب ابتعاده عن الكوميديا وعدم استمراره في تقديم هذه النوعية من الأدوار.

بحسب التسجيل، وجه يوسف خليفة سؤالاً لراتب، يقول: هل ظلمت عندما صنفت في بداية حياتك الفنية بنجم كوميديا؟

جاء رد راتب: "لا ده أولا عشان تبقى عارف نجم الكوميديا دى كلمة غالية جدًا وأرقى أنواع التمثيل الكوميدي، وأنا لما ظهرت قالو كوميدي، ولكن في سببين خلونى مستمرتش، الأول إن الكوميديا لها سحرها وإذا اندمج فيه الفنان يتسرق عمره، يقولك ايه ده سكينة الكوميديا سرقته، لأنها خطيرة، تخيل إن انت بودنك تسمع ضحكة الناس العالية في المسرح، لها سحر لا يمكن حد يفلت من أثره ميقدرش يفلت منه نظرة الناس للكوميديان في الشارع".

وأضاف: "لكن هناك أدوار عظيمة جدا جدا أنا كنت هتحرم منها لو فضلت أمثل كوميدي، بس فاهم قصدي، لو أنا أصريت أمثل كوميدي لأن في ناس بتعمل ده، بس أنا مرضتش أصادر على نفسي وكل اللى جوايا لأنه عايزه يطلع في كل المجالات، وأنا مثلت الشرير والطيب والغني والقوي والفقير، كل دى أدوار كنت هتحرم منها لو كنت حطيت نفسي كوميديان بس دى حاجه".

يتابع: "ده شيء أنا عمله بمزاجى وشيء كمان معمول مش بمزاجي، وهو إن نوع الكوميديا اللي أنا بمثلها وخاصة الكوميديا المصورة اللي هي سينما وتلفزيون دى بتدخل جوه العين بتجيب خلجات الوش، فلو في لحظة إنت مفتعل هيبان والكوميديان يبقى دمه تقيل أوى لو أفتعل الكوميديا".

الفنان أحمد راتب أثناء حواره مع الصحفى يوسف خليفة

وأضاف: "نرجع بقي للنص الكوميديا المكتوب، أين النص الكوميديا الذي يصيغ كوميديا حقيقية بمواقف حقيقية بشخصيات تتصرف هذا التصرف بالظبط فتضحك منها دونما افتعال ودونما قصد، فين المؤلف اللي بيكتب ده، من النادر أما يقع في إيدي نص زي كده وبسرعة أجرى أقدمه".