هجمة مرتدة

• رمضان صبحي.. أراك تليق أكثر بمانشيستر يونايتد، ولكن اثبت أولا أنك الرجل الأول في ستوك سيتي وتليق بالدوري الانجليزي.

• أحمد فتحي.. لا يخدعك لقب الجوكر، أصلا الجوكر في الكوتشينة ملوش لازمة، الكومي أجدع منه بكتير.

• أحمد حجازي.. أفضل مدافع في مصر هذا الموسم بلا جدال، من شكك في قدراتك عقب عودتك من أوروبا خسر كثيرا، ولولا تكرار إصابتك لانتقلت لأندية أكبر من فيورنتينا.

• أحمد الشناوي.. "بص هو أنا لغاية اللحظة دي وبالرغم من التقارير اللي بتتنشر مش قادر أصدق انك مطلوب في تشيلسي، خاصة مع وجود كورتوا هناك، بعدين معتقدش ان كونتي شافك بتلعب الفترة اللي فاتت من ساعة لما تشيلسي تعاقد معاه، وإلا كان طلب جنش، بس ممكن أصدق انك تروح الأهلي".

• محمد حلمي.. "العب دائما وكأنها مباراتك الأخيرة، أحسن منك ومشي، المهم الزمالك يكون في أفضل حالاته، وده واضح لغاية دلوقت".

• محمود كهربا.. "أعرف جيدا انك من أطيب الناس وعندك نقاء داخلي، ركز في الكورة أكتر وهتوصل للنادي اللي نفسك تلعب فيه في المستقبل، المهم بدايتك مع اتحاد جدة تكون قوية".

• نادر شوقي.. "بعيدا عن انك صديقي وشهادتي فيك أكيد مجروحة، لكن أنت فعلا أنجح وكلاء اللاعبين في مصر ولمساتك واضحة جدا في العروض المقدمة للاعبين في الدوري المحلي، وأرجوك متكونش نهاية علاقتك برمضان مجرد انه يمضي عقد في ستوك، وأنا عارف ان كابوس عمرو زكي يطاردك يوميا، وبعد 10 سنين أنا متأكد ان شاء الله انك هتحقق حلمك مع رمضان صبحي".