غلوشيات رمضانية #18 رمضان.. يكتبها عبدالله غلوش: انضمام «الغندور» لقناة سعيد حساسين.. اصدق مثال لمقولة ما جمع إلا اما وفق.. مأمون وشركاه.. هذا العمل لا يمت للواقع بصلة وأحداث المسلسل من تخاريف المؤلف

#١٨رمضان

- لو بتقرأ الكلام ده، ولسه منزلتش علي بروفايلك البوست بتاع "من باب الاحتياط والموضوع بجد مش هزار والأكاونت الوهمي"، اعرف ان لسه فيك أمل.
- مسلسل احمد حلمي ودنيا سمير غانم الاذاعي "مين معايا".. المعني الحرفي لكلمة سبوبة.
- ليالي الحلمية ٦.. كل ما تتفرج علي تتر المسلسل وتسمع جملة "ليه يا زمان مسبتناش
أبرياء.. وواخدنا ليه في طريق مامنوش رجوع"، تحس ان سيد حجاب كاتبها مخصوص للي قرر يعمل الجزء السادس للمسلسل.
- ليالي الحلمية ٦.. مشكلة المسلسل مالهاش علاقة بالسيناريو، زي ما لها علاقة بالاخراج والانتاج.
- ليالي الحلمية ٦.. مجدي ابوعميرة محاولش يشغل نفسه في اي وسيلة اخراجية ولو بسيطة تربط الناس بين الجزء الجديد والاجزاء اللي قبل كده، واعتقد لو تامر محسن او محمد ياسين هما اللي بيخرجوا الجزء ده، كانوا ممكن يعملوا الحكاية دي بسهولة.
- ليالي الحلمية ٦.. المسلسل لو بنفس السيناريو بتاعه وبنفس ابطاله ولكن باسم مختلف، كان ممكن ينجح ويسمع مع الناس اكتر من كده.
- ليالي الحلمية ٦.. صفاء حجازي رئيسة اتحاد الاذاعة والتليفزيون من الناس اللي ساهمت بشكل كبير في الدعاية السلبية للجزء الجديد لما عملت مؤتمر صحفي قبل رمضان اعلنت فيه انها مش هاتعرض الجزء السادس وانها هتعمل حلقات مجمعة للاجزاء الخمسة اللي فاتت، عشان تعرف الناس الفرق.
- ليالي الحلمية ٦.. اكبر ازمات المسلسل ان الناس اللي تابعوا الاجزاء الخمسة اللي فاتت، لما جت تتفرج علي الجزء الجديد ملقتش نفس الشخصيات اللي ارتبطت بيهم الاجزاء اللي فاتت، ولقت شوية ممثلين جدادماينفعش يتقارنوا بالفخراني والسعدني وسيدعبدالكريم، اما الجيل الجديد اللي مشفش الاجزاء اللي فاتت مكنش فارق معاهم يشوفوا جزء جديد من مسلسل معندهمش خلفية عنه.
- ليالي الحلمية ٦.. رغم كل ده ورغم اني شايف ان المسلسل متقدم علي طريقة معظم مسلسلات محمود شميس اللي بعتبره سبكي الدراما، لكن مقدرش انكر انه في النهاية بيتشاف اكتر من مسلسلات كتير زي كلمة سر والمغني وشهادة ميلاد ويوميات زوجة مفروسة.
- الخانكة.. زي ما النهار وقفت برنامج ريهام سعيد، سبحان الله رئيس القناة اللي شغاله فيها ميريهان حسين قرر يوقف برنامجها ويعرض مكانه مسلسل هندي مدبلج.
- الخانكة.. كل اللي واحشه الاستاذ حسين رياض، في ممثل سوري اسمه بسام علي، هتلاقيه بيمثل بنفس طريقته بالظبط. الخانكة.. ايهاب فهمي خرج من عباية حنان ترك أخيرا.
- مأمون وشركاه.. هذا العمل غير حقيقي غير منطقي ولا يمت للواقع بصلة والاحداث الوارده في المسلسل هي من قبيل تخاريف صيام المؤلف.
- الطبال.. من اكتر المسلسلات اللي اتظلمت بفكرة العرض الحصري واتظلمت بعرضها علي ontv تحديدا.
- الارخم من اعلان عبور لاند لاحمد فتحي وحسن الرداد، اعلان كومباوند محمد ابوالعينين الجديد " كليوباترا بالاس" بتاع
موظف الـ sales اللي بيشرح علي الماكيت.
- اعلان orange صايم في مارينا.. الافضل في حملة اكرم حسني واحمد فهمي ولو إني مش فاهم حتي الان ايه لازمة الفرقة بتاعة من المدفع للمدفع وليه لابسين تركواز مش اورانج.
- فوق مستوي الشبهات.. حاجة تزعل لما مسلسل يبقي حلو ومخرج
كبير زي هاني خليفة تقع منه غلطات اخراجية تافهه زي اغنية " حرمت احبك" الي اشتغلت رغم ان سيد رجب كان لسه بيكتب اسمها علي موبايله.
- بنسبة كبيرة، الاهلي بطل الدوري رسميا، بكره ان شاء الله.
- ياسمين كساب افضل وجه نسائي في "الاسطورة" بعد روجينا وفردوس عبدالحميد
، حتي الان.
- لو عايز تضيع من وقتك نص ساعة كل يوم في حاجة مالهاش اي لازمة.. ممكن تتفرج علي برنامج "المرايا" علي روتانا والفضائية المصرية وصدي البلد. - النهار.. حلو انك تعمل موقع مشاهدة خاص بيك زي شاهد ويوتيوب، بس الاحلي انك تروج له صح ومن بدري مش تفاجئ
الناس بيه.
- زواج صفاء الطوخي ومحمد مرزبان "سقوط حر" وانضمام خالد الغندور لقناة سعيد حساسين.. اصدق مثال لمقولة ما جمع الا اما وفق.
- شخصية قرني اللي بيعملها بيومي فؤاد في بنات سوبرمان، كفيلة انها تخرجك من اي مود اكتئاب عايش فيه. - افراح القبة.. سوسن بدر ماتت محروقة، دينا الشربيني اتطلقت، رانيا يوسف انتحرت هي وابنها، احمد السعدني اخد اعدام، معرفش كل ده ايه علاقته بإن مصر انتصرت علي اسرائيل في اكتوبر ٧٣.
- افراح القبة.. طب احنا ممكن نتجاوز عن فكرة ان محمد الشرنوبي يعرف تاريخ امه وابوه من قبل ما يتولد عادي
، لكن يعرف قصص باقي ابطال وشخصيات المسلسل ازاي؟
- افراح القبة.. هو الممثل اللي بيعمل دور البطل الرئيسي في مسرحيات سرحان الهلالي، مالوش نفس نعرض قصته ونضيع حلقتين تلاته فيها هو كمان ولا ايه؟
- البوم تامر.. الالبوم حلو وواضح ان تامر كان مركز فيه عن كل البوماته
اللي فاتت.
- البوم تامر.. اغنية كان في واحدة، من افضل اغاني الالبوم.
- البوم تامر.. تعليقات جمهور تامر من امبارح علي سالم الهندي حسستني انه النسخة الرجالي من يسرا في فوق مستوي الشبهات. - البوم تامر.. مش فاهم يعني ايه روتانا تسرب الالبوم، وايه اللي يثبت المعلومة دي، وايه اللي هاتستفيده الشركة لما تسربه.. معتقدش في شركة عايزه تخسر ومعتقدش ان اول البوم لتامر بعد انفصال عمرو دياب عن الشركة، كان سالم الهندي او غيره مخططين انهم يدمروه.
- جراند اوتيل.. سنه بعد الاخري تامر حبيب بيثبت انه واحد من افضل الكتاب
اللي بيعملوا مسلسلات سهلة وبسيطة ومسلية.
- وعد.. لما قصة المسلسل مسروقة من مسلسل " العشق الممنوع"، مي عز الدين كاتبه علي التتر ان المسلسل فكرتها علي أي اساس؟ - بالمناسبة، مفيش في مصر كاتب سيناريو واحد، عنده قدرة مؤلفي المسلسلات التركية علي عمل مسلسلات من١٠٠ و٢٠٠ حلقة من غير ما تحس بالملل والزهق والمط الغير مبرر.
- سقوط حر.. الحاجة الوحيدة الي ممكن تخرج بيها في حلقة النهاردة، ان احمد وفيق مسجل اسم اخوه علي الموبايل سعيد اخويا بالعربي ومسجل اسم صفاء الطوخي tant seham بالانجليزي.
- سقوط حر.. معنديش مانع احمد وفيق يستحمي في كل حلقة.. الراجل نضيف ومن حقه، بس يبقي في تجديد مرة شامبو مرة صابون مرة شاور جيل.. لكن افتح الدش واقف تحته واضيع ٣ دقايق كل حلقة كده في الفراغ، مايصحش كده.
- اختر الاجابة الصحيحة ما بين الاقواس.. اسطورة الحديد في مصر من وجهة نظرك (عز - ابوهشيمة - ناصر الدسوقي)؟

- اي صحفي او اعلامي يتكلم في قضية او يفتح ملف يزعل ناس مهمة، تطلعه مصيبة فجأة.. احمد فهمي "الميزان". - الغربه تربه، لو اتدفنت فيها محدش هايحس بيك.. امير كرارة "الطبال".

- انا مسئول عن اللي بقوله، مش علي اللي بتفهميه.. تامر حسني " بطلة العالم في النكد".
- كلمة لكل الخنافس، هل من منافس؟.. علي ربيع متقمصا شخصية محمد رمضان " صد رد".
- الست متقبلش واحدة تشاركها في بال جوزها، فما بالك لو هتشاركها في سريره؟.. سحر الصايغ "يونس ولد فضة".
- ربنا يرحمك يا أمي ويرحم امهاتنا جميعا ويخلي امهاتكم يارب.