فرحانين ليه بالوصول لكأس العالم؟.. أنا أقولك

عادي جدا أن يصل منتخب كبير بحجم مصر لكأس العالم، خاصة أن المنتخبات التي تصل إلى الحدث الأهم عالميا 32 منتخبا، وعلى مدار السنوات العشر الماضية، كان تصنيف منتخب الساجدين يتراوح بين العاشر والثلاثين، خاصة بعد حصوله على كأس الأمم الإفريقية ثلاث مرات متتالية أعوام 2006 و2008 و2010.

 

طيب ليه الهيصة دي يا جدعان؟ أنا أقولك علشان لو سألت نفسك السؤاله ده، الناس مش فرحانة علشان مصر وصلت كأس العالم تاني، على قد ما هي فرحانة إننا وصلنا أصلا، لأن فيه 65 مليون مواطن دلوقتي ما كانوش موجودين سنة 90، يعني ما شافوش مصر أصلا في كأس العالم.

 

طيب ليه الناس عاملة فرح على الإنترنت، أنا برده أقولك، علشان الإنترنت سنة 90 كان حلم أو خيال، وكان بس مقتصر على الشركات الكبيرة في أوروبا وأمريكا، وكان الناس وقتها بتستخدم حاجة اسمها التلكس علشان يبعتوا بيه لبعض الأوراق والبيانات. أيوا التلكس ما تستغربش، ده حتى يا أخي الفاكس نفسه اللي انقرض كان اختراع حديث، أه انت أصلا مش عارف إيه هو الفاكس، هو ماكينة كدا لو بعت بيها ورقة لحد في الإسكندرية توصله نسخة منها، أنت متخيل.

 

كمان ولو سمحت ما تضحكش، ما كانش فيه حاجة اسمها الموبايل، وكان الكل بيعتمد في تواصله مع الناس على تليفون البيت، والناس اللي كانت بتحب تتكلم كتير أو بتروش، كان بيبقى معاها كارت ميناتل ممكن تتكلم من الشارع- بعض الماكينات موجودة دلوقتي في عدد من محطات المترو والشوارع.

 

المترو نفسه كان 8 محطات والتذكرة كانت بربع جنيه، أيوة ربع جنيه، ده كان رقم يا مؤمن ساعتها وتقدر تديه لابنك وهو رايح المدرسة من غير ما يرميه في وشك.

 

وقتها كمان الدولار كان قيمته 85 قرش، دلوقتي يا مؤمن الدولار وصل لـ18 جنيه، وجرام الدهب عيار 24 كان تمنه 14 جنيه يعني بسعر ساندويتش شاورمه كايزر من عند سمسمه، دلوقتي تمن جرام الدهب 740 جنيه.

 

كان فيه صندوق كدا تحط الفيشة في الكهرباء تلاقي فيه بقدرة قادر 3 قنوات، الأولى والتانية والتالتة، ولو اشتريت إريال بيلف طبعا مش هتعرف يعني إيه بيلف، تلاقي فيه كمان قناتين ولا حاجة، دلوقتي تقدر في شاشة k HDR 4 تشوف آلاف القنوات.

 

كل الناس اللي نزلت الشوارع وقعدت تحتفل بعد مباراة مصر والكونغو في 6 أكتوبر والتجمع الأول والخامس وكل المدن الجديدة، حضرتك المدن دي كانت صحرا، وعبده البقال اللي بتقف عنده ده مش من سنين كتير ولا حاجة، ده لسه جاي، صحيح قبل أنت ما تتولد، علشان انت أصلا لسه مولود.

 

يا أخي أنت متخيل إن كوبري أكتوبر كان آخره في غمرة، مش عارف غمرة، اللي قبل رمسيس دي على طول.

 

أنا عارف إنك عارف رمسيس طيب إنت عارف إن سنة 90 ما كانش فيه دول اسمها أرمينيا ولا أذربيجان ولا روسيا البيضاء ولا استونيا ولا جورجيا ولا لاتفيا ولا أوكرانيا ولا قرغيزستان ولا مولدوفا ولا طاجكيستان ولا تركمانستان ولا اوزبكستان ولا صربيا ولا البوسنة والهرسك ولا الجبل الأسود ولا ناميبيا ولا جمهورية التشيك ولا سلوفاكيا ولا اريتريا ولا تيمور الشرقية ولا جنوب السودان. دا حتى ألمانيا كانت دولتين ألمانيا الشرقية والمانيا الغربية، واليمن كانت دولتين اليمن الشمالي واليمن الجنوبي.

 

الناس لما كانت تحب تقعد مع نفسها وتنسجم شوية كان فيه حاجة اسمها الووكمان، يووووه كان اختراع ساعتها، دلوقتي بقى فيسبوك وتويتر ويوتيوب وبلاوي زرقا.

 

طيب خد بقى الكبيرة، محمد صلاح نفسه ما كانش لسه اتولد.