غلوشيات رمضانية #15 رمضان.. يكتبها عبدالله غلوش: ميريهان حسين طالعة بدور ريهام سعيد في «الخانكة» ولبني عسل في «المغني».. وبيومي فؤاد في «الميزان»: مفيش حد في البلد دي بياخد حقه بالقانون

#15رمضان
-ميريهان حسين طالعة بدور ريهام سعيد في " الخانكة" ولبني عسل في "المغني".
-هبة رجل الغراب .. أدمن الصفحة الرسمية للمسلسل علي الفيس بوك من كتر ما هو مش لاقي حاجة حلوة في المسلسل يشتغل عليها ، بدأ من امبارح يعمل شير لحلقات مسلسل "بنات سوبر مان".
-بعد انتقال ايمان الحصري لقناة DMC ، مبقاش فاضل غير حسن راتب اللي لسه محتفظ بمكانه في قناة المحور حتي الان.
-جراند اوتيل .. لما تشوف عمرو يوسف وهو بيقول لأمينة خليل "انا يمكن مكونش الشاطر حسن بس انتي ست الحسن والجمال" ، وفي الفاصل تسمع الطفل بتاع جهينة وهو بيقول للبنت اللي معاه في الإعلان "فكهاني وبحب المانجة" ، هاتعرف ثورة 52 عملت ايه في البلد دي.
-استقالة وزير الداخلية "راس الغول" .. وفاة صلاح عبدالله "الخروج" .. وفاة سميرة عبدالعزيز "الخانكة".. انتحار الممثل محمود حجازي "ونوس" ، فشل محاولة انتحار غادة عبدالرازق "الخانكة" .. ملخص أهم عناوين الصحافة اليوم.
-أزمة نسب .. بقينا في 2016 ولسه لما حد يضرب حد في مشهد خناقة بيقول (هووه).
-بعد شهر كامل مش بتذيع فيه غير مباراة الاهلي والمعادن موسم 2004 ، بريزنتيشن اغلقت قناة الاهلي تمهيدا لإعادة اطلاقها في مباراة الاهلي والزمالك ثالث أيام العيد.
-كلمة سر .. لعنة الشيخ الشعراوي تطارد حسن يوسف حتي الان.
-كلمة سر .. لما حلقة النهارده كلها تدور حوالين ان مديرة المدرسة اللي لطيفة شغالة فيها اختارتها عشان تبقي المشرفة علي رحلة عاملينها للعين السخنة ، والحلقة خلصت قبل ما لطيفة تاخد قرار نهائي في الموضوع ده .. تخيل بقي باقي حلقات المسلسل عاملة ازاي؟
-الشيف شربيني اهدي مفيدة شيحة طاسة تيفال بمناسبة عيد الأب.
-هي ودافنشي .. خالد الصاوي محتاج يسأل ليلي علوي عن اسم دكتور الدايت بتاعها.
-الظهور الأول لصفاء الطوخي في فوق مستوي الشبهات ، والظهور الأول لدلال عبدالعزيز في نيللي وشيريهان.
-افراح القبة بدون سوسن بدر وبناتها لا يمثلني.
-افراح القبة .. حلقة كاملة مافيهاش اي معلومة مفيدة غير ان هاني ابن أم هاني "سلوي عثمان" مات غرقان.
-وعد .. لو اختارتي اللحمة ماينفعش عينك تبقي في الفراخ ، عشان وقتها لا هاتستطعمي اللحمة ولا الفراخ .. هند رضا بتنصح مي عزالدين تختار بين جوزها "حازم سمير" وعشيقها "احمد السعدني".
-واضح ان بيبسي اكتفت بالاعلان علي مبارايات اليورو ، وهاتقلد كوكاكولا في تخصيص ميزانية اعلانات رمضان لصالح الأعمال الخيرية.
-ابو البنات .. عشان نكون منصفين ، مصطفي شعبان لابس شوية بنطلونات بيجامات حلوة في المسلسل ده.
-سقوط حر .. مسقعة باللحمة المفرومة ، مكرونة باشميل ، محشي ، كريم كراميل .. صفاء الطوخي تضرب من جديد.
-الخروج .. دموع درة في حلقة امبارح ، خلتني لأول مرة اضحك علي مشهد واحدة بتعيط ، من أيام مشهد بشري الشهير في "العشق والهوى" بتاع بابي خاين بابي كداب.
-عبور لاند .. هو المخرج مجبش سيد معوض يعمل الاعلان ليه مكان احمد فتحي ، طالما ان الاسكربت عبارة عن مجموعة مشاهد ثقيلة الدم بين واحد اسمه سيد وواحد اسمه حسن.
-والنبي يارب تعترني في واحد يطلب مني اقتل واحد ويديني مليون دولار .. دعاء احد الشباب علي إحدي مقاهي وسط البلد بعد مشاهدة حلقة الامس من "الاسطورة".
-في علاقة وثيقة بين الدهب و قلوب البنات .. قرب اي حتة دهب من اي بنت و حط ايدك على قلبها هتلاقيه بيدق .. يحيي الفخراني "ونوس".
-الحريم جيوب غويطة محدش يعرف جواها فلوس ولا عقارب .. فتوح أحمد " يونس ولد فضة".
-مفيش حد في البلد دي بياخد حقه بالقانون .. بيومي فؤاد "الميزان".
-ربنا يرحمك يا أمي ويرحم امهاتنا جميعا ويخلي أمهاتكم يارب.