انتصار لبرنامج "ع المسرح": والدى صعيدى والصعايدة بيحترموا المرأة لكنى متمردة.. وحياتى كلها كفاح

قالت الفنانة انتصار، إن والدها حافظ للقرآن وزاهد فى الحياة وصعيدى، لكنها متمردة دائما، مؤكدة أن "الصعايدة لديهم تفتح عقلى ونفسى غير عادى، والجدة فى الصعيد بتحكم على رجالة، ولو الراجل مدايق الست يطلع عينه، والست غالية جدا هناك ولها قيمة".

 

وأضافت انتصار خلال استضافتها ببرنامج "ع المسرح" الذى تقدمه الإعلامية منى عبد الوهاب، والمذاع على قناة "الحياة": أن الصعايدة بيحترموا الست ولها وزن، وبيسمعوا رأى الست، واللى فرحانين بيا أهلى اللى فى الصعيد، موضحة أن والدها كان متخوف فى الأول من عملها ممثلة، وقالت: "لما بدأ يشوف أخبارى فى الصحف فرح، وأمى كانت داعمة ليا ودعمها واضح عكس والدى، موقفه ودعمه مكنش واضح وسابنى اتحمل اختيارى".

 

وأشارت الفنانة انتصار إلى أن "الحياة كفاح مش جاية ع المرتاح" دا عنوان قصتى، ولايق عليا، مشيرة إلى أنها ظلت فى الكلية 13 سنة، وخلفت وأنا فى الكلية وكنت بروح لجنة الامتحان وأنا بطنى قدامى، وانصح كل بنت ناوية تتجوز تخلص الكلية الأول"، لافتة إلى أنها واجهت عرقلة كتيرة فى الحياة "منها الفلوس وقلة اهتمام المخرجين بيا"، مشيرة إلى دورها فى فيلم "سهر الليالى" "خطوة مهمة خلتنى عديت المرحلة".

 

وأكدت انتصار، "رميت مشاكلى مع الآخرين ورى ضهرى، وعلشان أبقى نفسى لازم اتخلى عن حاجات كتيرة، مش هجامل كل الناس، ومن زمان منتجت ناس فى حياتى، وانا دمى خفيف وبحب الحياة".