خبط بالعقل..الشيخة "موزة" القطة هتاكل عيالها.. كوبر مدرب "فتة".. 2030 مصر الأقوى اقتصاديا.. لية لازم نتستني المصيبة؟

البرلمان يوافق على زيادة المعاشات 15% بحد أدنى 130 جنيها

وصل وصل وصل وبعد طول أنتظار البرلمان يوافق على زيادة المعاشات 15% بحد أدنى 130 جنيها..يانهار أسود يعني الناس كانت مستنيه الزيادة عشان في الأخر تقولي15%..يعني انا لو بقبض معاش 1000 جنية  هيبقي 1150 جنية..بس الفايدة إيه بقي ان البرلمان تدخل في الموضوع يعني هنحس بالأمان..أقعدوا بالعافية..

في حلول 2030 مصر ستصبح الأقوى اقتصاديا

الاستثمار في مستقبل مشترك..يعني أيه؟ وفين؟..دة بقي كان  خلال فعاليات القمة التى تنظمها الرئاسة الألمانية لمجموعة العشرين للشراكة مع أفريقيا  تحت شعار «الاستثمار فى مستقبل مشترك» ببرلين..وأكدوا خلاله أن مصر تتمتع بروابط تاريخية وعلاقات قوية مع الدول الأفريقية.. والسيسي قال فيه إن مصر تؤيد المبادرة التى أطلقتها ألمانيا لجذب الاستثمارات لأفريقيا وكمان  رؤية مصر تضعها بين أقوى الاقتصاديات بحلول عام 2030..يعني هانت والحمد الله كلها 13 سنة وهنبقي اقتصادنا قوي بس مين اللي هيحس بدة يا سيادة الرئيس مش احنا دة اولادنا واحفدنا إحنا دخلنا في بوق الزجاجة لا عارفين نخرج ولا ندخل مزنوقين ومش لاقيين.

مرتضى منصور: كوبر مدرب "فتة"
مرتضي منصور ما ادراك من هو؟.. المهم يا سيدي طبعا كلنا شوفنا إعلان شركة الاتصالات الجديد إللي كان فيه المدرب "كوبر"  اللي جاله فيه تسمم بعد ما اكل الفتة.. وعشان احنا شعب ابن نكتة قرر مرتضي منصور يمسك الفتة  ذلة لكوبر.. ويقولك انها السبب في خسارة المنتخب الوطني في تونس.. انا اللي اعرف ان لازم تبقي روحنا رياضية ويوم هنكسب ويوم هنخسر..بي اللي اكيد ان الفتة مش السبب يا سيدي الفاضل الحظ هو من يلعب دور كبير في هذا وتوفيق ربنا هو الأساس..الفتة ملهاش دعوة..

التعليم:هزمنا شاومينج ومفيش تسريبات
وبعد طول انتظار.. نجاح وزارة التربية والتعليم في هزيمة عفريت "شاومينج"..التعليم طلعت بيان بتقول فيه هزمنا شاومينج ومفيش تسريب..يعني الوزارة حاسة انها  أول مرة تنتصر أول مرة تنجح..بردوا احساس النجاح حلو وعشان كدة لازم تنجحوا الطلاب ومتجلهمش امتحانات ميقدرش عليها غير الشديد القوي..مش كدة ولا ايه..أخيرا ربنا معاكم يا طلاب الثانوية العامة..

بعد كارثة البرج المائل.. محافظ الإسكندرية: يطلب بيان عاجل بالمباني المخالفة

لازم المصيبة تحصل عشان نفوق..دة دور بقي كل المسئولين في الدولة..مبيعرفوش يمنعوا حدوث المشاكل لا أبدا لازم تحصل مصيبة وأوراح تتعرض للموت أو تموت بالفعل عشان يتحركوا..سمعتوا عن البرج المائل اللي في الاسكندرية صح؟.. بعد البروبجندا عليه محافظ الإسكندرية طلب بيان عاجل بالمباني المخالفة..ولكم التعليق أيها القراء..

"موزة" تدرس الإطاحة بابنها "تميم" لإنقاذ الأسرة الحاكمة فى قطر
الأم أم والله بتبقي عوزة تحمي أولادها من الضرر لكن الشيخة موزة أم أه ولكن للسلطة وللدولة وليست للأبناء..مفاجأة "موزة" تدرس الإطاحة بابنها "تميم" لإنقاذ الأسرة الحاكمة فى قطر..بس خلاص..

نصائح سحرية للقضاء على رائحة فمك فى نهار رمضان
نصيحة علي الماشي..لو انت صايم وريحة بقك وحشة ومحرج..هنقولك الحل..بص بقي يا سيدي.. اشرب كمية كافية من السوائل زي العرقسوس فى الفطار والسحور..عدم التعرض للشمس قدر المستطاع لأنها تفقد الجسم رطوبته.. تجنب تناول الثوم والبصل والبهارات فى الفطار والسحور.. تنظيف الأسنان جيداً بالفرشاة والمعجون ثم بالمضمضة بعد الوجبات.. ابتعد عن المجهود البدنى الزائد وتناول المسكنات والتدخين قدر المستطاع.. ضبط مستوى السكر فى الدم عن طريق الأكلات الطبيعية والأدوية..أقعدوا بالعافية.