5 مواد لتنظيف المنزل.. تعرفي عليها

تلجأ اغلب السيدات الي المركبات الكيميائية لتنظيف المنزل والتخلص من الأتربة، ولكن تحتاج إلى بعض المكونات الطبيعية التي تساعد في تنظيف المنزل، لعدم التعرض بالإصابة بخشونة اليد، لذك قدمت خبيرة التجميل والصحة رشا شلباية 6 طرق طبيعية ومنها:

1- الليمون:
– ممكن تستخدميه لتنضيف الميكروويف هتضيفي 3 معالق كبيرة عصير ليمون ل400 ملل مية وتحطيهم في طبق وتحطيه في الميكروويف وتشغليه وتسيبيه عشر دقايق هينضف الميكروويف كله من جوه.

– ممكن تنضفي الحنفيات المجيرة من اثار بقع الصابون بانك تفركيها بعصير الليمون, وممكن تنضفي بيه بلاط الحمام والمطبخ بنفس الطريقة.

– ممكن كمان تستخدمي الليمون انك تفركي بيه الاسماك واللحوم والفراخ وبعدين تشطفيها بالمية العادية الطريقة دي هتخلصك من الريحة الزفرة اللي بتبقى فيهم.

2- الخل:
– ممكن تضيفي معلقة كبيرة خل للتر مية وحطي الخليط ده في ازازة ببخاخ ونضفي بيها المرايات والشبابيك.

– لتنضيف أرضيات الحمام رشي الخل على الارضية وسيبيه عشر دقايق وبعدين اغسليه بمية نضيفة.

– ممكن تنضفي الأحواض وصفاية الحوض والدش بالخل السخن، سخني الخل وهاتي قماشة بليها كلها كويس بالخل وحطيها على الصفاية او لفيها على الدش وسيبيها نص ساعة وبعدين شيليها واغسلي المكان بمياه نضيفة، والحوض رشي عليه الخل وافركيه بفرشة هتلاقيه نضف.

3- الملح:
– عشان تطهري فوط المطبخ اواي سفنجة بتستخدميها للتنضيف انقعيهم في مية وملح وسيبيهم فترة وبعدين اغسليهم بمية عادية.

– عشان تتخلصي من الروايح الكريهة في التلاجة قبل ما تنضفيها حطي شوية ملح على السفن اب المياة الغازية العادية اللي احنا بنشربها وامسحي بيه التلاجة من بره ومن جوه.

4- المياه الغازية:
– لو عندك اي طاسة محروقة اغلي فيها كمية من الكوكاكولا او البيبسي هتشيل اي اثار من الطاسة وهترجعها كأنها جديدة.

– كمان بيشيل الصدا من اي حاجة في البيت بليفة افركي مكان الصدا بالكوكاكولا او البيبسي هتلاقي الصدا راح منها.

– البلاعات المسدودة صبي فيها كوكاكولا او بيبسي وسيبيها طول الليل هتلاقيها اتسلكت.

5- معجون الأسنان:
– حطي كمية من معجون السنان على قماشة ونضفي بيها اي فضة عندك حتى لو قديمة اوي هترجع تلمع تاني.

– معجون الأسنان فعال جدا في التخلص من بقع الحبر، والمكياج، بقع الدهون والزيوت، وبقع القهوة والشاي من على السجاد, حطي المعجون على اي بقعة عندك وسيبيه عشر دقايق وبعدين اغسليه.

– دائما عندنا مشكلة على الترابيزات الخشب لما بنحط عليها الكوبايات بتعمل علامة ومش بنعرف نتخلص منها لكن معجون السنان -هيخلصك منها بسهولة افركي العلامات دي بقماشة ناعمة عليها معجون سنان هتلاقيها اختفت.

– لو عندك علامات حبر او بقع على الحيطان افركيها بمعجون السنان هتطلع معاكي بسهولة.

6- البطاطس النية:
– افركي الشبابيك بشريحة بطاطس نية وبعدين امسحيها بقماشة ناشفة ونضيفة.

– لو عندك لوحات مرسومة عايزة تنضفيها قطعي 2 ثمرة بطاطس وحطيهم في اربعة لتر مية وسخنيهم مع بعض وسيبي المية دي في مكان دافي لمدة 24 ساعة وبعدين امسحي بيها اللوحات بتاعتك وبعدين امسحيها بسفنجة بمية نضيفة.