تفاصيل جديدة فى رواية خطف الفنانة مي حسن من سائق سيارة ملاكي

تصدرت الفنانة مي حسن،  مؤشرات البحث على جوجل بعد حديثها عن محاولة خطف قالت انها تعرضت لها على يد سائق لاحدي الشركات الخاصة، حيث تقدمت ببلاغ للشرطة، والتي تواصلت معها لسرعة ضبط الجاني.

خطف مي حسن

وروت مي حسن وفق تصريحات لها : " الحمد لله الحادثة عدت على خير وفتحت باب العربية والسواق فرمل مرة واحدة، وبعدين نطيت من العربية، وصوتي كان عالي والناس اتلمت ولقيت السواق بيهددني  وبيقلي  لي حطي لسانك في بقك لأدفنك مكانك ".

الداخلية تكشف الحقيقة

مي حسن تروى التفاصيل

قالت مي حسن:" كنت راجعة الساعة ستة ونص مساء، وكان السائق مصمم يدخل من البوابة التالتة، وأنا ساكنة في الرابعة، قلت له اللوكيشن مش مظبوط في حدائق أكتوبر وأول ما دخلنا الحدائق جاتني مكالمة من جوزي وهو في العراق حاليا وكلمني، وفجأة السواق دخل شارع يمين وداس 80 ولاقيت العربية بتجري، وعاملة تراب، أنا مش فاهمة فيه إيه فرميت التليفون وقلت له بعصبية إيه مدخلك هنا، وكان لا في دماغي خطف ولا حاجة، وقلت له هفتح العربية وأنط، قال لي خسارة انتي حلوة وكل ده وجوزي على التليفون معايا".

قفز مي حسن من السيارة

وأردفت مي حسن أنها قامت بالقفز من السيارة قائلة :" فتحت باب العربية وفرمل مرة واحدة، ونطيت من العربية، وصوتي كان عالي قلت له إنت بتستهبل انت بتدخل في الضلمة عايز تخطفني هوديك في داهية، الحمد لله الشارع كان فيه عماير لسه بتتبني وسور خزان وكان فيه عمال الناس لما نزلت شايفني وتدخلوا بيشدوه، والسواق قال لي حطي لسانك في بقك لأدفنك مكانك، ولما لاقيت ناس بدأت آخد نفسي بالعافية، وكان بيحاول يفهم الجميع إني مش عايزة أدفع الأجرة، والحمد لله قبل ما أرد واحد سمع كلمة إنه عايز يخطفني وكنت منهارة عياط".

مي حسن وتبليغ الشرطة

وتابعت مي حسن أنه وخلال الحادثة وجهت له تهديد بتليغ الشرطة إلا أنه لم يكترث للأمر وقالت :"هددته إني هبلغ البوليس، وكان رده أنا مش مسجل خطر، وطلبت الشرطة وطلبوا مني رقم العربية، أول مرة أكلم الشرطة كمواطنة عادية، وبعدها كلمني مأمور قسم الهرم وحكيت اللي حصل والحمد لله بشكر القضاء وكل اللي ساعدني في الأزمة".

من هي مي حسن ؟

الفنانة مي حسن كانت أولى أعمالها المشاركة في مسلسل "أزمة نسب"، الذي يعد أولى تجاربها في عالم الدراما، عام 2016، والمسلسل من بطولة الفنانة زينة وريم البارودي، و في عام 2019، شاركت مي حسن في مسلسل "البرنسيسة" الذي عرض في شهر رمضان، وكان بطولة الفنانة مي عزالدين، وانضمت إلى فريق فيلم "استدعاء ولي الأمر" بمشاركة عدد من الفنانين، منهم: حورية فرغلي ومحمد عز وسماح أنور وصبري فواز، وشاركت مي حسن، في مسلسل "طلقتك نفسي"، بمشاركة عدد من الفنانين، منهم: كارولين عزمي وهاجر أحمد وأحمد عصام.