خبط بالعقل.. حبيب العادلي هرب «هنادي فين يا اماي».. الأسعار هترجع زي زمان؟.. «في المشمش».. اتبرع ولو بمسلسل.. الله يرحمه كان طول عمره on line

  1** فين حبيب العادلي؟.... هنادي وين يا أمي؟؟

 

جددت نيابة وسط القاهرة الكلية، بإشراف المستشار سمير حسن، المحامى العام الأول للنيابات، طلبها للأجهزة الأمنية بقطاع تنفيذ الأحكام، بسرعة القبض على اللواء حبيب العادلى، وزير الداخلية الأسبق، لتنفيذ الحكم الصادر عن محكمة جنايات القاهرة ضده بالسجن المشدد 7 سنوات فى قضية "الاستيلاء على المال العام".

 

فيما كشفت مصادر مطلعة، أنه بصدور حكم محكمة الجنايات ضد اللواء حبيب العادلى، وزير الداخلية الاسبق، تسقط جميع التدابير الاحترازية، ومن بينها الإقامة الجبرية المقررة من قبل المحكمة فى وقت سابق.

 

انتم عارفين الراجل ده والناس اللي معه المفروض يردوا كام للدولة؟ 

195 مليون جنيه... 

راح يا اخواتي راح.. 

 

2 ** اللهم لا حسد، تعدت ميزانية دراما رمضان لهذا العام حاجز الـ3 مليارات جنيه، أكبر أجر لنجم النجوم 46 مليون جنيه، وأقل واحد فيهم بياخد 10 ميلون، وهما كلهم على بعض 10 نجوم كبار، وفي نفس الوقت اللي أنت بتتفرج فيه علي المسلسل أبو ملايين ده، هتلاقي إعلان هيفصلك، وينسيك الفلل والقصور والعربيات الفخمة، والديكورات اللي بالشيء الفلاني واللبس اللي بيبرق وكل ده، وتلاقي اللي بيقولك اتبرع ولو بجنيه، لإنقاذ طفل مريض، قلب أو سرطان أو محروق أو للغلابة، اللي في الأماكن العشوائية "حس بيا يحس بيك ربنا".

هي النجوم إلي بتاخد ملايين ديه، ما بتتفرجش على التلفيزيون؟ طيب ما يتبرعوا كل سنة بجزء صغير من من أجرهم في المسلسل، يعني هنلم في السنة شوية ملايين نقدر نساعد بيها الناس اللي محتاجه دي ويقل عدد الأطفال المرضي والناس الغلابية اللي بيوجعوا قلوبنا وهم بيقولوا "أتبرع ولو بجنيه عشان تنقذوا حياتي".

 

3 * إذن ورآها إن..مش كده ولا ايه؟ هو ماسبيرو هيتهيكل عشان يوفروا الأجور.. ولا هيطلعوا العاملين فيه معاش مبكر.. ولا هما ناويين علي ايه بالضبط.. أصل فيه خبر بيقول إن فيه مكافآت للعاملين بماسبيرو بمبلغ مليار و41 مليون جنيه من إجمالي موازنة الأجور وده في العالم الجديد 2017/2018.. امال الخسائر بتاعت السنة الي فاتت جات منين؟ احنا السنة اللي فاتت خسرنا الـ4 مليار و611 مليون جنيه؟ ازاي ندي مكافئات مليار ونخسر 4 مليار ونصف؟ منين.. آه يا دماغي... أكيد فيه حد بيكدب علينا أو حد مش فاهم أصلا...  دعوة مننا لينا "أنقذوا ماسبيرو".

 

4 * أقول دي «بشرة خير» ولا أقول «في المشمش»، هذا هو حالي لما سمعت كلام محافظ البنك المركزي أن الأسعار ستعود كما كانت بس مش دلوقتي ولكن في 2018.. يعني هنقدر نشتري لحمة وفراخ بلدي ومش متلجة، والياميش، أصله لازم الياميش بتاع رمضان عشان محدش يقول حاجة، دة حتي الكهرباء هتقل يعني هنشغل التكيف في الصيف والدفاية في الشتاء، من غير خوف علي الفاتورة، الله يكرم أصلك يا سيادة المحافظ ريحتنا وطمنت قلوبا والله بس لو اللي انت قلته ده ما حصلتش، نعمل ايييييه؟ 

احنا معاك واللي خلانا نستحمل 3 سنين أكيد هيخلينا نستحمل 6 شهور كمان.

يا رب ما تجعل نهايتنا على ايديهم يا رب... 

 

5 * «سد النهضة» يا "سد النهضة" يا اللي جايب لمصر كلها الخضة.. نفس المشكلة الي متحلتش من سنيتين وأكتر.. "سد النهضة" إللي بيقولوا انه هيعطشنا وهيشردنا .. الجانب الإثيوبي خلال الإجتماع ال14 حول "سد النهضة" تعنت ولم يتخذ مواقف مرنة بشأن مفاوضات اللجنة الثلاثية، وهو الاتفاق على فترة مناسبة لملء بحيرة السد للتقليل من الآثار السلبية لانخفاض حصة مصر السنوية من مياه النيل، والاتفاق على آلية تشاور حول إدارة السد، ومراعاة حاجة مـصـر والسودان للمياه..لازم الجهات المسئولة تتدخل عشان تحل الأزمة. ولازم الحكومة الاثيوبية الشقيقة تعرف ان المصريين لو عطشوا، هيبقى وضع تاني خااااالص... 

وكما قال الشاعر: ارضنا العطشانة نرويها بدمانا... 

 

6* أدي السوشيال ميديا وبلاويها.. قطع أحبال الود في الموت والحياة، فاكر زمان لما كنا بنتجمع يوم الجمعة ونفطر مع بعض الفول والطعمية، والبطاطس عشان  بس نشوف بعض ونحكي ونقول إللي جوانا، كانت أيام حلوة والله، ده حتي الموت اللي كنا بنتجمع في العزاء بقي عن طريق  الفيس بوك وتويتر والواتس أب، وبيبدا البوست اللي مكتوب علي السوشيال ميديا باذكروا محاسن مواتكم و«اسم المرحوم ووصفه ببعض الكلمات».. الله يرحمه كان دائماً online،  عمره في حياته ما عمل Block لأحد.. ولا عمره أزعج أحد ب comment، ده كان  دائما  بيعمل share للأغنياء وTag للفقراء والمحتاجين.. الله يرحمه مات وهو فاتح الـ facebook.. وللإعلان عن العزاء ..للأقارب فقط يستمر تقبّل التعازي على الـ whatsapp لغاية بكرة بالليل.. يا نهار أسود علي التكنولوجيا والي عملته فينا العزاء علي النت.. 

سلام أنا خلصت وهاعمل log out  بقى... 

 

7**امال احنا بنتعلم ليه؟ 

اسكتوا مش احنا بنتعلم في الفسحاية، واتضح اننا كلنا بنتنافس على ازاي نخلص الجامعة بسرعة علشان نقعد على القهوة براحتنا.  

وزير التعليم الدكتور طارق شوقي قال إن الشباب فى سن 20 إلى 25 سنة كانوا بيمثلوا 20% من إجمالى البطالة حتى عام 2014، لكن هذه النسبة ارتفعت إلى 33% خلال عام 2015، ما يعنى أنها فى تزايد مستمر، لدرجة أن أصحاب الشهادات العليا أصبح نسبة بطالتهم أعلى من غير المتعلمين.

يعني من الآخر احنا بنعلم أولادنا في الجامعة علشان يقعد على القهوة بقيمته كده، وهو منفوخ ومعه شهادة قد الدنيا

اقعدوا بالعافية...