ويجز يتحدث عن تفاصيل حفله في مهرجان العلمين ويعد الجمهور بمفاجآت (فيديو)
الخميس، 29 أغسطس 2024 01:00 م
وجه الإعلامي إبراهيم عبد الجواد سؤال لنجم الراب ويجز قبل حفله في مهرجان العلمين الجديدة قائلا «بتشوف مدينة العلمين الجديدة ازاي؟ أنت راجل إسكندراني أصيل، والعلمين الجديدة تعتبر امتداد لإسكندرية وموجودة في الساحل الشمالي، شايف المدينة إزاي بمنتهى الصدق اللي معروف عنك يعني؟».
قال ويجز في مداخلته الهاتفية على قناة «DMC»: «بنتمنى طبعا من الإبهار اللي شايفينه تكون السنة كلها علمين، أنا نفسي يعني قاعد مبسوط أهو مع الشباب، ومبسوطين في البحر والجو جميل وعايزين نشتغل الحفلة يوم الجمعة. بس طاقة المكان أنت عارف يعني كده كده إحنا طول الوقت بنبقى نفسنا نيجي الساحل، نفسنا برضو الساحل يبقى كمان Destination بقى إيه أكبر من كده بكتير، ويبقى العلمين شغّالة صيف شتا والناس ساكنة».
قال إبراهيم عبد الجواد «مش من أحلى مكان في مصر بس، من أحلى مكان في الدنيا كلها، مدينة العلمين الجديدة. ومعانا دلوقتي واحد من أحلى وأجمل نجوم مصر والوطن العربي ونجم حفل مهرجان العلمين الجديدة، حفل الختام ويجز».
وأضاف «ما اعرفش يا ويجز واصل لك كمّ الانتظار اللي الناس فيه واللي الشباب فيه ومنتظرين ازاي حفلة ويجز يوم الجمعة اللي جاية، واصل لك الكلام ده ولا لأ؟».
ورد ويجز: «والله أنا نفسي مستني حفلة ويجز يوم الجمعة عشان أفرّغ شوية، والله حاجة بجد تفرّحني جدًا جدًا، وجودي في مهرجان العلمين دا مكانته كبيرة جدا في قلبي وحاجة مهمة في حياتي، متحمس جدا وإن شاء الله تبقى حفلة حلوة والناس كلها تتبسط».
وكشف نجم الراب ويجز مفاجأة لجمهوره قبل حفله في مهرجان العلمين الجديدة قائلا «بصراحة الحفلة دي هتبقى آخر حفلة نعملها قبل ما ننزّل الألبوم الجديد».
وأضاف لإبراهيم عبد الجواد «بصراحة طاقة العلمين مختلفة، وطول عمري حفلة العلمين كل سنة بتجدّد لي طاقتي وببقى متحمس قوي إن أنا أشوف الحضور الجماهيري الكبير قوي اللي ما بيحصلش غير عندنا من الآخر».
يختتم مهرجان العلمين الجديدة فعالياته يوم 30 أغسطس الجاري، بحفل لنجم الراب ويجز، وطرحت شركة «تذكرتى» أسعار تذاكر الحفل من خلال منصتها الإلكترونية لأربع فئات متاحة الجميع، على المسرح u arena.
ومن شروط حضور حفل ويجز "ممنوع دخول المأكولات والمشروبات، لا يوجد استرجاع أو استبدال وغير مسموح بالدخول والخروج، ولن يسمح بدخول الحفل بعد غلق الأبواب".
