خبط بالعقل.. 5 يونيو مبقتش نكسة مصر دي وكسة «قطر».. وزير الخارجية القطري بيقول عاوزين يقسموا قطر لـ «أوضتين وصالة»..السيسي أول رئيس يحذر من إرهاب قطر.. أشهر معارض قطري يبشر بفقدان نظام «تميم» شرعيته

قطع العلاقات الدبلوماسية  مع قطر

الدولة حبت تحتفل معانا بأنتصار حرب أكتوبر أصلنا أنهاردة 10 رمضان.. والصدفة بقي إننا أنهاردة بردو 5 يونيو إللي هي النكسة.. الدولة بقي عملت إيه عشان تشعرنا بالسعادة وكدة.. ‫الإمارات والسعودية والبحرين ومصر واليمن قرروا يقطعوا  العلاقات الدبلوماسية مع قطر..طب دة معناه إيه بقي؟.. إن قطر كدة خسرت الحدود البرية الوحيدة لدولتها وهي الحدود القطرية السعودية ودة هيتسبب في خنق مواطنيها.. وبالمناسبة دية نحب نوضح إن فيه غضب عربي موحد تحت القيادة المصرية.. ونقدر نقول كمان مصر يا دولة ما تهزك ريح.. تحيا مصر ورئيسها وجشها.

‏توفير فرص عمل لـ300 ألف عامل مصري بقطر

لما يبقي عندنا نسبة بطالة عالية ونلاقي وزيرة الهجرة بتقول إن في  300 ألف عامل مصري بقطر ونستطيع توفير فرص عمل لهم.. منين هنوفرلهم فرص عمل منين مش لما تلاقوا للي في مصر تبقي توفروا للي جاي من برة مصر.. ولا دي كمان في عقدة الخواجة إللي عاش برة البلد.

وزير الخارجية القطري: يريدون تقسيم قطر

لما تبقي قطر أصغر دولة في الوطن العربي وإحتمال كمان في العالم ونلاقي وزير الخارجية القطري بيقول  يريدون تقسيم قطر.. هنقسم إيه «بلا وكسة».. دي قطر كلها متجيش غرفيتن وصالة وأقولك على حاجة كمان اللي يعرف يقسمها حتى نصين من غير ما يعور إيده حلال عليه.. كده بقى خلصانة بشياكة.

السيسي أول رئيس يحذر من إرهاب قطر

أه يا سيسي يا فهمهم وحارق دمهم.. من يجي أسبوعين كدة خلال القمة السعودية الأمريكية قال الرئيس المصري: إن الإرهابى ليس من يقتل فقط بل من يمول ويحتضن أيضا.. وده معناه إن السيسي أول رئيس دولة يحذر من إرهاب قطر والدول الراعية للتطرف.. وبكده ارفع رأسك فوق أنت مصري.

أشهر معارض قطري يبشر بفقدان نظام تميم القطري شرعيته

المعارضة القطرية بصراحة تعرف ربنا ومش منحازة لحد علي حساب حد هي ماشية مع الحق.. خالد الهيل أشهر معارضى النظام القطرى بيبشرنا وبيقول انتظروا مفاجأة كبرى يوم 12 يونيو لأن  نظام «تميم» فقد شرعيته وقطع العلاقات مصيبة والمواطن القطري مش هيعرف يعدى الحدود دلوقتى.. إزاي الحال؟ يعني نقدر نقول إن نظام «تميم» هنخلص منه أخيرا.. عمتا يسمع من بوقك ربنا.

أبعد عن الأكل الدسم في السحور وخاليك في الزبادي والفول والخضروات

نصيحة علي الماشي..عشان متتعبش في الصيام الأساس هو السحور الصحي الجيد.. من الآخر كده ابعد عن المخللات والأطعمة الغنية بالأملاح كالبطاطس المصنعة الغنية بالتوابل والملح، الأطعمة المحفوظة مثل الهامبورجر فهى غنية بالصوديوم وتسبب تلف خلايا بالمخ، المشروبات الغازية لأنها تزيد من مستوى الضغط، الأطعمة الدسمة والغنية بالدهون التي تعمل على انسداد الشرايين، وعليك تناول الزبادي والفول والخضروات في وجبة السحور وذلك للحصول على توازن جيد في الصحة وأثناء ساعات الصيام.. أقعدوا بالعافية.