وكيل لجنة النقل لـ «السيسي»: مصر تحتاج «حكومة حرب»

أكد النائب محمد عبدالله زين، عضو مجلس النواب، ووكيل لجنة النقل والمواصلات، إن مصر فى حاجة ملحة لاختيار «حكومة حرب»، مشددا أنه على الدولة أن تشعر المواطن أنها تقف بجواره وأنه ليس من يدفع ثمن فاتورة الإصلاح وحده، مشيرا إلى أن البرلمان بدأ يكشر عن أنيابه لحكومة المهندس شريف إسماعيل.

وقال زين، فى تصريحات خاصة لـ «صوت الأمة»، «إحنا رافعين طلب لرئيس مجلس النواب عشان نلتقى برئيس الجمهورية ونطلعه على الأمر الداخلىـ وإحنا موجودين في الشارع والناس طافحة الدم والأسعار مرتفعة والمحليات سيئة، ولازم نخلى المواطن ميحسش أنه بيتعذب وهو اللى بيدفع الثمن لوحده وهو الضحية، ويجب تطبيق القانون على الكبير والصغير، إحنا فى الفترة دى محتاجين يا حكومة حرب مهمتها إنقاذ الدولة فى الفترة دي، أو حكومة سياسية لكن حكومة تكنوقراط لا يجوز فى هذه الفترة».

وأضاف وكيل لجنة النقل: «الحكومة قاعدة تحطلى نظريات على الورق والناس مش هتستحمل ده ولا مستوعبة كده، وزي ما إحنا عاوزين الناس تتحمل لازم نحسسهم إن ليهم مستقبل واللي حصل في الجلسة النهاردة هنلاقي إن المجلس بدأ يكشر عن أنيابه وإحنا كان عندنا 3 وزارء لو أنا مكانهم مش هخرج من المجلس غير وأنا مقدم استقالتي أقسم بالله».

وتابع: «فى بعض الناس كانت بتنزل دوائرهم تتحذف بالطوب.. والناس مش فاهمة دور المجلس الحقيقي ولازم نراعي الناس الغلابة، دول الدرع الواقي في أي أزمة واللي هيحموا البلد، والغلابة دول اللي شايلين الذل وهما اللي ابنهم بيحارب في سيناء والطبيب وغيره ولكن الأغنياء فى أى أزمة هنلاقيهم خدوا الطيارة وسافرو».