«احمد عز» والإغراء يطاردان منة فضالى على «السوشيال ميديا»

ردت الفنانة منة فضالي على صفحتها الشخصية بموقع التواصل الاجتماعي «فيس بوك»، ضد ما تتعرض له من هجوم عدد كبير من رواد مواقع التواصل الاجتماعى، بسبب ملابسها التى ظهرت خلالها فى اول اعمالها، والتى وصفها البعض بمشاهد الإغراء وكذلك لمساندتها الفنان احمد عز فى قضيته ض الفنانة زينة،وقالت «فضالي»: «مساء الخير عليكم، أنا منة اللي بكتب دلوقتي وكنت عاوزة أسأل ليه بتهاجموني؟ ليه بتغلطوا فيّا وبتشتموا ليه؟ عملتلكم إيه علشان الإهانات دي كلها؟ أنا مش بجبركم على إنكم تحبوني أو تتقبّلوني لأن دي حرية شخصية وممكن ببساطة متدخلوش صفحتي مدام مش حبّني، بس مفتكرش إن في أي استفادة من الغلط».

وتابعت: «كمان عاوزة أقول حاجة، لو حد منكم واخد موقف منّي بسبب صور لي زمان فأكيد عندكم حق، بس أنا مش كده واتكلمت في الموضوع ده كتير أوي، وأكيد لو أنا كده مش هيكون للنشر لأن بكده بخسر كل حاجة، وصدقوني أنا اتظلمت والله اللي عايز يصدق يصدق، ومش بقول كده علشان حاجة بالعكس، أنا خسرت حاجات كتير أوي، بس صدقوني مش عيب الإنسان يغلط ويتعلم من غلطه، بدليل إني عمري ما عملت فيلم أو مسلسل لابسة فيه لبس وحش، أو عملت مشاهد إغراء».

واستطردت: «حاجة أخيرة، اللي واخد موقف مني وبتشتموني علشان وقوفي جنب أحمد عز، فبقولكم ليه علشان إيه واخدين موقف؟ أنا حرة زي ما أي حد حر، وأنا دافعت عنه لأني أعرفه كويس مش أكتر، وبعتبره صديق وأخ زي ما أنتم بتحبوا زينة ومن حقكم تدافعوا عنها، لأن في حاجة اسمها حرية الرأي، أنا عاملة الصفحة دي علشانكم إنتم، علشان تعرفوا أخباري وتتفاعلوا معايا وتشجعوني، مش علشان تهاجموني، أنا ممكن أقفل الصفحة لو أنا مضايقاكم أوفّر عليكم الغلط فيّا، أهلًا بيكم وآسفة إني طوّلت عليكم، وأشكر كل الناس اللي واقفة جنبي وبتشجعني، وأشكر برضه اللي بيغلطوا ومتمناش إن حد في يوم يغلط في حد من أهله، أشكركم من كل قلبي».