«البريف» فى رغيف

الراجل وزير خارجية قطر، راح كل حتة فى العالم، وزار عواصم يجى 30 دولة فى آخر 3 شهور، وما فكرش يزور أى من عواصم أهم 4 دول، المفروض يزورها ويتكلم معها، وهى عواصم الدول الأربع المقاطعة لقطر.. الشيخ عبدالله آل ثانى، أحد عقلاء العائلة المالكة فى قطر، زار السعودية، والتقى مع المسئولين وحل مشكلة الحجاج القطريين، لكن الآخ تميم ورجالته، فرضوا الحصار على الحجاج القطريين، ورفضوا يسيبوهم يحجوا.

 

الشيخ عبدالله آل ثانى، لما زار السعودية، قابله الناس بالترحاب اللائق به.. لأنه عاقل.. والعقل زينة.. أما المجانين، فعاملين زى الراجل وزير الخارجية القطرى كده، شعاره «من خف عقله.. تعبت رجليه».

 

عمال يلف يلف يلف.. والحصيلة صفر..a والنبى لو حد شافه يقول له كمل لف.. اوعى توقف. 

 

الدكتور مجدى يعقوب، الجراح العالمى، بيقول إيه.. بيقول إنه غير منزعج تماما ممن يتساءلون عن دخوله الجنة أو النار، نظرا للخدمات الطبية والضخمة، التى يقدمها للمرضى، والعلم أيضا، وتابع: «أنا مؤمن بالإنسانية وخدمتها ولا أنشغل بما يقال حول دخولى الجنة أو النار».

 

واحد صاحبنا كان بيحضر خطبة fة، والخطيب اكتشف اكتشافا مهما قاله للمصلين.. قال إيه؟.. قالك إن الدكتور مجدى يعقوب بيعمل كل اللى بيعمله ده علشان هو «يدس السم فى العسل»، وده جزء من النظرية الشهيرة «إن عدوك.. عدو دينك»، وبالتالى احنا نرحب بكل إخوانّا الإرهابيين اللى عمالين يفجروا فينا علشان على دينّا، والناس اللى بتعالج المرضى ببلاش زى الدكتور مجدى يعقوب لمجرد إنه مش على دينّا، يبقى لازم نتخانق معه. 

 

يا رب نجى مصر مننا يا رب.. يا رب ما تجعل نهايتها على إدينا يا رب. 

 

لا بد من توجيه الشكر لكل إخوانّا المستوردين اللى بيعنيهم مزاج المواطن المصرى، فقرروا أنهم يستوردوا من رومانيا شحنة قمح فيها خشخاش (أى المادة الخام للأفيون).. الناس دى حريصة على أن الشعب لازم ينبسط.. وقال إيه مباحث الجمارك وإدارة الحجر الزراعى، اكتشفت الموضوع.

 

طيب يعنى الواحد ما يعرفش ياكل ولا يتكيف فى البلد دى.

 

أنا باهزر طبعا.. التحية للقائمين على حماية موانينا ضد بلاوينا. 

 

الرئيس التونسى، مصر على أن المرأة التونسية، ترث زى الرجل بالضبط.. بعض النساء فرحانة، لا أنكر عليهن فرحتهن.. بس أنا عايزهم يركزوا فى التفاصيل.

 

أنتم عارفين أن هناك 4 حالات فقط ترث فيها المرأة نصف الرجل، وفقا للنص القرآنى، وأكثر من 30 حالة، ترث فيها المرأة مثل الرجل تماما، وهناك 10 حالات ترث فيها المرأة أكثر من الرجل، بالإضافة إلى أن هناك حالات ترث فيها المرأة، ولا يرث نظيرها من الرجال أصلا.

 

القرآن لم يظلم المرأة، الرجالة هم اللى ظالمين.

 

القضية بالنسبة لى أكبر من نسبة ميراث المرأة.. القضية إن فى أحيان كتيرة المرأة لا ترث أصلا، بسبب ظلم وعدوان الراجل عليها.

 

المسألة محتاجة دراسة ومساعدة المرأة على أن تحصل على حقها اللى ربنا كتبه لها.