جمال شعبان ردا على سماح أنور: "ربنا يزيدك بركات وكرامات" (فيديو)

انتقد الدكتور جمال شعبان، استشاري القلب وعميد معهد القلب السابق، بعد تصريحات الفنانة سماح أنور المثيرة للجدل، التى أوضحت فيها أنها لم تشرب الماء من ١٧ سنة.

رد شعبان على سماح أنور

وقال جمال شعبان، عبر صفحته الرسمية على موقع التواصل الاجتماعي فيسبوك: "يا نجمة دي يمكن كرامة خاصة بحضرتك.. ربنا يزيدك بركات وكرامات.. لكن الأشخاص العاديين اللي زينا ما يقدروش يستغنوا عن الميه".

وتابع شعبان، أن جسم الانسان يحتوي على ٦٠٪؜ من وزنه مياه و٩٠٪؜ من الدم مياه، ويحتاج الإنسان إلى تناول ٢ لتر من المياه يوميا على الاقل.

تصريحات سماح أنور

وكانت الفنانة سماح أنور، حلت ضيفة علي أحد البرامج، للحديث عن كواليس حياتها الشخصية، وسر ابتعادها عن الشاشة خلال الفترة الأخيرة.

وقالت سماح أنور: "كل لما أشرب المياه بتعب علشان كده بقيت أشرب مشروبات غازية زيرو سكرونسكافية وقهوة وكل الخضراوات والفواكه اللي فيها مياه".

سماح أنور والحفاظ على وزنها

وأوضحت الفنانة سماح أنور، أن سر حفاظها على ثبات وزنها رغم تناول كل الأطعمة التي تشتهيها، قائلة:" باكل كل حاجة بيتزا ومكرونة، أنا باكل مرة واحدة في اليوم، طول حياتي، وقت ما خلصت المدرسة وابتديت أمثل، إحنا بيجيلنا البريك مرة واحدة في الأوردر وإحنا بنشتغل من 12 لـ 18 ساعة، فبناخد وجبة واحدة، وخلاص وبنشتغل، فأنا بشتغل من وأنا عندي 16 سنة فعلا، ودي كانت الفترة اللي كان شغلي فيها كتير أوي، فقعدت حوالي 15 سنة بشتغل كتير أوي، وده كان نظام حياتي".

سماح أنور وحب الرياضة

وأضافت سماح أنور: "أنا بفتكر إن إحنا هناكل علشان فيه بريك بس، زائد إن أنا بحب الرياضة جدا، طول عمري رياضية، فالحكاية مخليا جسمي على طول بيحرق طول الوقت، وسواء عندي شغل ومعنيدش شغل، أنا مبجوعش غير بالليل، أنا بآكل بالليل، المهم في الموضوع ما أكلش قبل ما أنام على طول، لازم آكل قبل ما أنام بـ 5 أو 6 ساعات، وأنا نفسي مش بنام بدري، أنا مش من الناس اللي بتنام بدري، بصحى بدري لكن معرفش أنام بدري، عشان كده باكل الساعة 8 أو 9 أو 10 وبنام 3 أو 4 أصلي الفجر وأنام كده يعني".

وواصلت سماح أنور: "باكل اللي يعجبني، آيس كريم فاملي، رغيف ونص باجيت، مانجه فص كيلو أكله ورا بعض مانجايه ورا مانجايه، لحد الساعة 12 بكون شبعت خلاص، هموت من الشبع، وبصحى أشرب نسكافيه، وبقعد اشتغل، إحنا عندنا مشكلة، الناس اللي عايزه تعرف إحنا ليه بنتخن، الموضوع مش ريجيم، أمي زمان قالتلي جملة حكيمة جدا جدا، حافظتلي على وزني لحد انهارده، عايزة تخسي، اقفلي الخرم اللي في وشك، لإن هو ده اللي بيتخن، وإحنا مبنفكرش، بنعمل وبعدين نندم، مفيش حاجة بتعدي على المخ، كل حاجة عندنا لازم يبقى فيها أكل، خروجة أو زيارة وشهر رمضان، السيستم عايز يهضم ويرتاح".

أخر أعمال سماح أنور

يذكر أن سماح أنور شاركت في مسلسل "الليلة واللي فيها"، مكون من 6 حلقات وبطولة زينة، محمد شاهين، سماح أنور، علاء مرسي، آلاء سنان، وعدد من الفنانين الشباب، تأليف محمد رجاء، وإخراج هاني خليفة.

بداية سماح أنور

سماح أنور درست اللغة الفرنسية بكلية الآداب في جامعة القاهرة،  اشتهرت بأدوار الحركة في السينما المصرية، ومن أشهر أفلامها (حالة تلبس، بنت مشاغبة جدًا)،  مثلت على المسرح والتلفزيون، ومن أعمالها التلفزيونية (ذئاب الجبل، الحساب، ونيس وأيامه)، ومن أعمالها المسرحية (راقصة قطاع عام، أولاد الشوارع)، ابتعدت عن الشاشة لعدة سنوات بسبب حادث سيارة، ثم عادت للأضواء من خلال برنامج (تجربتي) في محطة فضائية عام 2002، وشاركت بعدها في عدة مسلسلات منها (أزهار، ونيس وأيامه، نظرية الجوافة).