طالب الألسن صاحب أشهر صورة : حاولت مع زميلتي علاج الكلب في الشارع بسبب إصابته بالتسمم.. وعملية الإنقاذ استغرقت 9 ساعات

الثلاثاء، 06 أبريل 2021 08:00 م

اعتادت الكلاب والقطط والحمام في الشارع أن يقدم لها الطعام بشكل يومي، كما اعتاد أن يناديهم بأسماء أطلقها عليهم. وبعد أن ينتهى من إطعام الكلاب والقطط يرش الطعام للحمام واليمام فى الطرقات، حيث صادف إصابة كلب في إحدي المرات التي كان يقدم فيها الطعام للحيوانات، فحاول مع زميلته إنقاذه، حتى استعانوا بطبيب بيطرى الذى نصحهم بتعليق محاليل طبية له، وبينما حسن يقف مهموما وقلقا على صحة الكلب أعجب أحد المارة بموقفه فالتقط له صورة ونشرها على صفحته بموقع "الفيس بوك" والتى لقت إعجاب الكثيرين وانتشرت فى جميع الصفحات على مواقع التواصل الاجتماعى، وطالب الناس بالاقتداء بحسن.

حسن يحمل المحلول للكلب

كشف حسن ياسر، الطالب بالفرقة الرابعة بكلية الألسن، جامعة عين شمس، كواليس صورته الشهيرة، وهو يحمل محلول طبى لكلب مريض على أحد الأرصفة، حيث قال :" اتعودت أنا وزميلتى هدى إبراهيم على إطعام كلاب الشارع وإنقاذهم، وأفتكر مرة كان فيه كلب مجروح وأخدناه وعالجناه ودلوقتى كبر، وكواليس الصورة بدأت بأننا لقينا كلب عند محطة مترو الجيش، مصابا بحالة تسمم وكان بيستغيث، حاولت إنقاذه أنا وزميلتى بأى طريقة ممكنة، لكن معرفناش، فاستعنا بدكتور بيطرى، اللى نصحنا بأعطاء الكلب دواء وعلمنى أنا وزميلتى إزاى نمسك المحلول ونديه للكلب، وأنا ماسك المحلول واحد صورنى ونشرها على السوشيال ميديا".

الكلب المريض

تابع :" وإحنا واقفين مع الكلب اتعرفنا على بنتين مهتمين بالحيوانات وهما سلمى علاء وبسنت محمد، ساعدونا فى البحث عن شلتر، ووصلنا لشلتر فى الجيزة، ووصلنا الكلب هناك، والموضوع ده خد وقت من الساعة 1 الظهر لحد ما وصلنا الكلب لحد الساعة 9 ليلا تقريباً، رغم الفترة الطويلة دى محسيناش بالتعب وكنا مستمتعين باللى بنعمله، لكن اللى ضايقنا تعليقات بعض الناس السلبية، زى اللى يقولنا شيلوا الكلب ده من هنا، بتعملوا كده ليه، ودى طبعاً مش أول مرة نسمع تعليقات زى دى لما بننقذ كلاب أو قطط فى الشارع لكن فى نفس الوقت برضه بنلاقى ناس بدعمنا وتشجعنا".

اعتاد حسن وهدى على تربية الحيوانات الأليفة، والاهتمام بهم وتحضير أطعمة لهم بشكل يومى، وهذا ما أكده حسن قائلاً:"أنا كنت بربى قطط قبل كده وكذلك زميلتى، وأنا عموماً بهتم بطيور الشارع والكلاب والقطط، وبجهز دايماً أرجل فراخ وبسويها، وبأكلها للكلاب فى الشارع والقطط بتاكل أى حاجة باكلها زى كبدة أو سمك واليمام والحمام بشتريلهم أكلهم وأرشه على الأرض عشانهم، والكلاب والقطط عارفنى ومسميهم بأسامى معينة وهما لما بيشوفونى بيجروا عليا ويلعبوا معايا".

حسن ياسر

وجه حسن رسالة لأصحاب القلوب القاسية التى تتعامل بعنف مع الحيوانات، قائلاً :"نفسى الناس تحاول تقرب من الكلاب أو الحيوانات عموماً، وتعرف أن دى أرواح زينا خلقها ربنا، وكمان التواصل معاهم هيشيل الطاقة السلبية عندهم تجاه الحيوانات، وكمان لو حد حاول يأكل كلب ويعطف عليه هيلاقي الكلب مبسوط وبينط زى الطفل، ويبص له بامتنان ده فى حد ذاته هيخلى اللى قدامه مبسوط، وهيحبه أكتر، فى رأيى أن الوحيد اللى مش لاقى صاحب ممكن يصاحب الحيوان هيحس بمتعة تانية ".

هدى مع أحد الكلاب