رحلة البطل "سيف" من الإدمان حتى التعافى: أبهر الجميع في مهرجان العلمين الجديدة
الثلاثاء، 20 أغسطس 2024 02:56 م
أبهر سيف الدين، متعاف من إدمان المخدرات ويعمل في المشغولات اليدوية، الجميع بأعماله في مهرجان العلمين الجديدة.
وقال "سيف"، في مداخلة لبرنامج "8 الصبح" المُذاع على قناة "dmc": "أدمنت المخدرات لما كان عمري 14 سنة بسبب أصدقاء السوء، وكنت عاوز أجرب وأعرف إيه ده وبيعمل إيه، الموضوع في البداية بيكون تجربة والشخص بيحب الموضوع بعدها"، مضيفاً: "قررت أبطل لما لاقيت نفسي مش مستفيد حاجة من المخدرات، وبقيت بخسر أقرب الناس ليا بدأت بوالدي ثم زوجتي، وحياتي كانت هتدمر ومش عارف أعمل حاجة لعيالي، ومكنش في شغل ولا حياة، مكنتش بحس بنفسي".
وتابع: "اتصلت بـ16023 واستقبلوا الموضوع وقالولي تعالى وهتاخد علاج، ولو حالتك صعبة ممكن نوديك أي مركز، وفعلًا روحت مركز الحدائق".
وأردف: "الحمدلله بقالي سنتين متعافي من المخدرات، والمشغولات اليدوية في الأساس شغلانة والدي وأيام المخدرات مكنتش بهتم بالشغل وإني أطوره ولا إني أتكلم مع الناس أصلًا، لما فوقت اكتشفت إن كان فايتني كتير وإني أقدر أعمل شغل كويس يعجب أي حد، وعرفنا طريق المعارض".
واستكمل: "وزارة التضامن قالولي في معرض في العلمين وروحت واتعرفت على الناس وعرضت الشغل هناك وعجب الناس جدًا".
