يسرا اللوزي لجمهورها: «من حقي أتكلم في السياسة»

أوضحت النجمة الشابة يسرا اللوزي، وجهة نظرها في حادث الطائرة المنكوبة، خاصة بعد أن هاجمها جمهورها نظرًا لهجومها على شركة مصر للطيران.

وكتبت «اللوزي» على حسابها: «للتوضيح: من الواضح أن معظم الناس فهمت التعليق بتاعي غلط تمامًا.. هذا شرح تفصيلي للي كتبته بخصوص الطيارة، وده هيكون آخر بوست بخصوص الموضوع ده،
أولًا وقبل أي شئ ربنا يرحم كل الشهداء.. وأكيد لم اتهمهم بالفساد واللي فهم كده عنده مشكلة في التفسير».

وتابعت: «ثانيًا: أنا خريجة علوم سياسية وقانون دولي، ومن حق أي شخص يتكلم في السياسة».

١- في حالة إن ده إرهاب -أيًا كان مصدره-، فده يعتبر فساد لأني اعتبر الإرهاب نتيجة للفساد بشكل عام، كما أن وفاة الضحايا يعتبر ظلم لأن ملهمش ذنب.

٢- في حالة أن ده إهمال سواء من الجانب المصري أو الفرنسي، فده بردو يعتبر فساد وظلم للناس اللي اتوفت.

٣- في حالة أن ده قضاء وقدر.. ده موضوع تاني ومينفعش أتكلم فيه.

٤- أنا ماقولتش أي حاجة وحشة عن بلدي ولا عن مصر للطيران.. ومش هبطل أسافر على مصر للطيران لأنها شركة محترمة ووارد أن أي طيارة تقع، ولو كانت تابعة لأي دولة أو شركة.