نضال الشافعى لعادل إمام: كل سنة وأنت طيب يا زعيم أنت قيمة وقامة كبيرة جدا

قال الفنان نضال الشافعى: أحب أقول لعادل إمام كل سنة وأنت طيب يا زعيم وربنا يديك الصحة ويخليك لينا، إنت قامة وقيمة كبيرة جدا وربنا يخليك لينا وعقبال مليون سنة.

وأضاف خلال حلقة خاصة بالزعيم عادل إمام على قناة دى ام سى : مقابلة الزعيم لأى حد أول مرة عمرها ما تتنسى أنا أذكر إنه أول مرة قابلته كان فى رمضان وكانت عزومة للسحور وأنا كنت بعمل تامر وشوقية وكان أخد أحمد مكى فى دبور وبصلى كده وقاللى ولد أنا مش ناسيك أنت لازم تشتغل معايا وقولتله ده شرف كبير ليا ياريس ودى كانت أول مرة شوفت فيها الزعيم عادل إمام. 

وتابع: كان حلم وأى حلم إنى أشتغل مع عادل أمام ماكناش نحلم إننا نسلم عليه وهو عنده قوة ملاحظة كبيرة جدا، وهو اكتشف مواهب كثير من قوة ملاحظته، عملت مشهد فى بوبوس وهو كان مشهد واحد وقولتلهم أنا أعدى من ورا الكاميرا وقعدت أذاكر فى كلمتين أسبوع، الزعيم كان بيضحك من قلبه وهو متصالح مع نفسه وعارف مكانته وعلى مستوى الفنان عظيم ورائع، قاللى بعد بوبوس مش هو ده العمل اللى أنا عاوزك فيه وبعدها لقيت حد بيكلمنى عاوزينك معانا فى فرقة ناجى عطالله وما صدقتش كنت بتنطط وهو صدق ولن أنسى انه كلمنى فى التليفون وقاللى هه مبسوط قولتله أنا طاير من الفرحة واتعلمت منه كتير جدا.

يحتفل الزعيم عادل إمام اليوم الجمعة 17 مايو بعيد ميلاده الـ84، فهو من مواليد 17 مايو عام 1940، وهو زعيم الفن الذى بدأ مسيرته عندما كان طالبًا والتحق بفرقة التليفزيون المسرحية عام 1962.

وجسد العديد من الأدوار التى تمس الشعب، وتناقش العديد من القضايا المهمة للمجتمع، فعند تجسيد دوره فى فيلم "زهايمر" نقاش العديد من الجوانب كالمرض وتأثيره على المصاب، والتعامل مع جشع الأبناء، وفى فيلم "النمر والأنثى" ناقش تأثير المدمن على المحيطين به وعلى نفسه، وفى فيلم "خلى بالك من عقلك" ناقش دور التعامل مع المريض العقلى وذلك خلال تعامله مع الفنانة شريهان التى كانت تعانى من مرض عقلى.