خبط بالعقل.. العزاء واجب وعشان كدا ابن مبارك راح للمشير طنطاوي في وفاة أخوه.. بمناسبة الحر الفظيع فوطة وكرتونة أهم تقاليع المصريين لحمايتهم من الحر.. قطر اتمنعت سفنها من البحر الأحمر ومقدمهاش غير القناة

ابن مبارك يقدم واجب العزاء في شقيق المشير طنطاوي

طب والله عندهم أصل.. دا فيه عيش وملح يجي أكتر من 30 سنة.. طبعا كلنا عارفيين إن أخو المشير طنطاوي توفي.. وطبعا كان لازم أولاد  الرئيس السابق يروحوا.. وده اللي حصل.. بس ابن مبارك بقى قدم العزاء بالنيابة عن باباه وطلب من المشير أنه يتقبل العزاء.. وقاله كمان اعذروه انه مجاش.. وطنطاوى يسأل عن أحوال مبارك وينقل له أمنياته بالشفاء ودوام الصحة.. بس خلاص..

فوطة وكرتونة أبرز أسلحة المصريين لمواجهة ارتفاع درجات الحرارة

نار يا حبيبي نار.. في ظل الصيام ومع ارتفاع درجات حرارة الطقس.. تحس إن الصيام والحر دونت ميكس.. في النهار والناس ماشية في الشارع بقي وكدة والشمس طالعة وسخنة أوي المصريين طول عمرهم بيبهروا العالم باللي بيعملوه وباللي بيخترعوه.. وبناء على ده إيه اللي حصل.. تلاقي فوطة وكرتونة ودوسيه هم  أبرز أسلحة المصريين لمواجهة ارتفاع درجات الحرارة.. شعب  جبار والله..

موانئ البحر الأحمر تنفذ قرار بمنع دخول سفن قطر والسماح فقط بعبور القناة

الحرب لسة مخلصتش يا قطر.. والنعمة لا هنور يحي العرب اللي انتي محسوبة عليهم هتعمل فيكي إيه.. موانئ البحر الأحمر تنفذ قرار بمنع دخول سفن قطر والسماح فقط بعبور القناة.. يعني لا بر ولا بحر ولا حتى هواء.. خليكي يا قطر في الأوف سايد..

للتخلص من الضغط النفسي في رمضان نام كويس

نصيحة علي الماشي.. الضغط النفسي واللي بيعمله فينا في رمضان.. هنتصرف فيه إزاي؟.. أنا هقولك بص يا سيدي.. وجبة السحور لازم يكون فيها السكريات.. وكمان اشرب ماء كافى بقدر 2 لتر لأن نقصه يقلل كفاءة الجسم والحركة.. الحفاظ على عدد ساعات النوم يوميا اللي هي 7 ساعات.. تغيير عادات تناول القهوة والمنبهات لتأثيرها على الجهاز العصبى.. الحفاظ على النشاط البدنى لتنظيمه الدورة الدموية في الجسم.. المشى قبل الإفطار لأنه يغذي المخ ويزيد هرمونات السعادة.. برنامج تدريبي عند بداية الشعور بالضغط من خلال العد العكسي من 20 لـ 1.