أحمد العوضى لـ ع المسرح: جمهورى على السوشيال ميديا بركة من الله ورزق
الأحد، 07 أبريل 2024 10:00 م
قال الفنان أحمد العوضى إن جمهوره على السوشيال ميديا بركة من الله ورزق، مؤكداً أنه "لما الكلام بيكون بلا ضوابط على السوشيال ميديا ما يعجبنيش، وما ينفعش لو فى حاجة ما أعرفش أقولها فى الشارع وأكتبها وأنا مستخبى على السوشيال ميديا وده مش جدعنة".
وأضاف أحمد العوضى، خلال حواره ببرنامج "ع المسرح"، مع الإعلامية منى عبد الوهاب، على قناة الحياة: لو واحد من المعجبين قال لى بحبك فى الشارع أبرك من 10 يهاجمونى، وأنا طالع ونشأت مع الأغلبية من الناس، ولو جانى دور ابن أكابر هعمله لكن المسلسل هيكون منحاز للطبقة دى، وأنا اللى يهمنى اللى أنا طالع من وسطيهم".
وعن المسابقات التى يقدمها على السوشيال ميديا قال: بيدخل على صفحتى فى اليوم نصف مليون متسابق وده عهد بينى وبين ربنا أنا مش ملزم بيه، وعهدت ربنا إن عمرى ما أكسب حد أعرفه، وبحط السؤال واختبار بإيدى وبكلم الناس بنفسى بعمل كل شيء بنفسى لأن ده بينى وبين ربنا، وكسبت أكثر من 200 شخص خلال رمضان، ويكفينى اللى كسب دعالى".
وأشار العوضى إلى أن "كل مسابقة بقدمها على صفحتى ربنا بيعوضنى كتير بيها، منها الدعوة من حد غلبان متستهونش بيها وهى أبرك من 1000 واحد يهاجمنى، لافتا إلى أنه لم يرد على من اتهموه فى موضوع التعاطف مع صاحب واقعة "الكشرى" وعمرى ما رديت على حد هاجمنى".
وأضاف أحمد العوضى، خلال حواره ببرنامج "ع المسرح"، مع الإعلامية منى عبد الوهاب، على قناة الحياة، أن صاحب واقعة الكشرى كانت مشكلته على الملأ فجبرت بخاطره، وانا عمرى ما أندم على خير عملته، ولا قولت اتقى شر من أحسنت إليه واللى يقول عليا حاجة يقولها واحترامه على راسى".
أكد أحمد العوضى، عمرى ما رحت لدكتور نفسى، وبحل مشاكلى بنفسى والحمد لله، مشيرا إلى انه كان ملاكم واشتغل مع الفنان نور الشريف وكان مثله الأعلى وذهب عنده عشان يشوفه بس، فأخذه، وانا اتخرجت من مدرسته، وبطبعى مش رومانسى، وبكره الرومانسية اللى فيها تلزيق، وبحب الرومانسية تكون برجولة، والراجل لازم يكون راجل فى كل حاجة".
