البنزين جنب النار في الغربية.. والأهالي يستغيثون (صور)

 أصاب الخوف والقلق أهالي قرية سبرباي التابعة لمركز طنطا محافظة الغربية لتلاصق إحدى الكافتيريات ببنزينة مما أدى إلى استيائهم، مطالبين المسئولين بسرعة التحرك قبل وقوع أي كارثة. 

 

 

وقال "ابراهيم عبدالعزيز" أحد سكان المنطقة: إزاي تم الموافقة على مزاولة نشاط زي ده جنب بنزينة، أي تسريب ممكن يقلب البلد جحيم هما المسئولين الناس مش فارقة معاهم ولا أيه. 

 

وقالت "منال زين الدين": "إحدى سكان قرية سبرباي: الكافتيريا مكانها بصراحة غريب دا قدم كلية الشريعة والدراسات الإسلامية ومعظم اللي بيدخلوها بتوع التوكتوك والخارجين عن القانون،  دا طبعا غير الخوف من اندلاع اي حريق بالمنطقة سوء عن طريق الرياح او خناقة بين روادها". 

 

 

وقال "إبراهيم مصطفى": سائق توكتوك انا بمون وأروح أشيش في الكافتيرية دي فيها ايه يعني مدام الراجل معاه تصريح تبقى مش خطر زي ما الناس بتقول. 

 

 

وقال "أحمد عبد العزيز"، أحد رواد الكافتيريا: بصراحة أنا بقعد هناك على طول والنصبة بتاعت الشيشة ملاصقة للبنزينة بس أنا هعمل ايه يعني إذا كان المسئولين ساكتين وصاحب الكافتيريا شكله واصل وأنا مالي. 

 

 

وعلى الجانب الآخر قال العميد ايهاب عبد الحميد مدير وحدة الحماية المدنية بالغربية، إن من شروط الترخيص لأي منشأة، أن يخضع لاشتراطات الحماية المدنية لوضع الشروط الأزمة للتأمين المكان وأي مكان يعمل مخالفة لذلك يضع نفسه تحت طائلة القانون فأي مخالفة تستوجب الغرامة التي تصل لـ 10 آلاف جنيه وسنتين سجن.