مش كدهولاايه؟ (3)

بلغني ان شابين في عمر الزهور انتحرا وسجلا اسباب الانتحارهم على السوشيال ميديا انه بسبب حاله من الاكتئاب سيطرت عليهم ،، الغريب انهم  مرا بحالات اكتئاب مشابهة على فترات متباعده وان احدا لم يهتم بهما.

 

بصوا يا شباب الاكتئاب في جانب كبير منه بينتج عن خلل في حاجة في المخ اسمها النواقل العصبية (خلص المقالة دي واطلع علي يوتيوب واتعلم عنها اكتر) والخلل ده ممكن يكون بسبب وراثى وبذلك يكون عضوى او بسبب مواقف محزنه تعرضنا ليها المرض النفسى مرض عضوي اتعملت عليه ابحاث لعقود طويله وتأثيره النفسي بيجعلك مش قادر تستوعب تحديات الحياة وهنا وتتكون عند المريض النفسى الضعيف فكره الانتحار عشان يخلص من الحياه القاسيه فى نظره.

 

قول ورايا: جزء كبير من الاكتئاب له اسباب عضوية، تتعالج منها تبقي برنس. زي ما الجسم لاسباب وراثية في بعض الاحيان بيكون حصوات في الكلية او بيكون كولسترول في الشرايين. اللي مكتئب يروح لدكتور نفسي. دي مش نقص عقل، ده قمة العقل. 

 

وما تخافش من ان الناس تعرف. ولا يهمك من حد بالذات الجهلة الا هيقولولك اعمل زار واشرب مخدرات والكلام ده. 

 

انا كنت باخد دواء مهديء ومضاد للاكتئاب لغاية ست شهور فاتت، كتبه لي دكتور احمد عكاشة. واديني دخلت المرحلة البرنسية  بفضل الله.  وادي الناس عرفت، حصل ايه يعني؟

 

٩٠ بالمائة من الناس البرينسات اللي اعرفهم بيتابعوا مع طبيب نفسي. وبدل ما تموت منتحر، ظبط دماغك وعيش برنس. 

مشكدهولاايه؟