العفريت!
الأربعاء، 16 أغسطس 2017 10:00 ص
محمد الرفاعى يكتب:
* وماتت جنى.. الطفلة التى هزت صورتها فوق صدر والدها، أمام مستشفى 57357، مشاعر المصريين!! لكن دمها.. سيظل دائما.. فوق بوابة المستشفى!
* أرجو ألا يخرج علينا السيد الدكتور مدير المستشفى، ليعلن أن وفاة جنى مؤامرة ضد المستشفى، ومحاولة مكشوفة من الأعادى، عشان ياخدوه مقلب حرامية!
رحم الله جنى.. ورحم الإنسانية!
* للمرة الثالثة خلال ثمانية أشهر.. يخرج قطار أبوقير عن القضبان فى المعمورة!! والله عنده ذوق.. أهه يشوف المزز بالمايوهات غير الشرعية.. وبالمرة.. ياخدله غطس فى النار اللى إحنا فيها دى!
* حتى الآن.. لا حس ولا خبر.. عن حبيب العادلى الذى خطفته عفاريت عدلى علام!! مش واجب برضه الداخلية تسأل عليه؟! ده ماكانش عيش وملح يا زملا؟!
* من وزارة الداخلية إلى حبيب العادلى العفريت.. فين طريقك فين.. بيروحوله منين.. يا حبيب العين قلبك فين مش دارى.. يا قريب وبعيد.. شوقى لك بيزيد!!
* الحمد لله أن نقابة الإعلاميين - التى هى تحت التأسيس - ما كانتش موجودة أيام الأبيض والأسود، كانت حولت نص مذيعات مصر للنائب العام، بسبب الملابس غير المحتشمة طبقا لمواصفات النقابة!
* يا خوفى يا إخوانا.. للمذيعة تطلع بعد كدة.. بالبرقع.. والملس!
* يا ترى أخبار الخواجة كوبر إيه؟! حد يسأل عليه يا اخوانا لتكون الفته كتمت على مراوحه؟!
