منى زكي.. قصة حبها مع أحمد حلمي تتصدر التريند بعد التحدث عنها مع صاحبة السعادة (فيديو)

قصة حب منى زكي وأحمد حلمي أصبحت تريند، بعد ما تحدثت عنها منى زكي  قائلة: كنت في مرة في مكتب المنتج محمد فوزى، وكنا هنعمل مسرحية بطولة عامر منيب، وقالى أن في دور عنده بيفكر يجيب فيه أحمد حلمي وكان وقتها بيعمل برنامج لعب عيال وأنا كنت بتابع البرنامج ده بس مكنتش عارفة وشه لأنه بيظهر بضهره".

منى زكي: كنت بقول على أحمد حلمي رخم اوي

وتابعت النجمة منى زكى، في برنامج "صاحبة السعادة" للإعلامية والفنانة إسعاد يونس: "قلت للمنتج محمد فوزى يا ريت ده حد لذيذ أوي وأنا بيني وبين نفسي عاوزة أشوف وشه، ولما جه المكتب سلم بطريقة غريبة كده وبعدين جاله تليفون وأنا ومحمد فوزي دخلنا البلكونة بنتكلم وقلتله لا ده طلع رخم أوي ومش لذيذ زي البرنامج، وقلتله جربه أنا مش عارفة، ووقتها كنت بقول عليه أنه رخم اوي على الحقيقة".

وأضافت منى زكى: "بدأنا بروفات وبدأت أشوفه لذيذ، وهو تقريبا حس اني هامشي من المسرحية وكنت فعلا وقتها هاعتذر، وقال ناخد أرقام بعض، وبقينا بنتكلم في التليفون وبقينا أصحاب جدا وعرفته كمان على أصحابي المقربين..  هو حاول كتير يلفت نظري في أكتر من موقف ولكن أنا ولا أي حاجة بتتهز جوايا، يمكن لأن حب والدى الرهيب واهتمامه بيا والعطاء اللي عمله ليا خلاني مش أي حركة شاب يعملها أنه يأثر فيا لأني واخدة حب كبير أوي من والدي".

منى زكي: أحمد حلمي مولود في عيد ميلادي

وأردفت منى زكى قائلة: "في مرة سألني عيد ميلادي امتى وسألته ليه فقالي عادي فقلتله، فقالي ايه ده وأنا كمان نفس يوم 18 نوفمبر، وأنا بيني وبين نفسي ايه الجوا لقديم ده وقلت يا سم مكنتش مصدقاه، بس طلع صادق فعلا وطلع نفس يوم ميلادي، وقالي بحبك وسيبته وروحت مع أصحابي، ولما سافرت فضل الموضوع في بالي".

منى زكي: عمري ما شفت فنان بالشكل ده

واستكملت منى زكى: "بدأت أراجع صفات كتير في أحمد حلمى ولقيت عنده نبل وعمري ما شفت فنان بالشكل ده عنده رقي وطيبة في التعامل مش عادي وعنده تسامح يفوق أي حد قابلته، فشفت إنه شخص من جوا حاجة جميلة جدا ومثقف جدا ومتفتح، ولقيت نفسي بعد كده مش هقدر أعيش من غيره، وكل لما نتكلم أكتر يبدأ حاجات تنمو جوايا اتجاهه".

أخر اعمال منى زكي

وخاضت منى زكى، سباق رمضان الماضي بمسلسل "لعبة نيوتن"، ومن بطولة كل من: محمد فراج، محمد ممدوح، سيد رجب، عائشة بن أحمد، مايان السيد، أسامة الهادي، ولأول مرة في الدراما المصرية الممثل المصري الأمريكي آدم الشرقاوي، سيناريو وإشراف على الكتابة مها الوزير، وتضم ورشة السيناريو والحوار الكُتّاب: مها الوزير، سمر عبد الناصر، محمد الشخيبي وعمّار صبري، من إنتاج شركة Media Hub (سعدي - جوهر)، تأليف وإخراج تامر محسن.

و قصة مسلسل "لعبة نيوتن" تدور حول رحلة حازم وهنا، اللذين يخططان في سرية تامة لإنجاب طفلهما بالأراضي الأمريكية، ولكن المغامرة تتعقد شيئًا فشيئًا، وتأخذهما إلى عوالم لم تكن يومًا في الحسبان، وقد تم تصوير أحداث المسلسل في مصر والولايات المتحدة الأمريكية، وهو رابع الأعمال التليفزيونية للمخرج تامر محسن في دراما رمضان.