زوجة حسام غالي تكشف كواليس الكابيتانو مع هدف محمد صلاح وأمنيته باللعب في المونديال

كشفت لميس أبو الفتوح زوجة حسام غالي لاعب النصر السعودى، عن كواليس الدقائق الحاسمة التى عاشها قائد الأهلي السابق، خلال المباراة المصيرية بين مصر والكونغو والتي حسمت تأهل الفراعنة لمونديال روسيا 2018 .

وقالت زوجة غالي عبر حسابها الشخصي علي فيس بوك "بقالى ١١ سنة اعرف حسام خبطت فينا الدنيا كتير واجهنا حاجات كتير وكبرنا وحلمنا مع بعض وتروح وتيجى الأحلام ويبقى حلم كاس العالم ليه الحلم أللى مابيتغيرش".

وتابعت "بالنسبة  للاعب كورة هى البطولة الأكبر و الأهم كان دايما يقولى يارب يكتب فى تاريخي انى روحت كاس العالم و تمر السنين بخيبات امال الصعود و يفضّل حلمه هو هو لحد ما بقى يا رب نروح كاس العالم وتبقى اخر بطوله ليا.. تخيلى يا لميس لو ختمتها كده يا سلام يكون ده بجد أحسن ختام".

وأضافت "كان بيحلم بشغف رهيب خلاه مش بس حلمه بقى حلمى أنا كمان انى اشوفه بيلعب فى كاس العالم.. لحد إمبارح أنا وهو بنتفرج على الحلم مع بعض فى التلفزيون الماتش بجد كان شعوره عظيم  مشاعر متقلبة صبر وترقب فى الشوط الاول بعدين فرحة الجول الرهيبه الحلم شكله هيتحقق ولا ايه؟  يارب هانت خلاص ثم جول التعادل بصينا لبعض وسكتنا وسط دقات قلب ورعب أعدنا ندعى لحد هوب ضربه جزاء جول الفوز فرحه اكبر و دموع... نزلت دموعنا احساس وشعور مايتحكيش لازم يتعاش فرحه كده من بتوع زمان الى مابقناش بنحس بيهم ، فرحه حسام امبارح بالمنتخب و بالانجاز الى حققه صحابه خلتنى افرح بيه اوى بس عز عليا اوى اوى ان حلمه يتحقق و هو مش فيه"...

وأنهت التدوينة قائلة "مش علشان جوزى والله وأكيد شهادتى مجروحه بس اتفقنا او اختلفنا على حسام فى عصبيته او حميته الزياده فى الملعب ماينفعش نختلف على ادائه و تحركاته او كونه قائد يعتمد عليه اى مدرب و هو مطمئن انه فى الملعب.. و لا أبدا نختلف ان بطوله زى دى اكيد نقصها بطل زى حسام غالى .".