نهى العمروسى لصناع الدراما والسينما:ليه بقينا ماسكين السكاكين لبعض زى البلطجية؟

وجهت الفنانة نهى العمروسي, رسالة لصناع الدراما المصرية عبر صفحتها الشخصية بموقع« فيسبوك»، انتقدت فيها حالة تربص بعض الفنانين على مواقع التواصل الاجتماعى بالأعمال الأخرى الغير مشاركين فيها .

وكتبت «العمروسي» : «زمايلى صناع الدراما والسنيما فيه ظاهرة مش لطيفة بقالها فترة وبتزيد يوم عن يوم خصوصاً في موسم الدراما الرمصانى , فيه حالة تربص على السوشال ميديا , لو حد بيشتغل في مسلسل يطلع القطط الفاطسة في المسلسلات التانية , و تلقيح كلام على تريقة على تطاول , مع إننا المفروض نقدر مجهود بعض وحتى لو فيه غلطات أو مناطق ضعف أو مستوي العمل مش عظيم بس أكيد فيه عناصر أبدعت , ليه بقينا ماسكين السكاكين لبعض وقاعدين لبعض على الواحدة زينا زى البلطجية ؟ , أنا مش باعمم , أكيد مش كلنا بنعمل كدة بس بصراحة الموضوع زاد أوى واستوقفنى كذا مرة».

وأضافت «إحنا فنانين ياخواننا , والفنان لازم يكون حساس فوق العادة وإنسان فوق العادة , وعنده قدر من الأخلاق , دة غير آداب المهنة إللى المفروض نلتزم بيها».