«شاطئ النخيل» يبتلع المواطنين بالإسكندرية.. لقب بـ «شاطئ الموت» لكثرة حوادث الغرق.. «عبد الرحمن ضرغام» آخر ضحاياه.. فرق الإنقاذ تكتفي بالمشاهدة.. وهاشتاج ينادي بإغلاقه

«شاطئ النخيل» يبتلع المواطنين بالإسكندرية.. لقب بـ «شاطئ الموت» لكثرة حوادث الغرق.. «عبد الرحمن ضرغام» آخر ضحاياه.. فرق الإنقاذ تكتفي بالمشاهدة.. وهاشتاج ينادي بإغلاقه.. برلماني يتقدم بطلب احاطة لوزير الداخلية

شاطئ النخيل بالإسكندرية أطلق عليه عدد من المواطنين بالمحافظة شاطئ الموت، لكثرة حوادث الغرق التي شهدها الشاطئ خلال الفترة الأخيرة، كان آخرها غرق الطالب عبد الرحمن ضرغام، طالب بكلية الهندسة جامعة كينج ماريوط، في 23 مايو الماضي ولم يعثر على جثته حتى الأن.

ياسر الكومي، أحد أصدقاء عبدالرحمن ضرغام، قال إنه على الرغم من وجود خدمة إنقاذ بالشاطئ، إلا أنه لم يتحرك أحد لإنقاذ عبد الرحمن لولا تدخل العديد من النساء على الشاطئ، ورغم وجود لانش إنقاذ.

وتابع: "نزلوا بعدها بأكثر من نصف ساعة ومن يومها حتى الآن لم نستطيع أن نحصل على جثة صديقنا عبد الرحمن منذ 23 مايو الماضي"،

وأضاف "الكومي"، "كنّا في الشاليه بتاع واحد صاحبنا في العجمي، بعد كده نزلنا شاطئ النخيل والموج كان عالي شوية والمياه بمستوى جيد ثم جاء موج عالي وسحب عبد الرحمن ثم يوسف وسحبني، كل اللي فاكره في اللحظة دي إن إحنا التلاتة بنغرق والناس قالوا إن العمق ده أكتر من 3 متر، عبدالرحمن كان بيصرخ عشان حد ينقذه وإحنا التلاتة مابنعرفش نعوم، كنّا بعيد عن الصخر شوية وأنا بغرق شوفت بتاع الإنقاذ على السلم بتاع المراقبة واقف بيتفرج علينا، أنا اتشاهدت على نفسي وأغمى عليا بعد كده فوقت في المستشفى ويوسف جمبي مغمى عليه.

وأكد "صحاب عبدالرحمن كلهم قالوا إن أهله على الشط لحد دلوقتي مستنينه يطلع ووالدته بتصرخ، كل ده كوم وشهادة عبدالوهاب صاحبه اللي كان معاه في البحر كوم تاني".


وأكمل "الكومي"، "الناس بتاعة الإنقاذ النهري اللي الحكومة حطاهم علي الشاطئ عشان ينقذوا الناس محدش فيهم رضي ينزل الميه ومارضيوش ينزّلوا اللنش يجيبنا عشان خايفين إنه يتقلب فعملوا حجة إن المفتاح ضايع ووصل بيهم الجبن وقلة الإنسانية والقيمة إن صحابنا فضلوا يعيطوا ويتحايلوا عليهم ينزلوا وبرضوا محدش نزل، منزلوش غير لما الستات اللي علي الشط فضلوا يشتموا فيهم وكانوا هيضربوهم، كان عدي بالظبط تلت ساعة أو نص ساعة في الماية بنغرق قدام عنيهم وهما بيتفرجوا علينا، بعد كده جه واحد قلبه جامد فيهم، نزلنا بعوامة صغيرة معرفش يطلعنا بيها بس طلع يوسف علي الصخر في الوقت ده عبدالرحمن كان لسه بيعافر مع الماية وموجود، بعد كده لقوني وطلعوني في اللنش بتاع الشاطئ التاني اللي جه بعد نص ساعة وأكتر وكان خلاص الوقت خلص وعبدالرحمن اختفى، من وقتها وعبد الرحمن مطلعش لسه وفي احتمال بنسبه 90% إنه بين الصخور".

واستطرد "الغواصين بقا اللي بينزلوا من يوم التلات لحد النهاردة محدش فيهم معاه أنبوبة أكسجين كلهم بينزلوا بماسكات ومحدش بيدور تحت الصخور والفراغات اللي فيها عشان للأسف أهل عبد الرحمن ناس غلابة ومش من المسئولين عشان كده الحكومة مش عاوزة تعمل أي إجراء".

وسرعان ما تحولت مأساة غرق الطالب عبد الرحمن ضرغام إلى مظاهرة إلكترونية، ودشن عدد من النشطاء، على موقع التواصل الاجتماعي "فيس بوك"، حملة للمطالبة بغلق شاطئ النخيل بمحافظة الإسكندرية، أطلقوا هاشتاج يحمل اسم "#أغلقوا_شاطئ_النخيل"، بعد أن شهد العديد من حوادث الغرق خلال الآونة الأخيرة، كما أطلق عليه البعض اسم شاطئ الموت.

وأكد نشطاء موقع التواصل الاجتماعي، أن الأسباب وراء كثرة حوادث غرق المواطنين، يرجع إلى وضع الحواجز بشكل هندسي خاطئ مما جعلها تخلق آبارا تحتها من خلال العديد من الفجوات التى خلفتها.

وطالب نشطاء موقع التواصل الاجتماعي "فيس بوك"، المهندس محمد عبد الظاهر، محافظ الإسكندرية، والإدارة المركزية للسياحة والمصايف، بغلق الشاطئ، بعد غرق 2 من الشباب منذ 15 يومًا وعدم إخراج جثة "عبد الرحمن ضرغام" طالب كلية الهندسة، حتى الآن.

وتقدم النائب حسني حافظ، عضو مجلس النواب عن دائرة سيدي جابر بالإسكندرية، وعضو لجنة الصحة بالبرلمان، بطلب إحاطة عاجل للواء مجدي عبد الغفار، وزير الداخلية، لتكثيف البحث عن الطالب "عبدالرحمن درغام"، غريق شاطئ النخيل منذ 15 يوما ولم يتم إخراج جثته حتى الآن، مطالبًا بتكثيف البحث من قوات الإنقاذ النهري.