زيزي عادل تتصدر التريند بعد اعتزالها الغناء وهجومها على ستار أكاديمي: "ببعد عن الفن عشان بقرب من ربنا"

تصدرت الفنانة المعتزلة زيزي عادل التريند علي محرك البحث جوجل، وذلك بعد تصريحاتها خلال لقائها في تصريحات تليفزيونية، حيث كشفت زيزي عادل الكثير من التفاصيل حول حياتها الخاصة والفنية .

تصريحات زيزي عادل

كانت أنطلاقه زيزي عادل الفنية بعد ظهور موهبتها في الموسم الثاني، من برنامج اكتشاف المواهب الشهير "ستار أكاديمي " الذي تم عرضه عام 2004، حيث حلّت في المركز الثالث بعد المتصدر السعودي هشام الهويش، وصاحبة المركز الثاني التونسية أماني السويسي.

 

الا أن تصريحات المطربة المعتزلة  زيزي عادل جاءت لتكشف العديد من الاسرار التي عاشتها بكواليس تصوير برنامج اكتشاف المواهب الشهير "ستار أكاديمي" قائلة: "لو رجع بيا الزمن أكيد مكنتش هروح برنامج ستار أكاديمي، عشان دلوقتي بعد تغيير فكري وتقربي من ربنا وكل اللي بيحصلي ده، يخليني أقول إن كان فيه حاجات كتير مكنش المفروض أعملها، ولكن أنا من الناس اللي مبتندمش، وبشوف إن كل حاجة حصلت في حياتي ليها ترتيب وكل حاجة ليها أسباب".

وتابعت: "تجربتي في ستار أكاديمي كانت هي بداية النجاح والانطلاقة، أنا نزلت من البرنامج مشهورة مع إني مكنش عندي أغنية ولا أي حاجة، ولكن كنت مشهورة كأني نجمة بقالي 10 سنين بغني، ولقيت عروض من شركات إنتاج كبيرة، ولما رجعت مصر مصدقتش عدد الناس اللي كانوا جايين يستقبلوني، لأن أنا قعدت هناك 4 شهور مفيش تليفزيون، ومكنتش عارفة أنا معروفة برا واللا لأ، ولا أعرف كان بيتكتب عني أخبار واللا لأ، ولما رجعت في صدمة بتحصل كده إني مشهورة والدنيا بتختلف" مؤكده أن فكرة برنامج "ستار أكاديمي" لا تناسب تقاليد المجتمع.

 

وأضافت: "ستار أكاديمي كبرنامج فكرته لا تناسب تقاليد مجتمعنا، كان فيه كاميرات في كل مكان، حتى الحمامات كان فيها كاميرات عند المرايات، والموضوع ده كان بيضايق".

 

اعتزال زيزي عادل 

في أبريل الماضي أعلنت زيزي عادل اعتزالها الغناء وفي أول ظهور أعلامي لها عبر برنامج "كلام الناس" مع الإعلامية ياسمين عز والذي ظهرت فيه يدون حجاب ،بعكس الصور المتداولة لها عقب قرار الاعتزال، وبررت الأمر بقولها: الناس كلها افتكرت إني محجبة أو اتحجبت، ولكن دا كان سوء فهم، لأني آخر حاجة قدمتها كان ألبوم ديني اسمه "سيبها على الله"، ونزل في رمضان، وكنت لابسة حجاب فيه، وفنانات كتير عملوا كدا وبنلتزم بكلام الألبوم.

معلقه عن عدم أرتدائها الحجاب "العجيب إني ظهرت في فيديو اعتزالي بشعري، يبقى ليه الناس تقول إني اتحجبت، وقُلت ادعوا لي ألبس الحجاب قريب، ولكن مفيش فنان بيسلم من الشائعات، وناس قالوا إني بعمل كدا عشان التريند، ودي كانت حاجة غريبة جداً بالنسبالي، وفيه ناس بتعمل حاجات عشان تطلع تريند، لأنه موضة بس دا مش حقيقي".

وعن أسباب أعتزالها الفن كشفت زيزي عادل عن ذلك ، قائلة: "زمان كان كل تفكيري هلبس إيه في حفلتي وهعمل شعري إزاي واكتشفت هل لما أموت هاخد معايا الأغاني والكومنتات؟ واكتشفت إني هاخد معايا أعمالي وبدأت أفكر إني مش مستعدة أقابل ربنا بالحاجات دي، وكنت عايزة أحس إني مستعدة أقابل ربنا خصوصاً بعد وفاة شباب صغيرين بكثرة الفترة دي، والموضوع دا عملي صدمة، لأن مفيش حد صغير على الموت، ودا خوفني وأخدت قرار الاعتزال، وأتمنى أي حد يسمعني يفكر في كلامي".

من هي زيزي عادل

الفنانة زيزي عادل من مواليد 26 أكتوبر 1987، لديها 3 شقيقات هم "غادة، ندى، غدير" وقد بدأت زيزي عادل الغناء في كورال المدرسة حيث غنت في عيد الأم وهي في سن العاشرة من عمرها أغنية "زي الربيع"، وقد تخرجت زيزي عادل من معهد الموسيقى العربية.

كانت البداية الحقيقية ببفنانة زيزي عادل من خلال برنامج المسابقات "ستار أكاديمي 2" عام 2004، وخلال مشوارها الغنائي 3 ألبومات غنائية فقط كان أول ألبوماتها بعنوان "واحدة طيبة" عام 2007 مع روتانا، ثم أصدرت ألبومها الثاني "وعد عليا" عام 2009 ، والثالث في عام 2015 وهو "أنا أنثى" ،كما قدمت 9 كليبات غنائية في مسيرتها الغنائية وهم: "حب مش محسوب عليا"، "وعد عليا"، "واحدة تانية"،"شايلاهالك"،"عيبوه كتير"،مازال البحث جاري"، "محتاجة وجود راجل"، "مستغربة"، "أبسط نفسك"، كما قدمت زيزي عادل أغنيتين منفردتين وهما "شايلاهالك" و"تعودت عليك"

وقامت بتلحين عدد من أغانيها بنفسها.

وبسبب مرض والدها ورحيله غابت زيزي عادل عن الساحة الغنائية لمدة 7 سنوات لتعلن بعدها اعتزال الفن والغناء في أبريل 2022 قائلة "أنا النهاردة طالعة أقول خبر مهم أخدته في حياتى وهو قرار اعتزالي.. قررت أسيب مهنة المطربة، والقرار أنا مخدتهوش امبارح أنا وخداه من فترة كبيرة جدا، بس يمكن مطلعتش قلت وقتها لأني كنت حابة أتكلم مع نفسي ومع الناس القريبة أوي.. الناس القريبة مني عارفين نفسهم ولما قلتلهم على القرار شجعوني ودعموني كمان، ويمكن قرار الاعتزال ده بيبعدني عن أكتر مغريات الحياة وهي الشهرة والأضواء" مضيفة "ببعد عن الفن عشان بقرب من ربنا، ولقيت إن القرآن بيقولي إني لازم أكون ست ملتزمة، وبحاول على قد ما بقدر أكون ملتزمة وهتستغربوا شوية اني طالعة بشعري ومش محجبة، ويمكن ده لأني لسه ربنا لم ينعم عليا بالحجاب، وبدعي ربنا يتممها عليا، وكل حاجة بتيجي خطوة خطوة ومفيش حاجة بتيجي مرة واحدة" ، وانهت حديثها قائلة  "حابة أموت وربنا راضي عني، ويمكن دي حاجة كلنا بنتمناها، فأنا مش عارفة هاموت امتى ولكن كل اللي عاوزاه أكون مستعدة لمقابلة ربنا وأقابله وأنا راضية عن نفسي وحياتي وأفعالي".