قرض الفقراء وأصحاب المعاشات

التسعين.. بيعملوا ستين..

ده مش كلامى.. ده كلام مدير البنك.. تحديدا مدير بنك ناصر – القاهرة قصر النيل.. منعا.. للتأويل... يعنى لو عاوز ستين ألف بضمان المعاش عشان تجهز بنتك وتسترها.. القرض هيكون على أربع سنوات.. بفوايد 11.7% فوايد سنوية طبعا.. متركبة وراكبها ستين عفريت... ولأنك صاحب معاش ومعدى الستين ع الأقل.. ومحدش يعرف إمتى هييجى الأجل..عشان البنك يضمن فلوسه.. لو انتقلت للرفيق الأعلى.. عمل وثيقة تأمين إجبارية.. لا ترد بحوالى ثمانية آلاف جنيه بالإضافة إلى حوالى ألف جنيه مصروفات إدارية يعنى الستين تقريبا كده يوصلوا خمسين ألف... إيه.. هتنهب.. احمد ربنا إنك بتاخد معاش... وقرض ع المعاش..

 هو فين المعاش.. القسط وصل 1800 جنيه شهريا.. والباقى منه... ما يأكلش عيش حاف...

 احمد ربنا على كال حال...

 طب مين اللى بياخد فلوس وثيقة التأمين.. لما أسدد القرض بعد أربع سنين.. وأكون لسه على قيد الحياة بإذن الله... مين اللى بياخد فلوس وثيقة التأمين.. البنك.. ولا شركة التأمين؟..

 وهتفرق معاك إيه؟

 هو الأستاذ البدرى فرغلى نقيب الفقراء والمساكين راح فين.. ده إحنا من غيره.. تايهين!

 هى القروض دى فيه وزيرة مسئولة عنها..

 يا ترى.. هى فين؟ وهى مين؟

كرسى الحكومة

 يعنى إيه هاسيب الكرسى يا عبدالعال؟

 لا يا باشا.. كرسى إيه اللى سعادتك تسيبه...

 طب أعمل إيه لو سبت الوزارة.. آخد الكرسى معايا وأنا ماشى..

 إذا كان ع الكرسى.. ممكن نشترى واحد زيه بالظبط.

 إنت بتهزر...

 أنا.. باتكلم جد يا باشا. 

 ده.. كرسى الوزارة.. كرسى الحكومة يا عبدالعال.. عارف يعنى إيه كرسى الحكومة...

 لا يا أفندم.. ما أنا عمرى ما قعدت عليه.. هاعرفه إزاي.

 عينك عليه يا عبدالعال..

 ده الكرسى الوحيد اللى ما أتمناش أقعد عليه..

 إيه؟

 يا أفندم ما تفهمنيش غلط.. كرسى سعادتك مش دايم.. لكن الكرسى بتاعى.. محدش بيطمع فيه.. عشان كده.. أنا متمسك بيه..

 يا ابن الإيه... تيجى نبدل الكراسى! يا عبدالعال؟

 من ديوان آه يا بلد – 1997

شهادة فقر

 محكمة.

 ووقفت بهية.

 طالبة نفقة.

 والقضية؟!!

 الجدع ابن الذوات...

 اللى ياما باس قدمها....

 واللى مد فى اسمه.. منها...

 بالولد... قبل البنات....

 الجدع.. ابن الذوات...

 بالشطارة...

 جاب شهادة...

 وإثباتات....

 إنه أفقر م الغفير....

 عمره ما كان.. مليونير....

 قدم البيه الكبير.... 

 شهادة... فقره!!!

 صرخت بهية.

 إيه.. القضية؟!! 

 الجدع ابن الذوات.

 جاب شهادة وإثباتات...

 صرخت بهية.

 فقرنا.. مش محتاج شهادات...

 حتى.. وإحنا.. مليونيرات....

 خرجت بهية.

 شايلة أوراق القضية !!!!.

 والشهادة....

 فقر... فيه ختم السيادة...

 نسر... ده؟

 وألا.. فأر... بالشهادة؟!

رأي

لماذا لا يتم الطلاق أمام القاضى من خلال مستندات رسمية، وتتم تسوية النفقة والمسكن.. وكل ما يوفر حياة كريمة للأولاد.. بدلا من ملايين القضايا التى تسفر عن أطفال شوارع.. وأمهات معيلة تملؤها المواجع.. وآباء لا يخشون عدالة ولا قضاء.. بعد أن اختفى الخجل.. وتوارى الحياء عند كثير من الآباء!