تصريحات الفنانة ميمي جمال عن مشوراها وزوجها الراحل حسن مصطفى( فيديو)

تصريحات عديدة ذكرتها الفنانة ميمي جمال عن زوجها الراحل حسن مصطفى وحياتها وبناتها، وكذلك أعمالها ومشوارها وثروتها.

وكشفت الفنانة ميمي جمال خلال استضاف الإعلامي عمرو الليثي، في برنامجه واحد من الناس، قائلة :"وهبت ثروتي أنا وحسن مصطفى لبناتي عشان يرتاحوا، وعلاقتي جيدة مع الجميع، واعشق العمل الفني بشدة".

تصريحات الفنانة ميمي جمال

وأردفت ميمي جمال: "أنا بحب من أعمالي في التليفزيون "الونش" وإيجار قديم مع شريف منير وعلاقة مشروعة، وفى المسرح نمرة ٢ يكسب وعش المجانيين، ودو ري مي فاصوليا، وفي السينما البعض يذهب للمأذون مرتين".

زوج الفنانة ميمي جمال

تابعت الفنانة ميمي جمال: "زوجي الفنان حسن مصطفى كان جادا جدا في البيت، ومبيعرفش يهزر ولا يقول نكت".

معاناة ميمي جمال مع ماري منيب

واستكملت الفنانة ميمي جمال خلال الجزء الثاني من لقائها ببرنامج "واحد من الناس": "ماري منيب أول ما شافتني قالت البنت دي مش عجباني، وكانت عايزة تمشيني، وقالت أنا اتحولت منك على المسرح وإيه رايحة جاية.. تقومي تقعدي.. أنا البنت اللى تشتغل معايا تقعد جنبي على الكنبة، ومش أقول الإفيه وانتي تعدي من قدامي".

شخصية ماري منيب و الفنانة ميمي جمال

وأضافت الفنانة ميمي جمال: "ماري منيب لطيفة أوي، إلا إنك تبوظ لها شغلها، قلت لها أنا هقعد ومسمار وشاكوش ودقتني على الكرسي ومتحركتش علشان مزعلهاش وده عجبها".

نقطة ضعف ميمي جمال

وواصلت الفنانة ميمي جمال: "نقطة ضعفي قلبي لإني حنينة زيادة عن اللزوم ولو أي حد حاجة مؤثرة أصدقه لحد دلوقتي وأنا في السن ده، وده غلط لإني اتخدعت كتير في ناس مكنتش اتخيل، بس بقيت اسمع من هنا وامشي من هنا".
 

حقيقة عملية تجميل الفنانة ميمي جمال

وأوضحت ميمي جمال: "مقولتش إني أجريت عمليتين تجميل لإني بترعب من العجز، أنا لسه احتمال الشهر اللي جاي أروح حفلة في لبنان وفيها حد عايز يعملي تجميل في رقبتي وقال لي هتجيلي آخدك غرزتين، أنا عارفة عيوبي اللي في وشي وبالمكياج بيروحه".

معاناة ميمي جمال النفسية

ولفتت الفنانة ميمي جمال:"في فترة طويلة من حياتي لجأت للمهدئات علشان اعرف انام بعد وفاة والدتي لإني مكنتش اعرف اشتغل لو مكنتش موجودة وكان عندي توأم وهي شيلاني ولما تعبت انا تعبت فكنت باخد حاجات علشان اعرف أنام".

في الجزء الأول من نفس اللقاء، قالت الفنانة ميمي جمال: "زوجي الفنان الراحل حسن مصطفى كان زميلي في فرق التليفزيون اللي عملها سيد بدير واحنا كنا في المسرح الكوميدي، وأنا كنت في الفترة دي مخطوبة لضابط وعندي 17 سنة، وكان شاب قمر وعرفنا بعض سنة ونصف، وبعد كدة قلت له يلا بقى عايزين نتجوز، فقال لي: أنا مستنيكي تبطلي تمثيل علشان أتجوزك، فقلت له أبطل تمثيل ليه؟! ما انت بتاخدني توصلني لما بروح المسرح فرفض، وقال لي مينفعش أبقى ظابط ويتقال لي أنا شُفت المدام في الفيلم امبارح".

قصة حب ميمي جمال الأولى

وأردفت الفنانة ميمي جمال: "حصلت ما بيني وبين خطيبي الظابط مشاكل وحصلت جوايا كسرة جامدة وقلت له كنت عرفتني من زمان مش تسيبني الفترة دي كلها وبعدين جاي تقولي مش هاتجوزك الا لما تبطلي تمثيل، وكنت وقتها بدأت اشتغل مسرحية مطرب العواطف وكان حسن مصطفى من النوع اللى يحسس انه أبوك وأخوك وعمك وخالك ودنه بتسمع فابتدي يتكلم معايا واخدنا على بعض وارتبطنا ببعض وقلت ابويا توفى وانا محتاجة لحد واخلف".

ميمي جمال تبكي بسبب ذكرياتها مع حسن مصطفى

وأكملت الفنانة ميمي جمال باكية: "حكيت لـ حسن مصطفى حكايتي وابتدينا ناخد علي بعض واتعودنا علي بعض وهو يحكي لي وأنا أحكي له، هو كان متجوز قبلي، وكان عنده بنت سمية حبيبتي، فحصل حاجة بينه وبين مراته، وجاء سيد بدير، وقال: والله لو بتحبوا بعض ليه ماتتجوزوش؟! فقلت له: هو متجوز، لما أموره تستقر، ويشوف هو عايز إيه نبقى نتكلم، لكن أنا دلوقتي مقدرش أتجوز إنسان معرفش ظروفه إيه وظروف مراته إيه لإني مسمعتهاش، فسيد بدير قال له ادي لنفسك فرصة وشوف انت عايز ايه يا حسن واذا كنت مستقر في بيتك واذا مش ممكن يبقى تشوف هتعمل ايه مع بنتك، وقتها طلق مراته لإنه كان نفسيته تعبانة جدا معاها وبعديين اتجوزنا بقى وعشنا مع بعض وعشنا مع بعض 45 سنة وهي الجوازة الوحيدة اللي في حياتي".

سر رفض والدة ميمي جمال لحسن مصطفى

وتابعت الفنانة ميمي جمال: "ماما مكنتش موافقة اني اتجوز حسن مصطفى، وقالت لي لا هو صغير ولا حليوة ولا انتي أول بخته وأكبر منك بـ14 سنة وموظف معاكي في نفس المكان، وبياخد نفس مرتبك، وهو أصلا كان بيشتغل في التربية والتعليم كان وكيل وزارة".

أمنية الفنانة ميمي جمال

على الجانب الأخر كشفت الفنانة ميمي جمال عن أمنيتها في تقديم أوسكار قائلة: "لو كنت عضوة في لجنة تحكيم الأوسكار المصري؟ أدي الجائزة لمنى زكي عن مجمل أدوارها".

وتابعت الفنانة ميمي جمال: "وبالنسبة لمحمد رمضان فهو شاطر وزكي وبيعرف يروج لنفسه كويس، جعفر العمدة قدم فيه كل حاجة ممكن تتصورها قدم الرجل المزواج، والتاجر الشاطر، وجمع كل الحاجات اللي ممكن تتفرج عليها وهو زكي وربنا هيوفقه".

وأوضحت الفنانة ميمي جمال: "كنت بفكر أعمل دور مسنين، والدكتور أِشرف زكي عمل ده، وأي حد من الممثلين لو عنده مشكلة هو بيتدخل في ده، وعن نفسي لا يمكن أعيش في دار مسنين".