وزير التموين لحملة الماجستير والدكتوراه: «اللي هيدي هياخد»

قال الدكتور على المصيلحى وزير التموين والتجارة الداخلية، إنه دون استمرار التعليم وبدون التطبيق العلمى الحقيقى لكل ما يتم تعليمه لن تكن هناك إضافة حقيقية، مضيفا: "اللى هيدى هياخد واللى مش هيعرف يدى لازم يتعلم يدى ازاى، وأحد وسائل العطاء هو العلم، وتعلم العلم وتعليمه ومعرفة طريقة التطبيق هى أهم من التعليم ذاته".

 

وأضاف المصيلحى، بكلمته خلال حفل تخرج الأكاديمية العربية للعلوم والتكنولوجيا والنقل البحرى دفعة 2017 لحاملى الماجستير والدكتوراه المهنية بكلية الدراسات العليا فرع القاهرة، "مشكلتنا عايزين حاجات كتير ولا نعلم طريقة عملها ومواجهة هذا الأمر من أصعب الأشياء ولو متعلمون حقا سنعرف مشكلتنا الحقيقية، مفيش حاجة اسمها نعمل اللى نقدر عليه لازم نتعلم نعمل اللى المفروض نعمله، ولو مش عارفين نسأل وبعد كده نعمله".

 

وأشار وزير التموين والتجارة الداخلية، إلى أن الممارسة العملية والتعليم والعلم ثم التجويد فى ذلك هو أهم ما يمكن الوصول إليه من خلال العملية التعليمية، ولن يتم ذلك إلا باستمرار العملية التعليمية، قائلا للخريجين:«متخافوش وطبقوا ما تعلمتوه  وتعلموا من أخطائكم فالخطأ تجربة قد تفيدك أكثر من عشرات التجارب الناجحة».