خبط بالعقل.. هبوط في اقتصاد قطر.. الراسبون في الثانوية: أغلبنا شايل مواد لا تضاف للمجموع.. منه شلبي: الحياة فيها كتير غير الجواز.. طول عمرك بتحسي بينا: الداخلية تنقل المتهمين بأتوبيسات مكيفة

لو مجبتش هدوم في الصيف ده الاوكازيون هيبدأ 15-8
لو مجبتش هدوم في الصيف السنة دية عشان ارتفاع الأسعار.. الحل وصل.. اتحاد الغرف التجارية، قالت إن 15 أغسطس موعد الاوكازيون الصيفي وتخفيضات تصل لـ50%.. يعني لو بلوزة عجباكي وسعرها 500 جنيه هتجيبها بـ250.. مش وحش والله.. بس هل التجار هيعملوا كدة فعلا؟.

وهل يبقي في رقابة علي المحالات عشان ميستغلوش الزبون لامؤاخذة يعني؟..أكيد هيبقى في حل وأكيد هنعرف نشتري اللي معرفناش نشتريه.. هيص ورتب وحوش عشان تعرف هتشتري أيه وهتعمل أيه..عشان أكيد الصيف اللي جاي الأسعار هتبقى نار أكتر من كدة.. وهنسمع أرقام غريبة ميقدرش عاليها غير الشديد القوي.

طول عمرك بتحسي بينا..الداخلية تنقل المتهمين بأتوبيسات مكيفة بسبب الحرارة
مرة وحدة وبدون سابق إنذار.. الجو بقي شبه بلاد الخليج حر جدا وبتمشي في الشارع مش عارف تاخد نفسك لان مفيش هواء.. المهم بقي الشرطة المصرية عملت لفتة جميلة جدا.. وهي نقل المتهمين بأتوبيسات مكيفة عشان تحافظ علي أرواحهم من الحر وكده.. وبكده نقدر نقول وداعا سيارة الترحيلات اللي من غير تهوية وخالينا في الأتوبيسات المكيفة..تسلمي يا شرطة والله.

الحياة فيها كتير عشان نعيشه غير الجواز
هو ليه كل البنات والرجالة بتفكر في الجواز والخلفة والهم التقيل دة؟..عشان نعيش حياة مستقرة وفيها حب وحنان وعيال تشيلنا لما نكبر..مش دة اللي مفروض بيحصل؟-تقريبا- المهم بقي نشرت الفنانة منة شلبي حكمة علي صفحتها الرسمية «تويتر» بتقول: «الحياة فيها كتير عشان نعيشه غير الجواز» -بصراحة معاكي حق يا منة الحياة في خروج وفسح في الساحل، وهدوم واصحاب وأهل وعلاقتنا بربنا وحياتنا الشخصية وحاجات كتير أوي- غير فرخة هنطلعها من الفريزر عشان تفك ونطبخها مع ملوخية وعيل يرجع من المدرسة يستحمي ونزاكر وينام وراجل يجي يتحكم في حياتنا وتصرفتنا.. يسلم بقك يا منة والله.

الراسبون في الثانوية: أغلبنا شايل مواد لا تضاف للمجموع
بعبع الثانوية العامة وسنينة.. تخيل بقي نسبة الرسوب فيها كان 27% وعشان كده وقفة لطلاب الثانوية العامة الراسبون أمام وزارة التربية والتعليم..ومش كده وبس عشان تعرف أن منظومة التعليم عندنا في مصر مخلفة جدا.. الراسبون في الثانوية بيقولوا أيه بقي أغلبنا شايل مواد لا تضاف للمجموع..يعني مشيلين العيال الهام علي مواد مش هتدخل في المجموع..أنتم أزاي كده وبتفكروا أزاي بجد..ربنا معاكم ويجلكم حقكم..بس برضوا كان لازم تذاكروا شوية عيب أوي لما تشيلوا مواد خارج المجموع..مش كده ولا أيه؟.

هبوط في اقتصاد قطر والقطريون يدفعون الثمن
هبوط في اقتصاد قطر يؤثر بشكل بشع علي أهل البلد اللي هما القطريون.. بص بقي يا سيدي وأنتي يا سيتي منك ليها وله..القطريون يجنون «الشوك» من زرع «تميم» الشيطاني.. المعارضة القطرية: الأسعار زادت عشر أضعاف والاستثمارات تهرب خارج الدوحة.. خالد الهيل: رئيس الوزراء الحالي كان شرطي مرور.. ونائب: تكلفة شحن السلع زادت بشكل غير طبيعي.